1 Ee kana kisima dokopa akali Josayana ikinyingi Jiyoakwimi baa Juta wambunya kiŋi kareyamo dokopa Kamongo dokome namba langyuo lao, 2 Pepa yoko kao pele pele lasi doko nyepala nambame Isaraele wambunya laope Juta wambunya laope dee rara peparaena laope langiyunu pii dupwa peparae pepa dokona pyao retape. Yuu gii Josaya baa kiŋi kareyamo dokopa wambo langyuo pao epapu langipunupape dupwa peparae pyao retape. 3 Mende dee Juta wambu dupwa keta randa peparae nambame mairu lao lao reteyo doko sepala nakama koo pyuo kata koona pelyaminyi dupwa yaki nyuo kaeyaramiko rapisi. Dokopa nakamana yulu kopetame pilyaminyi dupwape dee koo pilyaminyi dupwape nambame nyuo kame sakamiru. 4 Dokona lao Nerayana ikinyingi Baruku kee lao nyepala Kamongome namba pii langiyamo dupwa peparae lamaiyu. Dokopa pepa yoko kao pele pele lasi dokona Baruku pyao palyiya. 5 Dokopa enakana nambame pii lapo opetae lamaiyuo, Namba tembole anda dokona dee kamba kolando kapa paa nalu nao naro ingilyamo. 6 Dopa pirunupape wambu dupwa nenge dee wasaka pyuo peteyami kande dokopa emba tembole anda dokona papala pepa kao pele pele lasi doko ketae palyuo poraiyuo yaka lape. Lare dokopa Kamongo dokome namba langipyamo pii peparae nambame emba jipunu dupwa serami. Wambu dupwa peparae serami pandandena yulu doko pipi. Dee Juta wambu dupwa nakamana yuu taone dupwana piso iminyi dupwa opetaeko serami. 7 Kamongo dokome banya imbu singi andake isare ingyuo ango karapya dokome wambu dupwa pipya randa mairu lapyamo doko silyaminyi dokona nakama Kamongo kando ateŋa lao nakamana koo dupwa yaki nyuo kapu kyuo eparami rapisi, leyo. 8 Dokona Baruku buku kao pele pele lasi doko nambame lena leyonuli pyuo wai lyaro soo tembole anda dokona yaka leya. 9 Ee kana kingi paki kana mange mendaki karo dokona akali Jiyoakwimi baa Juta wambunya kiŋi ingyuo kareya. Dokopa wambu dupwa Kamongome rae maiyuo karena lao pilyamano lapala nenge wasaka pyuo kareyami. Wambu Jerusaleme palenge dupwape dee wambu dupwa yuu Juta taone dupwana piso epeyami dupwape peparae nenge naa nayamiko. 10 Dokopa wambu dupwa peparae soo peteyaminyipa Barukumi pepa kao pele pele lasi dokona nambame pii leyono dupwa mende isa nemba nao wai lyaro soo yaka leya. Baa doo piyamo doko kiŋinya pepa pingi akali Gemaraya lenge Sapanena ikinyingi dokona panda kuki dokona karo piya. Banya panda kuki doko tembole anda dokona Kame Kambu Enenge konandowame dorena malu palyuo pii lenge panda ketae dokona ingyuo singi.

11 Akali Maekaya Gemarayana ikinyingi Sapanena kauwange dokome Kamongo dokome leyamo pii dupwa pepa kao pele pele lasi dokona paleyamo akali Baruku dokome yaka leyamo siya. 12 Sepala baa kiŋinya anda dokona peya. Pao kiŋinya pepa pingi akali dokona panda kuki dokona akali mupwa dupwa pii wato lao peteyaminyi dokona peya. Peteyaminyi akali dokona mende kiŋinya pepa pyakamingi akali Elesema dee mende Semayana ikinyingi Delaya lenge mende akali Akipona ikinyingi Elanatane lenge mende Saparena ikinyingi Gemaraya lenge dee mende Ananayana ikinyingi Setekaya lenge dee akali mupwa wakale lapo opetaeko dokona peteyami. 13 Dokona Maekaya akali Barukumi yaka leyamo pii siyamo dupwa peparae nakama lamaiya. 14 Lamaiyamosa akali mupwa dupwame akali Juti (Netanayana ikinyingi, Selamayana kauwange dee kauwange kyawa doko Kusi lenge) dokome pepa kao pele pele lasi wambu yaka lamaiyuo karapyamo doko minyuo epena Baruku lamaiyala pena leyami. Dokopa Baruku buku kao pele pele lasi doko minyuo akali mupwa dupwa peteyami dokona peya. 15 Peyamo dokopa nakamame lao, Isa pisipi. Pisipala pepa kao pele pele lasi doko namwa yaka lao langipi. Dokona lao Barukumi nakama yaka lao lamaiya. 16 Yaka lao lamaiyuo otapeyamo dokopa nakama pakame kumuo yango mendeme mende kando pipala Baruku lamaiyuo lao, Namwame pii dake pao kiŋi doko lamairama, leyami. 17 Lapala nakamame baa piso soo lao, Epapu dakepa namwa langyuo apa pyuo embame pii dapwa peparae pyapisi? Jeremayame pyape lao emba langipyase? leyami.

