APOSELENA YULU 4

Juu Akali Mupwa Dupwa Pita Jonepa Kando Kambuyanda Pyuo Leyami

1 Pita Jonepame pii ene lao kareyambinyi dokopa purisi akali dupwape tembole anda yanda singi mupwa rapu pyuo kareyamo dokope Satyusi akali dupwape nakamba kareyambinyi dokona epapala, 2 nakambame wambu dupwa mana lamaiyuo Yesu lopo epeya dokona wambu lopo eparama ingilyamo lao kareyambi doko sepala imbwuayami. 3 Imbwuapala nakamba puu maiyapala lanyuo pao yuu kwuayasa rakya kambuyanda pyuo larama lao karapusi anda dokona mee pyambuyami. 4 Dopa piyaminyipape wambu malu pii soo kareyaminyi dokona kinyilyamo lao sepala Yesu mona maiyami. Dokona wamba kareyami dokona enakana sukusa pao konda pyuo peteyami akali peparae akalisa pao kingi paki daako ama malu wakasa (5,000) ingiya.

5 Dokona yangama dokopa nakamana rapu pingi akali dupwape kamongo dupwape, Mawa Pii mana lenge dupwape Jerusaleme dokona epo sukusa sukusa pyuo, 6 Purisi akali mupwa Anasa lenge dokomoo Kayapasa Jone Alekesandamoo purisi mupwana ree palu dupwa peparae opetae epo role pyao peteyami. 7 Pisipala nakamame akali dolapo sukusa pisiyami. Pisipala, Apinya porai renge raa lasi dokome panda apinya kingi lapala dopa pimbi? lao piso siyami. 8 Dokopa Pita banya monarena Imambu Poo Pyasi palyuo simbuyamopa dopa lao lamaiya. Wambunya rapu pingi dupwamoo Isaraele kamongo dupwamoo, 9 akali kimbu kwaenge doko baa elya pisi karamo dokona lao aki rengendeme baa mee karase lao epapu nambwa kando kambuyanda pyuo letamipi? 10 Renge dokona lao nakama peparaepe Isaraele wambu peparae dupwape selapa lao langilyu. Yesu Koraisa Nasarete range dokona kingi dokome baa mee ingyapyasa pilyamo. Yesu nakamame isa mamandona pyao palyiyaminyipa baa kumuo paleyamopa Anatumi lete minyalyuo nyiyamopa baame akali dake nakamana lenge kambu dokona karamo doko pyuo nyipyamosa mee ingilyamo. 11 Buku Baepolena pii lao dokopa, Akali kana anda pyuo kareyami dupwame kana mende koo ingilyamo lao suu pyapala nembeyami. Enakana kana doko anda donge dokona mupwa ingyuo epo siya doko suu pyao nakamame Yesu ramanyi nembeyami doko baa epapu mupwa ingyuo karamo. 12 Banya kingi dokomeoko iki isa wambumi lete wai pyao parami. Kingi wakale wakale dupwa laminyipape namwa Yesunya kingi dokome iki letena renge kando nyerama leyambi.

13 Dokopa Pita Jonepa sukuli yulu soo gisa napala nakamba mee akali karo eŋa nembo leyambi doko kandapala nakama ayaka leyami. Lapala nakamba Yesu role pyao karengendelyamo lao kandeyami. 14 Dopa lao kandeyaminyipape akali kimbu kwaeyamo elya pisi doko nakamba role pyao kareyami doko kandapala akema larami ingya naya. 15 Ingya nayamopa akali dusipa wato lao peteyami anda doko yaki nyuo kamanda pena lapala nakama range sukusa wato lao, Akali dolapo apa pimane? leyami. 16 Lapala, Nakamba keta renge palipyamo yulu andake lasaka pyuo pimbi doko panembena sipyamopa Jerusaleme wambu peparae kandelyaminyi dokona namwa dopa pii nambi larama ingya nalyamo. 17 Ingya napyamopape pii doko kama neta raeya nana lao akali dolapo Yesunya kingi lao wambu mendali dee kamba lamaiya nana lao lamanale leyami. 18 Dopa lapala nakamba epena lapala Yesunya kingi laope dee kamba pii lao mana laa nalu nao nana laope lamaiyuokondali piyami.

