AISAYA 63

Anatumi Yuu Muu Dupwa Nyuo Kongwanyi Palyiya

1 Yuu Itome dokona yuu taone Bosera lenge dokona piso epelyamo doko baa apisi? Porainya renge palenge porai wakasa mende kimbu pyao piso komau kone keyange pinginde epelyamo doko baa apisi?

Doko Kamongo banya porai renge palenge dokome lete wai pyao nyingi dokome banya pyao anamasi minyingi renge dokona lao boo pyao lala epelyamo.

2 Akipamo banya komau doko alemakai pyao kingyuo karami ingyuo kone wakasa pilyape? leya.

3 Kamongome isingi lao, Nambame yuu muunya wambu rara peparae alemakai minyuo kingili lao kalyuo injo rambetaku piyunu dokopa mendemepe epo namba nyisa nayami. Dopa pyuo nambana imbu singi paleta nakama kalyuo injo rambetaku piyunusa nakamana ranjama dokome nambana komau peparaena alemakai kii ingyuo kaeyo nyiya. 4 Nambana wambu lete wai pyao nyerono yuu gii doko ipwamo lao soo manjo oteyo. Gii dokopa nakamana yanda pimwai dupwa pyao randa mairu doko pyaka sepelyamo lao soo nyiyu. 5 Nambame kandeyo dokopa mendalimipi nyisaramaŋa lao ingya nayamisa mona nembo kareyo. Dopa piyunupape nambana imbu singi andake dokome namba porainyi pyambuyasa namba rangeme pyao anamasi minyiyu. 6 Nambana imbu singi dokome yuu muu peparaena wambu dupwa pyao inji ranji pyuo minyuo alemakai kingili lanyi nembeyo. Nambame nakamana lete ranjama doko kulimbwanyi isa yuu dokona nembeyo.

Anatumi Isaraele Wambu Dupwa Keta Keyange Pyakamiya

7 Nambame Kamongona mona reto puu penge dokona lamairu.

Nambame namwana lao yulu peparae pyakalyamo dokona lao banya kingi lakandaro.

Banya mona retalu reto retenge rengepe sakame kumuo nyisingi rengepe dokome

Isaraele wambu dupwa elyape keta piso nyisiya.

8 Kamongo dokome lao, Nakama nambana wambuŋu. Namba minyako pii narami, leya. Dopa lapala baame nakamana randa dupwana kyawa lete nyiya. 9 Doko aŋala mendeme nakama nyiso kyawa lete nyiyande daa. Kamongo baa rangeme nakama nyiso kyawa lete nyiya. Banya mona reto kondange renge dokome nakama kiiramo nyiya. Wamba dokopa baame nakama yuu peparae au pyuo rapu pyakamiya. 10 Dopa piyamopape nakamame baa kando mata maipala mona randanyi pyambuyami. Dopa piyamisa Kamongo doko nakamana yanda pimwai ingyuo papala nakama yanda piya.

11 Dopa piyamosa wambana Kamongona kendemande Mosese kareyamo doko suu pyapala piso soo lao, Wamba Isaraele wambunya Kamongo dokome Isaraele wambunya lita dupwa kota pete dokona kyawa lete nyisiyamo doko epapu anja karase? leyami. Akali Mosese keta banya Imambu Poo Pyasi maiyamo Kamongo doko epapu anja karase? leyami. 12 Kamongo banya porai renge dokome nyepala Mosese keta yulu andake piya. Wambu dupwame baa rangena kingi minyalyuo karalu kararami lao baame ipwa kota doko pyao karalyapala sukusa dokona lanyuo peyamo Kamongo doko anja karase?

13 Kamongome kata lanyuo epeyamo dokome nakama kimbu rukyuope lukumu soope pii nayami. 14 Mena bulamakao yuu anda lama lama anenge andengena lanyuo pao lasaka pinginyili pyuo Kamongo dokome banya wambu dupwa mata sisiki nembena lao lanyuo pao panda doko maiya. Dopa pyuo Kamongome banya wambu dupwa lanyuo epeyamosa banya kingi ketae paleya.

Sakame Kumuo Pyuo Nyisinya Lao
Ateŋa Leyami

15 Kamongo embena yake panda poo pyasi neta renge yuu dokona palyuo karene dokona karo namwa kandanyi peyo kandape. Embena namwa poraiyuo suu pingi doko anja silyase? Embena porai renge doko anja silyase? Embame namwa mona reto kondange renge doko anja silyase? Namwa pipya kandele kanda nale laa napipi. 16 Emba doko namwana rakange angi. Namwana rora ambasu Aporakame Jekopepame namwa soo nyii nange. Dopa pimbinyipape emba Kamongo namwana rakange dokome yuu peparae namwa koo dupwana nenge raka lao nyuo karenge. 17 Akipamo embame namwa embena kata dupwana yaki nyuo ralo karalapa lao kaelese? Akipamo embame namwa yuu peparae mona kana pokalu poko pokapala yaki nyuo pumili lao pilisi? Wambu lapo embena yulu pyakalyaminyi dupwana lapolapo lao lapo yuu peparae embena ingyuo peyaminyi dupwana lapolapo lao kapu kyuo ipupi.

18 Namwa embena wambu poo pyasi dupwa namwana yanda pimwai dupwame pyao nyisa ralinyi nembeyaminyipa yuu gii lapo pisipeyama. Dee nakamame embena tembole anda poo pyasi doko pyao lalyuo kalyuo muu muu pinyi nembeyami. 19 Embame namwa iso kara nalenepa namwa embena wambu ingyuo pisi nangende ingyuo pelyamo.

<- AISAYA 62 AISAYA 64 ->