1 Kamongome namba langyuo, 2 Makwa isa ingyuo karo kuku pyaa nare akali doko embena wambu dupwa lamaiyuo, Nambame yuu mendena yanda sipurelyono dokopa nakamana range akali dokona mende nyepala nakama iso kararaŋa lao rombo palyingi kandale. 3 Baame yanda pimwai dupwa repeta eparaminyi kandapala epelyaminyi lao lyakai pyuo bikuli pii lao wambu dupwa lamaira. 4 Lamairamo dokopa repe repe doko mende palyamo lao mendeme see nao mona kana pokapala sili see nale lao kararamo pyarami ramo doko baa range keta palira. 5 Kumaramo doko baa rangena piyamo dokona ingilyamo. Daaŋa lapala bikuli pii doko mende lalyamo lao sipyali doko kapa wanjipyali. 6 Dopa piramopape iso karenge akali dokome yanda pimwa eparami doko kandapala epelyaminyi lao bikuli pii laa naramopa koo pingi wambu dupwa pyao kumkarami ramo dokopa iso karenge akali dokopa nambapa pii palira.

7 Epapu makwa isa ingyuo karo kuku pyaa nare akali doko emba nambame Isaraelena yuu liti dokona iso karare lao rombo palyiyu. Dokona nambame repe repe pii langiru dupwa kaeya nao lamaipa pyuo karare. 8 Akali koo pingi mende kumaraŋa lao larono sepala repe repe doko nyuo lamaiyuo mona enenge palyuo alowa pinya lamai narenepa koo paleta karo kumara ramo doko nambame emba keta renge laro. 9 Embame wambunya koo dupwana yaki nyinya lao repe repe lamaiparenepa minyuo yaki nyapa napala kumarami ramo dokopa emba keta pii palya nara, leya.

10 Kamongome langyuo dopa leya. Makwa isa ingyuo karo kuku pyaa nare akali doko embame Isaraele akali dupwame suu pyao letaminyi doko range dee kamba polo lamaiyakamipi. Dopa letaminyi, Namwana koo pimwa dupwame kendame kumuo karamano. Koo doko namwa keta suku suku palu palyuo palamo. Namwa apa pyuo piso karo piramase? 11 Namba Kamongo Mupwa Andake Wakasa doko Anatu karalu karene dokome nambame kinyi leto. Akali mende koo pyuo karo kumara ramo doko rae maiyuo kanda naro. Baa koo dupwa yaki nyepala karalu kararamo kandapuli yaka. Isaraele wambu dupwame koo pilyaminyi doko yaki nyuo kaeyalapape. Akipamo nakamba kumalana suu pilyamisi?

12 Dakepa makwa isa ingyuo karo kuku pyaa nare akali doko embame Isaraele wambu dupwa dapa lamaipi. Akali mendeme yulu keyange pyuo karapala enakana koo pira ramo doko wambo keyange pyuo karara dokome baa kyawa minya nara. Koo pyuo karenge dokona mendeme koo doko mata maiyuo kaeyara ramo doko baa range kyawa lete nyerasa pira. Dee akali keyange pingi mende yaki nyepala kanda soo koo pira ramo doko baa lete paa nara. 13 Nambame akali rolae pingi doko lete karara lao lalu lao laronopape baa wambo keyange pyuo kaepala karoŋo dusipa kapa lapala koo lapo pira ramo doko wambo keyange piyamo dupwa yaka lakamirunde daa. Baa rangena koo dokona kumara dokona karara ingilyamo. 14 Nambame akali koo pingi doko baa kumaralyamo lao repe repe lamaingi. Lamairunupape baa koo rangeme dupwa sepala yaki nyuo rolae doko anjuku lao nyuo pira ramo doko kapa ingyara. 15 Rolae dupwa dapale. Bange mende nyuo yulu pinya laramo maipala minyakao epare dokopa range peyakaroŋo embena wuape mende retakao kararo peena lapala anda maiyakami epenge dokopa dolo range maiyakamingi. Dopa pyuo nyuo kalyingi doko range yulu maiyakamyuo waa nyiya dupwa range maiyakamyuo koo dupwa yaki nyuo lowa anjukunya pirusa lete paro lao kata koto karara ramo doko baa kuma napala lete karara. 16 Nambame koo piya dupwa nyuo kame sakamirunupa baame rolae suu pyao keyange pipyamo dokona mee lete karara.

