49
Jekopeme Banya Ikinyingi Dupwa Kanju Pii Lamaiya
1 Jekope banya wane dupwa epena lapala, Epo reperepe pyuo kararaminyipa nakama keta apa pyuo para lao langirowale.
2 Nakama Jekopena ikinyingi dupwa malu palyuo
rakane Isaraelena pii dokowarombo soo karalapape.
3 Urupene emba nambana wane kyawa lengya lao pepo kareta dokome mandeyo.
Nambana wane doloma karaminyipape emba yapo poraiyuo kaenge wane dokome moŋo kyaŋe soo karenge.
4 Emba akali mee langa rolarapu ipwame kama pyao penge dopaleingyuo papilini.
Dokona emba mupwa ingyuo kara nare.
Renge doko emba nambana enda doko nyuo
rate nambana dokona paleyambisa kwaeyo pelyamo.
5 Simione Lipaepa anelapo yangongepa dolapo mendare pelyambinyi.
Nakamba pundu nyuo karambinyi.
6 Yanda pipu lao karambinyi dokona see naro.
Wato lao karambinyi dupwana rekya lao kararo.
Renge doko nakamba mee ingi napala wambu pyao kareyambi.
Mee male male lao bulamakaona kimbu retapu yandanyi nembeyambi.
7 Kuli kuli palyuo imbu singi nyuo karenge.
Kale mangu mangu lao pyalanako suu pingi dokona kwao parambi leto.
Nambame nakambana ree palu doko Isaraele rara dokona minyuo sukusa rayanga lena laro.
Jekopena yuu dokona ralo bolombalo lao pena lakamiru.
8 Dee Juta rakane, embena yangongemoo embalakandarami.
Embena nyisu petenge dupwa mata minyinyi palyare.
Embena rakanena ikinyingi dupwa emba kando mona joo pangu soo kararami.
9 Juta emba mena laene ene andanda
wambu pyalena pingi dopale ingilyamo.
Doko embena kuli dupwa sisiki soo rolapala palyuo serenepa
mendeme lyapu lao pii narami.
10 Juta embena rombelyame kaikwasi dokoisa paa nara.
Embena rara doko kiŋinya rara ingyuo karalu kararami.
Kamongonge bange dupwa reto karo pao range eparamo dokopa baa keta pyamalyarami.
Wambu peparae baako kando warombo soo banya pii minyaraminyi karara.
11 Ipwa guunya girapo isa ando karenge dokona mena donge dupwa rae maiyuo anjara.
Girapo jingi kingyuo waene wasingi.
Kana malu penge ipwange kone pingi dokome komau dupwa nyuo wate pira.
12 Banya lenge doko waene ipwange nao kararasa kone pyuo
banya nenge doko susu nao kararasa kyewa lao pira.
13 Sepyulane embena rara kota pete mare dokona palirami.
Nakamana panda dokona sipu dupwa epo kararami.
Nakamana yuu doko pao yuu Saitone lili pira.
14 Isaka baa mena donge porai manda manjo karamo.
Doko nyuu komonali kenda pingi silyamo raka dokona palenge.
15 Baa paliramo panda doko keyange ingyuo seramopa
yuu doko elyape ingyuo paramo kando nyepala
dokome banya kingi yongope porainyi pyambwapala
kendemande ingyuo yulu andake doko soo nembo pira.
16 Isaraelena rara lapo dupwa pingi doko suu pyao
Daneme banya wambu dupwana baame mupwa ingyuo iso karara.
17 Danena rara kata nemba nembasa kau kyalende isaro sera dopale
kau doko katasa isaro sepala dokome
mena osena kimbu yukuna doko narasa mango pao palira
dokopa akali ketae pisira doko palepale rukimaki lao pao palira.
18 O Kamongo namba mata kyakao nyerene dokonaiso karo.
19 Gatena rara dokona waa nyingi lapome epo pyaraminyipa
baa sipurapala isingi peteta pyao para.
20 Asana yuu dokona nenge yapasi dupwa andara
nenge doko kiŋinya napengele dokome kiŋi dupwa mokwa soo maira.
21 Napatalai baa mena diya anja nangende mee dupwana makando karenge dopale
yakane au koo pingi dupwa para pyao nyingi.
22 Josepe baa mena donge rae lenge dopale baa ipwa guu lao epenge dupwana nao palenge.
Yuukyaunya mena ose yakane rae lenge dopale
23 Nuli nala penge dupwame baa pyalana pyuo
yanda nyepala baa peteta peyami.
24 Pyalana peyaminyipape yanda ipyuo pyalana saka nayami.
Rakane Jekopena Anatu Porai Wakasa dokome nyisiyasa piya.
Isaraelena Rapu Pingi Kanana Porai dokome baa nyisiyasa piya.
25 Embena rakanena Anatu dokomeko emba nyisara.
Anatu Porai Wakasa dokome emba elyape keta pyambwaramopa
Yakena apu epo karamo dokope
isa yuu donorena ipwa palamo dokope endana kurapu pau lao anju ipwange palyuope
26 Eena nenge lokwasoo kapa simbu palyuope
yuu kyau ketae pilyamo ota nalu nange dupwape
yuu kyaukuki keyange sulu singi dupwape
renge keyange dusipa Josepe baapa epo palenale
baa iki wane yapasi dokona suu pyao baa keta sinyale.
27 Benjamene yana suwa kararope nuli nalana lee minyuo papingi dopale
yangama sipurapala pyao nao karenge.
Pyao nyuo serelyamo dupwa mokwasoo maiyuo karelyamopa yuu kwuange,
leya.
28 Nakamana rakange kyawa Jekopeme Isaraelena rara akalisa mendaki ipisu lama dusipa karo dokopa dopa pyuo lamaiya. Baame banya wane dupwa mendaki mendaki range dokona manda manjo ketae pyambuo kareya.
Jekope Kumuyamopa Malu Piyami
29 Dokopa Jekopeme lamaiyuokondali pyuo lao, Nambana wambu kumuo peyami kata dokonakumuo panya. Iti range Eparone lenge dokona kana anda nambana rakange kyawa dupwa malu piyami dokonako malu pipwape. 30 Yuu andake Kenane dokona yuu Mamare neta pyakaenge dorena yuu kuki Makepela dokona singi kandale. Aporakameme yuu Iti akali Eparone lenge dokona yuu kananda paletape ropo pyao nyepala yanyanda ingyuo wasiya. 31 Aporakame etenge Serapa dee Aisake etenge Orepekapape nakama dokonako malu pingipya. Dokona nambame Liya malu piyuko lyakande. 32 Yuu kananda paletape Iti wambunyande ropo piyapya, leya. 33 Dopa pyuo pinya lao lao lumwa pipala dokopa Jekope baa kimbu lalyuo nyepala banya wambu kumuo penge kata dokona peya.
<- JENESESE 48JENESESE 50 ->