1 Kamongo Mupwa Andake Wakasa dokome banya imambu doko namba keta palyuo simbwapya.

Baame wambu pendewa dupwa waili pii keyange doko

boo pyao lamaiyuo karape lao namba rombo palyapya.

Mona yanyi pyapyamo karaminyi dupwa pyuo nyuo

puu maisi karaminyi dupwa moko nyuo

wambu isare rapyamo karaminyi dupwa mokwala pupi lapyasa epelyo.

2 Kamongome banya wambu lete wai pyao nyuo

nakamana yanda pimwai dupwa anamasi minyara

ee kana pyaka seramo yuu gii doko

boo pyala pupi lapyasa epelyo leya.

Dee wambu lapo ee lao kumanda petaminyi dupwa mona minyarambu puu lao peyapyasa epelyo.

3 Lapala lao wambu lapo yuu Sayone dokona kumanda petaminyi dupwa

mona rando kondange doko suu pyao rae maingi renge maiyuo

dee kumanda piso ee lenge doko suu pyao lakandenge kenane maiyuo puu lapyasa epelyo.

Nakama Kamongo rangeme isa wara pilyamo andenge dopale ingyarami.

Dokopa nakama peparaeme yulu rolae doko anjuku lao pirami.

Dokopa Anatu baame yulu piyamo dupwana lao baa lakandarami ingyara.

4 Nakamame yuu taone lalyuo kwaeyasi dupwa dee kamba minyalyuo pirami.

5 Nambana wambu dupwa yuu wakale range wambu dupwame epo yulu pyakao kararami.

Nakamana mena sipisipi dupwa rapu pyakao

nakamana yuu dupwana yulu pyakao ee nengepe wara pyuo isa girapo ee dupwa mondo lao rapu pyakao pirami.

6 Dokopa nakama Kamongona purisi akali ingyuo karaminyi laope

Anatunya kendemande akali karo pilyaminyi lao wambu menge dupwame soo nyerami.

Dokopa wambu rara yuu muu dupwana kamongonge bange dupwame nakama ketae palyuo karo rae mairami.

Rae maipala dupwa peparae nakamanaŋa lao yongo nyimbwaramo kararami.

7 Nakamana elya nyuo karenge doko mee otara.

Nakamana yuu muru range dokona paliraminyipa

mena bangepe dupwa mee lama opetaeli konda pyuo seramo kararami.

Dopa piraminyipa nakamana rae maingi renge doko soo puu para.

Namba kyai rolaepena anjuku lao lao rolenge yulu mona nyepala wambu randa maingi yulupi yulu kopetame pingipi epe kanda nange.

Nambame nambana wambu dupwa yaki nyii nao nakama kingi kiso maiyuo

nakama pipya kana minyuo lalu lao lenge pii ingyuo laro.

9 Nakamana kingi doko yuu muu dupwana ulepalepa paramopa wambu kando serami.

Wambu peparae dupwana mendeme nakama kandapala dokopa

nambame keyange inginyi pyambuyalyamo lao soo gisarami.

10 Jerusaleme enda mapwaeme akali anda panya kalya pipala penge dopale ingilyamo doko

Kamongome dopa pyuonde pyakapya lao kenane pyao rae maiyuo karenge.

Anatumi baa anamasi minyingi rengepe lete pyuo nyingi rengepe dolapome kalya pipala pisapyasa pilyamo.

11 Ee dokona wara pingi dokopa waingi dupwa poro lamu lae pipala andengenyili pyuo

Kamongo Mupwa Andake Wakasa dokome banya wambu dupwa kyawa lete nyuo nyisara.

Dokopa wambu yuu muu peparaeme baa lakandarami.