19 Dopa leyaminyipape Pita Jonepa dopa lao isingi leyambi. Anatunya lenge kambu dokona nambwame banya pii kaepala nakamana pii seramba ramo doko rolae panda daa lao nakama rangeme suu pyalapape. 20 Dokona lao nambwame angi kando siyamba dokona laa naramba ingya nalyamo leyambi. 21 Dokopa nakamame nakamba kaena lao dee kamba pyalana pipala aki rengendena nakamba puu mairama lao pii angi larami ingya naya. Mee wambu dupwa imbwuarami lao suu pyapala nakamba kanjakala mee pena leyami. Wambu dupwa peparaeme Anatu akali pyuo nyipyaŋa lao baa lakando kareyaminyisa saka nayami. 22 Akali kimbu kwaeyamo doko baa akali andapaende ee kana akalisa pao akalisa kisima kareyamopa mee ingiya.

Anatu Baame Nakama Porainya Pyambunya Lao Ateŋa Leyami

23 Nakamba mokoyami dokopa nakamba nakambana puu minyingi peteyami dokona papala purisi akali mupwa dusipamoo kamongo dupwamoo nakamba kando lamaiyami pii doko lamaiyuo pakana palyuo lao kareyami. 24 Lamaiyuo pakana palyiyami pii doko sepala nakamame mona mendaki palyapala pii ketae palyuo Anatu kando dopa pyuo lamaiyami. Kamongo Mupwa, embame yake yuupi ipwa kotape dee bange peparae dupwa opetaepe pyuo wasiipya. 25 Emba Imambu Poo Pyasi dokome namwana rakange Dapiti embena yulu pingi akali doko pyongo pyao lamainyipa dopa leya.

Wambu rara wakale dupwa akipamo nakama imbumi kumapala

yanda pii kopyali dupwa lao kareyamisi?

26 Yuunya kamongo akali dupwame

wato nengyango lapala Kamongo dokonape

dee Koraisa dokopa kando yanda pyala peyami.

27 Doko suu pyao embena Yulu Pingi akali poo pyasi Yesu emba rombo palyii doko yuu dakena wambu dupwame malu palyuo nengyango lao kareyami. Erotemoo Pondiasa Pailatemoo wambu rara wakale dupwape Isaraele wambu dupwape nakama mendakinya palyuo, 28 embame porai wakasa karenge dokome yulu pirami dupwa wambo suu piinyili pyuo kata dokonako palyuo mee kamenge wato leyami. 29 Dopa pyuo karapala epapu namwa pyalana pyuo karami doko Kamongo emba kandape. Kandapala embame namwa embena yulu pingi akali dupwa porainyi pyambwarenepa eŋa pyapala lamaimanale. 30 Embena Yulu Pyakamaingi akali poo pyasi Yesu dokona kingi larama dokopa emba kingi pyasinju lapala wambu pyuo nyuo yulu andake wambumi kanda nange dupwa kongwalu palyuo pyuo karakape.

31 Nakama dopa lao ateŋa lao oteyaminyi dokopa elyambu pyuo peteyaminyi dokona yuusili minyiya. Dokopa Imambu Poo Pyasi nakama keta palyuo simbuyamosa nakama peparae eŋa pyapala Anatunya pii lao kareyami.

Kurisene Wambu Dupwame Nakamana Bange Peparae Nyuo Mendakiyami

32 Wambu dupwa Yesu kapa ingingi lao suu pyao mona maipala peteyami dupwame suu pingi mendaki palyuo yalya kando peteyami. Nakamana bange dupwa nambana iki lao suu pyaa nayami. Bange dupwa pyasapala wambu peparaena ingyuo silyamo lao suu piyami. 33 Dokopa aposele dupwame Kamongo Yesu lopo epeyamo kandeyama lao porayapala leyami. Dokopa nakama peparae ama elyape mee keyange ingyuo kareyami. 34-35 Dokopa nakamana yuu panda dupwape anda dupwape ropo pyao kana nyepala minyuo aposele dupwana kimbu siyamo dokona reteyami. Reteyaminyi dokopa nakama wambu lapo aeya nayamo kareyaminyili pyuo mokwa soo maiyami. Dokona mendali aeya nayamo kara naya.

36 Dopa pyuo piyaminyipa akali Josepe baa Lipae rara yuu Saiporasa range doko (aposele dupwame baa kando Banapasa leyami. Kingi doko ambeambe kiso lengena ikinyingi suu pyao leyami.) 37 Akali dokome banya yuu doko ropo pyapala kana nyepala minyuo aposele dupwana kimbu siyamo dokona pao reteya.

<- APOSELENA YULU 3 APOSELENA YULU 5 ->