11
Mona Kyuu Lao Singinya Kiŋi Yulu Doko
1 Kiŋi Dapitinya kiŋi yulu alonge dokona banya rara dokona mende pulyara.
Doko isa pokwasi renge dokona angalu pyakalyingi dopale ingyara.
2 Anatunya Imambu dokome baa mona palenge singinya renge
soo gisinginya rengepe mora petengena rengepe baa keta mairamopa baame banya wambu dupwa iso karara.
Baame Anatumi dopa pipyali lao suu pyaramo dupwana soo gisapala baa ketae pyambuo kararamopa
3 banya yulu dupwa rae maiyuo pira.
Baame yanengena ketae kandapalape lasi pii iki soope kote laa nara ingyara.
4 Baame pendewa dupwa angi rolae dokonako palyuo lao rolara.
Baame range kapa nyiso laa naramili dupwana rolae pingi renge dupwa kame see nao paka pyao sakamyuo lara.
Banya laramo dokona palyuo wambu dupwa moŋo maiyuo
koo pingi dupwa kumuo pirami.
5 Baame banya wambu dupwa pipya rolo ingyuo paramopa lao mona angi palenge ingyuo iso karara ingilyamo.
6 Yana suwa kararope dee mena sipisipipi mendakinya mona seramo piso karo pirami.
Mena lepete dupwa mena meme ene dupwa pipya mendare palyuo serami ingyara.
Bulamakao ikyane mena laene ikyanepe pipa pakao nenge nao kararami.
Dokopa wane wanakepeme rapu pyuo kararami.
7 Mena beya bulamakaope nenge role pyao nao kararaminyipa
nakamana yakane dupwa mendakinya mona seramopa palyuo serami.
Mena laene dupwame rambi yando mena bulamakaome nengenyili pyuo narami.
8 Dopako pyuo wane wanakepe kau kyalende sera mare dokona
nyuo male laraminyipape nao kumaka nara ingyara.
9 Yuu Sayone Anatunya yuu kyau poo pyasi dokona
randape Satane yulupi sepa nara ingyara.
Ipwa kota soo simbuo eparamo dokonako palyuo
yuu dokona Anatunya soo nyinginya renge dokome soo simbuo rangu para.
11:10—27:13 Anatumi rara wakale wambu Isaraelepe Jutape repeta kareyaminyi dupwa kando randa maiyuo kote larasa pira, lao leya. Dee lakandenge kenane lama pyasi palamo. Anatunya wambu dupwa randa nyeraminyipape Anatumi nakama kiiramo nyero leya dokona pii palamo.