JEREMAYA 23

Rengya Renge Keyange Mende Pira Lao Soo Nyingi

1 Wambunya akali kyawa dupwame Kamongona wambu dupwa randa maiyuo pyao kokwa soo ralinyi nembo karaminyi dupwa Kamongona kote lenge yuu gii pyaka seramo dokopa randa andake nyeramilyamo. 2 Isaraele wambunya Kamongo Anatu dokome dopa letamo. Isaraele wambunya akali kyawa dupwame nambana wambu rapu pyakamiramili kata dokona pyaka nalyaminyi. Nakamame pyao kusape palyuo bolombalo lanyi nembakalyaminyi. Dopa pyuo yulu koo doo pilyaminyi dokona lao nambame nakama randa jero, letamo. 3 Nambame nambana wambu lapo dupwa bolombalo lao yuu wakale dupwana nembeyono dupwa nyuo malu palyuo lanyuo epo yuu andape range dokona peyaro. Dopa pirunupa nakama keta wane wanakepe malu wai kisaronopa rara doko ando nyimbwara. 4 Nambame akali kyawa lapo rombo palyapala nakama iso karena laro. Nambame nakama kamba randa mai naronopa nambana wambu dupwa dee pako yamarangyuo kara narami. Namba Kamongo dokome lapusa pilyamo.

5 Kamongo dokome lao, Dapitinya para pyasi dokona yulu rolae pingi mende kiŋi inginya lao wasaro yuu gii doko epelyamo. Yuu liti dokona kapa kapa pyuo kiŋi dokome mona angi palipala anjuku rolae lao rolo pyuo rapu pyuo karara. 6 Baa kiŋi ingyaramo dokopa Juta wambu dupwa kyawa minyara. Dee Isaraele wambu dupwa manda rao mona seramo palyuo karo pirami. Banya kingi doko Kamongo Namwana Lete Wai Pyao Nyingi, larami.

7 Kamongo dokome lao, Kamongo lete karalu karenge dokome Isaraele wambu dupwa yuu Isipi piso nyuo minyuo epeyono doko kando wambu dupwame pii porakai mende lalana dokopa nambana kingi lao kinyi leto lao laa narami gii doko epelyamo. 8 Dopa laa naraminyipape yuu dulurena dee yuu wakale wakale dupwana nambame nakama bolombalo lao nembeyono pao kareyaminyi dupwa nyuo minyuo epeyono Anatu lete karalu karenge doko kando pii porakai mende lalana dokopa nambana kingi lao kinyi leto larami. Dokopa nakama rangena yuu dokona palu kararami.

Poropeta Dupwana Lao Jeremayame
Pii Leya

9 Namba poropeta akali dupwana lao suu pyao mona rumbingi karo

mona pupyamo walu walu lao karo.

Kamongo dokomepe

dee banya pii poo pyasi dokomepe

namba ipwa biya napala karenge dopale inginyi pyambulyamo.

Akali mende ipwa waene malu napala lao kararamuli pyuo lao karalyono.

10 Wambu malu yuu dakena simbuo palipala Kamongona yulu mondo lao pii nao kaelyaminyi.

Nakama yulu koo dupwanako suu pyao pimisa nakamana yulu angi doko yaki nyilyaminyi.

Kamongome yuu doko kwaeyo pena leyamo dokona

rambi isakope dupwa kyapuo yanda nao kumuo pupyamosa ee lao kumanda petaminyi.

11 Kamongo dokome lao,

Poropeta purisi akalipi dupwa Anatu soo nyii nalyaminyi.

Tembole anda angi dokona pao yulu koo pyuo kareyaminyi kando nyiyu, letamo.

12 Nakama kata moko minyuo pelyaminyi dupwa iminjo keta keta pira.

Nambame nakama lukumakapala pao palena lao piru.

Nambame nakama keta randa andake mairu.

Nakamana randa nyerami yuu gii doko epelyamo. Namba Kamongo dokome leto.

13 Yuu Samaria dokona poropeta akali dupwame koo piminyi doko kandelyo.

Nakambame mee bange anatu lao Bealo lenge dokona kingi lapala

nambana wambu dupwa ralinyi neta nembelyaminyi.

14 Dopa piminyipape yuu Jerusaleme dokona poropeta akali karaminyi dupwame yulu koo ai pingi doko piminyi kandelyo.

Nakamame enda kepo pipala pii kyambo letaminyi.

Wambu dupwa yulu koo pinya lao kata lasaka pyuo karaminyi dokome

wambu mendeme yulu koo dupwa yaki nyii narami ingilyamo.

Nambame kandapu dokopa

yuu Sotoma Gomora dolapona koo piyaminyi dopale manda manjo pelyamo.

15 Dokona lao namba Kamongo Porai Waksa dokome Jerusaleme poropeta dupwana lao dake leto.

Nakamame Anatunya akali ingyuo kara naminyi dokona wambu dupwa mana nyilyaminyi.

Dokona nambame isako kau pingi wara piru karamo dupwa nena lao maiyuo mauli dupwa ipwa ingyuo kamuo nena keko pyakamyuo piru.