18 Dokopa Barukumi isingi lao, Jeremayame pii peparae langipyamopa nambame pepa kao pele pele lasi dakena pyanjilimi pyapu, leya.

19 Dokopa nakamame baa lamaiyuo, Embapa Jeremayapa wambu mendeme dusa petambinyi lao see nana lao yalu pela pupwape, leyami.

20 Akali mupwa dupwame pepa kao pele pele lasi doko kiŋinya pepa pyakamingi akali Elesemana panda kuki dokona reteyami. Retapala nakama kiŋi peteyamo panda dokona papala pii peparae paleya dupwa lamaiyami. 21 Dokopa kiŋi dokome Juti buku kao pele pele lasi doko nyela pena leya. Leyamosa akali Elesemana panda kuki dokona siyamo nyepala pao kiŋi akali dokope dee akali mupwa awali lao kareyami dupwa pipya yaka lao lamaiya. 22 Yuu gii doko kupwa pingi dokopa dokona kiŋi baa banya anda kupwa pingi yuu gii dupwana palenge dokona isare repeta petenge panda dokona soo peteya. 23 Dokona akali Jutimi pepa pyasi dokona lane remape kisimape mende yaka lapeyamo dokopa kiŋi dokome kema wua kuki mendeme kunjapala isarena kiso peteyamo pao buku kao pele pele lasi doko rao oteya. 24 Dopa piyamopape kiŋi dokope panda banya akali mupwa dupwape lapo pii doko siyaminyi dupwa nakama pakame kumuo kondapala renge lao mende lasaka pyuo pii nayami. 25 Akali Elanatanemoo Delayamoo Gemarayamoo dusipame buku kao pele pele lasi doko kiŋi dokome kisa napyali lao piso sokondali pyuo leyaminyipape baame nakama doko mende lalyaminyi lao see naya. 26 See napala baame kiŋinya ikinyingi Jeramelemoo Aserelena ikinyingi Serayamoo role pyapeta dee Apetelena ikinyingi Selemayamoome namba poropeta akali Jeremayapa nambana pepa pyakamingi akali Baruku opetaeko puu maiyuo nyela pena leya, Dopa leyamopape Kamongome nambwa nyuo yalu piya.

27 Baruku pii lamaiyamo pepa kao pele pele lasi dokona dupwa kiŋi Jiyoakwimi kisapeyamo dokopa Kamongo dokome namba langyuo lao, 28 Pepa kao pele pele lasi wakale mende nyepala pepa wambo doko pii palenge dupwa peparae pyao retape lao langiya. 29 Kamongome kiŋi doko dopa lamaipi, leya. Embame buku kao pele pele lasi doko kiso dokopa Jeremaya piso soo, Akipamo Bapilone kiŋi dokome epapala yuu dake pyao kokwa soo dee wambu menape dupwa pyao kumuo pira ingilyamo lapipi lee kande, leya. 30 Dokona lao kiŋi Jiyoakwimi, Namba Kamongo dokome emba langilyu. Embena para pyao manjo parene dokona mendeme kiŋi Dapitinya panda nyuo kiŋi yulu pii nara. Emba kumarene dokopa embena yongo doko neta renge panda mendena nembaraminyipa yuu gii korakama dokopa netame rao karara dee kukwa dokopa kalapetame pyao karara. 31 Nakama peparae koo pilyaminyi dokona nambame emba randa joo embena manjirinyi dupwa randa maiyuo dee embena akali mupwa dupwa randa maiyuo piru. Dokona embape dee Jerusaleme wambu dupwape Juta wambu dupwape nambana pii mende piraŋa lao repe repe langipunu dokona see nalyaminyi dokona nambame nakama peparae keta lao randa jero leyonuli pyuo pyakaro.

32 Dokopa enakana nambame buku kao pele pele lenge mende wakale nyepala nambana pepa pyakange akali Baruku maiyunusa akali dokome nambame pii lamaiyu dupwa peparae pyao reteya. Buku kao pele pele lasi wambo kiŋi Jiyoakwimi isarena kisiyamo dokona palenge dusipana mende pyarepala para kando lao peparae pyao reteya. Dee nambame pii dopale lapo lamaiyunu dupwa opetae konda pyuo pyao reteyako.

<- JEREMAYA 35JEREMAYA 37 ->