17 Embena wambu dupwame lao dokopa nambame pyuo karenge dupwa rolae daa letaminyi. Doko ama kapa laa nalyaminyi. Nakamana pilyaminyi dupwa rolae ingya nalyamo. 18 Akali wambo rolae pyuo kararamo doko kupyuo yaki nyepala koo dokona kanda soo pira ramo doko koo pira dokona baa kumara ingilyamo. 19 Akali wambo koo pyuo kararamo doko yaki nyepala keyange dokona rolae pira ramo dokopa baa range kyawa minyara. 20 Dopa pira doko sepala nakama Isaraele wambu dupwame nambame pilini dupwa rolae daa letaminyiŋi. Dokona nambame nakama pilyaminyi dupwana dopale dopale lao kote laro ingilyamo.

21 Yuu gii kingi paki kana akalisa ee kana akalisa ipisu lama dokona namwa anjo nyuo peyaminyi yuu wakalena kareyamano dokopa akali mende yuu Jerusaleme yaki nyuo pyakao peyandeme epo lao dopa leya. Yuu taone andake doko lalyisi silyamo, leya. 22 Leyamo akali doko epapyamo lao kukwa dokopa Kamongona porai renge doko namba keta epeyamo siyu. Dokona yangama akali baa epapeyamo dokopa Kamongome namba pii lengenyili pyuo lalese lao kambu range lumbakaya.

23 Kamongome namba dopa langiya. 24 Makwa isa ingyuo karo kuku pyaa nare akali doko yuu Isaraele dokona taone pyao lalyisi dupwana palenge wambu dupwame dopa letaminyi. Aporakame baa akali mendaki doko kareyamopa Anatumi baa yuu peparae maiya. Epapu dakepa wambu malu karamano dokome yuu doko namwana ingilyamo.

25 Namba Kamongo Mupwa Andake Wakasa dokome dopa letamo lao lamaipi. Nakama mena minju doko ranjama paleta nao isa kanape dupwame wasisi dupwa anatuŋu lao lakando karo wambu dupwa ranjama kulimbuo pyao pyuo karaminyi. Dopa pyuo karaminyi dokona apa pipala yuu doko nakamana ingyarape? 26 Nakama wua gela dokome kyawa minyara lao suu pyaro karo yulu pii napenge dupwa ipi pipyamopa pyuo karaminyi. Nakama peparaeme kepo yulu dokonako karaminyi. Dopa pyuo karaminyi dokona apa pipala yuu doko nakamana ingyara lao suu pilyamisi?

27 Namba Kamongo Mupwa Andake Wakasa dokome repe repe letamo lao lamaipi. Namba Anatu karalu karenge dokome kinyi kinyi leto. Wambu lapo taone andake lalyiyamo dupwana palaminyi dupwa pyao kumarami. Mee yuu dupwana palaminyi dupwa mena rakaiya dupwame narami. Lapo yuu kyau dorenape dee kana anda dokona yalu pyuo palaminyi dupwa anga yakane nyuo kumarami. 28 Yuu doko ketange pyanyi nembaro. Renge porai lapo palipyamo eneko kaelyaminyi doko nyuo mee inginyi nembaro. Isaraele dokona yuu kyau dupwa apa yuu ingyuo seraronopa wambu kapa parami ingya nara. 29 Nambame wambu dupwa nakamana koo dokona randa maiyuo yuu doko pendewa nembaro dokopa namba Kamongo lyamo lao soo nyerami, leya.

30 Kamongome leya. Makwa isa ingyuo karo kuku pyaa nare akali doko embena wambu dupwame nakamana anda kambupi yuu taone kana kame piso karenge dokonape kando nyepala dokopa nakamba lao emba kando lao karaminyi. Kamongo keta aki pii letamo lao sela mwua, lao karaminyi. 31 Nambana wambu soo kaeyome embame apa lene lao sela epelyaminyi. Epapalape angi pinya lamaipi doko pii nalyaminyi. Embena pii doko nyuo kuki inginyi nembapala nakama bangepe nengepe nyerami dupwana iki mona nyepala pyuo papilyaminyi. 32 Wane kukimi male lao kenane pili lao karaminyi dokopa wambu menge soo kando karaminyi dupwame renge mende pali nalyamo lao suu pyao mee giyuo karenge. Dopale ingyuo nambana wambu dupwame embena pii doko mee inginyi pyambuo nyuo male lapala pii angi lapinyi dokona mendakipi rape rape lao minya nalyaminyi. 33 Dopa pyuo lao karaminyipape embena pii lao karene doko angi pyaka sera. Pyaka seramo dokopa poropetande pii lao karapya kandapi doko anginde lamo lao soo nyerami.

<- ISIKIOLO 32ISIKIOLO 34 ->