16 Kamongo Porai Wakasa dokome Jerusaleme wambu dupwa lamaiyuo, Poropeta dupwana pii letaminyi dupwa sakami nalapape. Nakamame rengya mende pira lao kekenge pii malu letaminyi. Nambame mende lapunupa langya nalyaminyi. Nakamba range mende pira rapisi lao mee waso nyepala langilyaminyi. 17 Poropeta dupwame wambu lapo nambame lapunu pii dupwa selana kamba letaminyi dupwa kando lao wambu nakama keta mee kapa ingyuo para lyakande letaminyi. Karapala mona kana poko lao karenge wambu dupwa peparae lamaiyuo, Nakama dupwa keta randa andake doko epa nara, letaminyi.

18 Nambame lao, Poropeta akali dapwame mendemepe Kamongona suu pinginya yalu pyuo silyamo dupwa soo nyii nange. Dee nakama mendemepe banya pii doko soope dee soo nyuope pii nange. Banya pii lapyamo dupwana doko mende lalyamo lao sakaminginde daa. 19 Banya imbu singi doko ama raiya pambake yale dokome wambu koo pilyaminyi dupwana ayemba peparaena pyao soo kyaya lyaape ingyuo kaiki pilya pyana pyuo pira. 20 Dopa pyuo banya pinya suu pilyamo dupwa pyuo otaparamo dokopa banya imbu singi doko pyai nara. Enakana dokopa banya wambu dupwame dopa pyuonde piyalyamo lao soo pakana palyarami.

21 Kamongo dokome lao, Nambame poropeta dapwa pena laa nayonopape nakamame maso peyami. Nambame nakama dopa pyuo lena lao pii mende lamai nayonopape nakamame nambana kingi dokona mee laoko kareyami. 22 Nakamame nambana suu pingi yalu pyuo silyamo dupwa simili doko nakamame nambana pii dupwa nyepala nambana wambu dupwa polo lamaikaraminyipa Satane yulu dupwa yaki nyuo kaeyo karo yulu koo pyuo karaminyi dupwa alowa pyuo kaeyamili.

23 Namba Anatu doko yuu muu peparaena kapa kapa pyuo karenge. Mendakisa yeelyo karengende daa. 24 Mendemepe nambame kanda naro panda mendena yalu pyuo kara nara. Namba yake panda dorenape isa yuu panda darenape peparaena kapa kapa pyuo karo doko emba see nalese? 25 Poropeta akali dupwame nambana kingi dokona lao kyambo laminyi doko namba silyu. Dee nakamame polo lao nambana wai pii doko nakamana kombeya pimwa dokona jilini, letaminyi. 26 Yuu gii akipare poropeta dupwame nambana wambu dupwa kando mee pii waso nyepala kyambo lao kata kyai dokona lanyuoko pao kararamisi? 27 Nakamana rakange dupwame mee bange anatu kingi Bealo doko keta mona maiyuo papala namba kame siyami doko suu pyao nakamana kombeya lamailyamano dokome nambana wambu dupwame namba kame serami katandena pimisa pilyamo. 28 Doko poropeta kombeya pilyaminyi dupwame doko mee kombeyaŋa larami ingilyamo. Dopa laraminyipape poropeta nambana pii silyaminyi dupwame pii doko mondo lao polo larami ingilyamo. Nambana pii doko jingi angi ingyapyamopape poropeta akalinya pii doko mee yanenge ingilyamo. 29 Nambana pii doko isarena mendeke dee ama porai kana dupwa pyao longo sinjimu ingingi dopale ingyuo silyamo. 30 Poropeta akali dupwa nakama range yango sukusa pii lami dupwa nyepala nambame lapunu lele lao letaminyi dupwa namba kando yanda pimwaiyuo karo. 31 Poropeta lapo nakama rangena pii lao dokopa namba keta ipyamo soo nyepala imi ingyalya ingyana pyuo letaminyi dupwa opetae awa nao karo. 32 Namba Kamongo dokome mende lalyane lao selapape. Poropeta lapome nakamana kombeya dupwana kyambo pii malu palyuo laminyi dupwa awa nao karo. Nakamame kombeya dupwa lamaiyuo kyambo laminyi dupwamepe dee range ketae pyambuo lakandaminyi dupwamepe nambana wambu dupwa kata kyai dokona lanyuo pelyaminyi. Nambame nakama nembo dopa pyuo laramiŋi pena lao laa nayo. Nakamame lami dokome wambu dupwa nyiso laa nalyaminyiko. Namba Kamongo dokome lapusa pilyamo.

23:33—25:38 Jeremaya baame ee kana malu nembo lao, Kamongo dokome Juta wambu dupwa kote lara, leya. Kote larama yuu gii oo repeta epeya. Kamongo dokome kiŋi Nepukatenesa Bapilone range keta banya wambu dupwa randa maiyuo kote lara. Kamongo dokome wambu rara peparae dupwa randa maira, Jeremayame leya.