OSIA 5

1 Nakama purisi dupwa dake selapape. Isaraele wambu dupwa pii dake kale yukupala selapape. Nakama kiŋinya ree palu dupwa selapapeko. Nakamame kote dupwa rolae lapenge lyakande. Dokona nakama keta kote palira ingilyamoŋo kando karalapape. Yuu Misipa yuu kyau Tapo dolapona nakamame wambu nyuo koo keta palyalana anga pyuo kone makasi ingyaro silyaminyi. 2 Yuu Sitimi dokona yuwale kyuwa mendena koko puu pawaleko pelyaminyi dokona nambame nakama peparae randa jero. 3 Nambame Isaraele wambu nakama dopale kandale lao soo gisilyu dokona nakama namba kando kapa yalu pii narami. Dokona nakamame namba yaki nyepala karaminyi dokome namba lakandaraminyi kapa ingya nalyamo.

Osia Baame Isa Kanape Anatuŋu Lenge Dupwana Repe Repe Lamaiya

4 Wambu dupwana koo piminyi dokome nakama kata maipyasa Anatu keta kamba kapu kyuo eparami ingya nalyamo. Mee bange isa kanapeme wasisi anatuŋu lao karaminyi dokome nakama poraiyuo minyapyasa Kamongo doko baaŋa lao soo nyii nalyaminyi. 5 Isaraele wambunya range mupwa karamano lao suu pingi renge dokome nakamana lenge kambu dokona epo panelyamo. Dokopa nakamana koo dokome pyalya minyapyasa lukuma sepala isa puminyi dokona Juta wambu dupwa pale pale pelyaminyi. 6 Nakamame nakamana mena sipisipi bulamakaope dupwa Kamongo doko pyao kiso maiyaminyipape baa kando nyii nami. Renge doko Kamongo baame nakama yaki nyuo kaepya dokona kando nyii nami. 7 Nakamame Kamongo yaki nyiminyi dokona nakamana wane wanake dupwa banya ingya nalyamo. Dokona epapu nakamana yuu dupwa pyao kokwa sera.

Juta Rara Doko Isaraele Rara Dokopa Yanda Piyambi

8 Yanda pirama lao bikuli lenge dupwa yuu Gipiya dokona poo lalapape. Yuu Orama dokona randa epelyamo lao repe repe lamaipwape. Lamaipala yuu Betele dokona yuwa pisalapape. Benjamenena akali dupwa yanda dokona pupwa. 9 Isaraele wambu dupwana anda yuupi dupwa kwaeyo dusa siyaŋa larami ingilyamo. Yuu gii doko oo epelyamo. Nakama Isaraele wambu dupwa keta renge dake angi kinyi pyaka sela pyamo lyakande.

10 Kamongo dokome lao, Juta rarana akali kyawa dupwame Isaraele wambunya yuu waa nyakamimi dokona namba imbwualyo. Dokona lao nambana imbu singi doko nakama keta ipwa ingyuo kulimbwanyi palyaro, leya. 11 Wambu nyisa naramili dupwa pipa ree laminyisa Isaraele wambu dupwa randa nyuo nakamana yuu angi kulisa dupwa kombe maiyuo kaelyaminyi. 12 Isaraele wambu dupwa pyao kokwa sinyi nembo Juta wambu dupwa mendepe popo paa nana lao pyao piru.

13 Dokopa Isaraele dupwa nakama kwaeyamo doko kandeyami dee Juta wambu dupwame wua kakupi peteyamo dupwa range kandeyamiko. Kandapala Isaraele dupwame yuu Asiria dokona papala kiŋi dokome nyisinya lao piso sela peyami. Dopa pyuo pisiyaminyipape kiŋi dokome nyiso pyuo nyuo dee rete dupwa au pyuo umbwa pyuo nyera ingya naya. 14 Dokona nambame Isaraele wambupi Juta wambupi dupwa mena laeneme porayapala pili lao pyaro. Pyao pilyalya pilyana pyuo raepala puu pao paro. Nambame pyao ipyuo soo paronopa mendemepe nyisa narami.

15 Nambame nambana wambu dupwa yaki nyuo kaeyapala kararonopa nakama koo dupwana yasu nao sikya pipala dokopa namba kararo dokona nakamame koto eparami. Yasu nalu palyuo dokopa namba koto eparami rapisa.

<- OSIA 4 OSIA 6 ->