50
1 Kamongo dokome lao
Nakamame suu pyaminyi dokopa akalimi enda ramanyi nembenge dopale ingyuo
nambame nambana wambu dupwa neta ramanyi nembo kaeŋe lao suu pilyamisi?
Dopa pyuo suu pyarami ramo ramanyi nembelyo lao pepa piyunu angi doko anja silyase?
Akali mendeme banya wane dupwa karapusi ingyuo yulu pyuo pena lao maiyuo kana nyingi dopale ingyuo
nambame nakama karapusi ingyuo pupwa lapala maiyuo bange nyiiŋi lao suu pilyamisi?
Daa nakama karapusi ingyuo peyami doko nakama rangeme koo pipala
lowa yalo piyaminyi dokona peyamisa piya.
2 Nambame nakama keta pao kyawa lete nyela peyo dokopa
nambana wambu akipamo namba keta epa nayamisi?
Nambame kee leyono dokopa nakamame akipamo isingi yaa lao yano pyaa nayamisi?
Nambame nakama kapa pyuo nyiso kyawa lete nyero ingya nalyase?
Nambame ipwa kota pete kameya doko mee soko rali pinya lao
dee ipwa epo penge dupwa nyuo kee maro lanyi pyambuo soko
oma dupwana selamo dupwa mee ipwa nanapala kumuo parami ingilyamo.
3 Wambu kumaminyi dokopa kumanda karo piso petengenyili pyuo
nambame yake doko iminjinyi pyambwaro.
Kamongona Kendemande Akali Dokome Banya Pii Rape Rape Lao Pingi
4 Kamongo Mupwa Andake Wakasa dokome namba pii apa pyuo laro dupwa mana langiya.
Dopa pyuo langiyamo dokona nambame wambu makange dupwa porainyi pyambuo laro ingiya.
Yangama peparae baame namba pii mana langiramo dupwana namba nyuo wangu lakanyi pyambuo pipala mana pii langingi.
5 Kamongo dokome namba pii langiyamopa
nambame baa mona kana poko
yaki nyuo paa nayo.
6 Nambana matarena pinya lao yongo maiyuo kaeyo.
Nambana angasi dupwa minyuo ipyuo nyuo
lenge kambu kepakali kyasinyi piso
kilya kando laminyi dokopa kaena laowape laa nayo.
7 Kamongo Mupwa Andake Wakasa dokome namba nyiso karapyamo dokome
nakamame namba kilya kando laminyi dokome nambana monarena pyapyande daa.
Dopa pyuo lami dokona namba elya nyii naro doko soo kaepala
mee kyawame suu lao pupunu pilyamo.
8 Anatu dae repeta karamo dokome
namba keta koo mende pali nalyamo lao pano lara.
Mendeme namba kando koo piiŋi lao kote larase?
Dopa laramo wambu dokopa kote lambanale.
Banya pii angi palamo doko minyuo epena.
9 Nambana Kamongo Mupwa Andake Wakasa dokome namba kyawa minyuo karenge.
Namba koo piiŋi lao lao pakana palyara doko apisi?
Nambapa yanda pyuo laraminyi dupwa dusa kata serandena pana narami ingilyamo.
Nakama komau pinjingi nakepasi dee kando nyii narami dopale ingilyamo.
50:10—51:23 Anatumi banya wambu dupwa porainyi pyambuo mona minyarambu pii lamaiya. Rengya nakama kyawa lete nyuo enenge inginyi pyambwakaro, Anatumi lalu lao leya.