7 Anatumi kapaŋa lao suu pyapyamo dokona embena nenge nao rae maiyuo karo embena ipwa waene nao gii mona palyuo karape. 8 Yuu peparae wambu peparaena lenge kambu dokona rae maiyuo gii mona palyuo karape. 9 Anatumi renge mende palya nao emba lete karape lao jiyamo dokona embapa enda embame mona retelene dokopa role pyao rae maiyuo palyuo karape. Emba randa nao karapinyipape mende nyere ingya nalyamo. Dokona lao yuu gii peparae koree ingilyamo dokona enda pipya mee rae maiyuo palyuo karape. 10 Kumunginya yuu dokona emba pare dokona yulu pingipi suu pingipi soo gisinginya rengepe mona palyuo soo nyinginya rengepe dupwa see naramo dokona emba yulu aki mende pinya suu pyao pilini dupwa poraiyuo pepe.

11 Dee mende namba lao kandapu. Doko isa yuu dakena wambu puu lao makandelyaminyipape dupwana lapome wini pii nange. Akali paka mona manja nao yanda pingi dokopa yuu peparae wini pii nangeko. Akali mona palenge dupwame bange kanape dupwa yuu peparae mondo lao reta nange. Akali kyawa sisingi palenge dupwame yuu peparae bange malu reto kamongo ingyuo kara nange. Akali mora mora petenge dupwame yuu peparae kamame ulipilipi paa nangeko. Dopa pyuo yuu gii lapona wambu peparae embone kara nao randa nyingi. 12 Dopa pilyamo dokona emba anjokorape embone kara nao randa nyere lao see nalene. Yaka konene lyingi dee oma sinyanana malyilyaminyipa kamenge pao palengepe dolapo suu pyao yuu gii lapo namwa see nao karo koo eparamo dokopa mee walu lao oma yakape ingyuo randa nyerama.

<- EKELESIYASITISI 8EKELESIYASITISI 10 ->