1 Isaraele wambu dupwame Kamongo kando kamba lao yulu kooko pyuo kareyamisa baame Pilisitia wambu dupwame Isaraele wambu dupwa ee kana akalisa kisima iso karena lao yaki nyiya.

2 Dokopa akali mende kingi Manoa lenge yuu taone Jora range dokona kareya. Baa akali Dane lengende kareya dokona rara. Manoa banya etenge doko wane manji nao mee ingi poraiyuo petenge. 3 Dokopa Anatunya aŋala mende baa peteyamo dokona epapala lamaiya. Emba wane manji nao mee petenge kandale doko epapu emba repeta wane rombanda ingyaramopa wane ane manjiri, lamaiya. 4 Emba sepe. Ipwa waene biyape panda nenge koope dupwana mende naa napipi. 5 Dee dopa pyuo emba wane rombanda ingyaramopa wane ane manjiri doko embame wane banya kyawasi doko pyake pakami nare. Wane baa banya mandenge yuu gii eparamo dokopa baa Nasaraite ingyuo karo baa rangeme Anatu mona peparae maira. Wane baame kanda soo yulu piramo doko Pilisitia wambu dupwame Isaraele wambu dupwa randa maiyuo karaminyi dokona Isaraele wambu dupwa rekya lao nyera, leya.

6 Enakana enda baa anda pao akalingi lamaiyuo, Anatunya akali mende namba pisipu dokona ipya. Ipyamo dokopa banya lenge kambu doko Anatunya aŋala dopale ingyapyamosa namba paka pipya. Dokopa nambame yuu anja karo ipya lao piso see napu. Dee aŋala banya kingi namba langi napyako, leya. 7 Dopa pipyamopape akali baame namba langyuo, Embena rombanda wane paliramopa wane ane manjiri, lapya. Baame namba langyuo, Ipwa waenepe ipwa ama porai dupwape nenge koope dupwa naa nao pepe. Doko wane baa range peparae Anatu maira. Baa kararamo yuu gii dusipana Nasaraite akali ingyuo karara, lapya, leya.

8 Dokopa Manoame Anatu lao ateŋa leya. O Kamongo, embena akali pena lapipya doko dee kamba namba keta epena. Epapala dokome nambwa langyuo, Wane angi manjipala dokopa dopa pilapape lao langinya, leya.

9 Anatumi Manoa piso soo leyamuli pyuo piya. Banya aŋala dee kamba kapu kyuo enda baa ee dokona peteyamo dokona epeya. Dokopa enda banya akalingi role pyao ee dokona kara nayambi. 10 Dokopa enda baa makando akalingi lamaiyala peya. Akali wamba namba pii langiya kande doko epapu dee epamo, lamaiya.

11 Dokopa Manoa sipurapala etenge peyamo dokona peya. Pao aŋala kareyamo dokona papala baa piso soo, Emba akali wamba nambana enda doko kando pii lami dokose? leya.

Dokopa aŋala baame, Kinyi letene dokoŋo, lamaiya.

12 Enakana akali Manoa baame leya, Epapu dee emba letene doko angi pyaka seramo dokopa wane baa apa pirase? lao piso siya. Dee baa aki yulu pirase? lao piso siya.

13 Kamongona aŋala baame Manoa lamaiyuo, Embena enda doko yulu peparae nambame lamaipunyili pyuo pyuokondali pinya leya. 14 Enda baa isa girapo jingipi ipwa waenepe biyape nenge koope dupwa naa nao baa yulu peparae namba lapunyili pyuo pinya leya.

15-16 Dokopa baa Kamongona aŋala lao soo gisa napala Manoa baame aŋala doko lamaiyuo, Emba paa napipi. Namwame emba mena meme kumambona doko pyao yangakamanale, lamaiya.

Dokopa aŋala baame Manoa isingi lamaiyuo lao, Namba dae pisipuli doko embena nenge doko namba naa napuli. Emba rapa rapa pipuli lao suu pii kande doko Kamongo keta pyao kiso mairi, leya.

17 Dokopa Manoa baame aŋala doko lamaiyuo, Embena kingi doko nambwa langi. Dokopa nambwame embena pii lao langipi doko kinyi angilyamo lao sepala nambwame embena kingi ketae nembo lakandaramba, leya. 18 Aŋala baame Manoa piso soo lamaiya, Akipamo embame nambana kingi api lao piso silisi? Nambana kingi dokona lao wambu dupwa yamarangyuo poraiyuo suu pingi.

19 Doko sepala Manoame mena meme kumambona doko nyepala dee nenge witi jingi lapo nyuo lanyuo papala kana pyare lasi dokona Kamongo yulu wambumi pii nange dupwa pingi doko keta kiso maiya. 20 Dokopa isare kyau ulingi kana pyare lasi dokona piso yake dokona peyamo dokopa Manoa etengepa kandeyambinyipa Kamongona aŋala role pyapeta peyamo doko kandapala nakambana lenge kambu yuu kandapala mukumbalu siyambi. 21 Manoa etengepa dee aŋala doko kanda nayambi. Dokopa Manoa baa akali doko angi Kamongona aŋalalyamo lao siya.

22 Manoame etenge kamba lamaiyuo, Anatu kanda nange doko kandalyambano dokona nambwa kumarambana pilyape? leya.

23 Dokopa etengeme isingi lao, Kamongome nambwa pyalana pili doko baame nambwana mena yangambwa doko kando rae mai napyali. Rae mai napala nambwa lasaka pyuo dee pii angi langyuo pilamo kandapi doko pii napyali, leya.

24 Enda baa wane nyaŋa mandeya. Wane banya kingi Samasone leyambi. Wane baa andeyamo dokopa Anatumi baa elyape keta pisiya. 25 Baa yuu Jora dee Esataolepana kanya dokona akali Danena rara wambu paleyaminyi dokona kareyamo dokopa Kamongona Imambu dokome baa kanda soo arombanyi nembeya.

<- JASI 12JASI 14 ->