2
Imambu Poo Pyasi Wambu Keta
Epo Maralyiya
1 Yuu Pendekosa pyaka siyamo dokopa nakama peparae yuu mendakinya role pyao peteyami.
2 Dokopa pii mende porambaiye dopale poo lao yake dokona piso epeyamo siyami. Epo andakare peteyaminyi dokona lao buu minyiya.
3 Dokopa isare kekenge dopale lapo dupwa pano epo nakama peparaena yanenge keta wakale wakale rao siya.
4 Dokopa nakama peparae Imambu Poo Pyasi palyuo simbuya. Simbwapala Imambu dokome renge kuiyuo leyamuli pyuo pii rara wakale leyami.
5 Gii dokopa Juu wambu Anatu suu pyao karenge yuu wakale wakale range dupwa Jerusaleme dokona kata londe epapala kareyami. 6 Kareyami dupwame aposele dupwa pii wakale wakale leyami doko sepala epo buu minyiyami. Dokopa pii wakale wakale lao kimbu siyamisa wambu dupwa pii range lenge dokome dopa lalyamo lao kapa siyami. Sepala apa pipala pilyamo lao saka nayami. 7 Dokopa mona nembo ayaka lao karo dopa leyami. Pii dopa lao karaminyi dupwa nakama peparae yuu Galili range daase? 8 Apa pipala namwa range pii lenge dokona palyuo wakale laminyi silyamano kandese? leyami. 9 Yuu Patia range akalipi Mitia akalipi Ilama akalipi karamano. Yuu Mesopotemiape yuu Jutia yuu Kapatosia yuu Pondasa yuu Esia 10 yuu Pitisia yuu Pambilia yuu Isipi yuu Lipia pakirena Sairini lao singipi yuu dupwana palenge wambu dupwa karamano leyami. Yuu Orome dokona palenge Juu wambu angi dupwape dee Juu rara daa Juu wambunya misi pii soo nyingi dupwa opetae Jerusaleme dokona epapala upunili ingyuo karamano. 11 Kiriti akalipi Arapia akalipi dupwa karamano. Namwa yuu muu wakale wakale range dupwa nakama Anatunya yulu andake dupwana lao pii namwana lenge dopale ingyuo wakale wakale lamisa silyamano leyami. 12 Dopa lao karo dokopa nakama peparae mona nembo apa pipala pilyamo lao saka napala nakama lao yulu doko aki rengedeme pilyamo? leyami. 13 Dopa leyaminyipape lapo dupwa giyalya giyana pyuo pii doko soo nembo kareyami. Waene ipwange enenge nao pyoko pyoko lapala kyawa sisingi bolombalo lapyasa letaminyi leyami.
Pita Baame Pii Andake Leya
14 Dopa leyaminyipape Pitamoo aposele akali akalisa ipisu mendaki kareyami dupwamoo sipureyaminyipa Pita baa pii ketae palyuo wambu dupwa boo pyao lamaiya. Yangonemoo nakama Juu akali dupwape dee Jerusaleme palenge peparaepe namba pii larono dupwa kale yukupala selapa leya. 15 Akali dapwa waene ipwange naminyi kyawa sisingi bolombalo lalamo lao suu pyalaminyi doko daa. Wamba yangama dokopa dopa pii nange kandale. 16 Pii nalyamopape Anatumi poropeta akali Joele leyamuli pyuo epapu pyaka silya kande. Joele dopa leya.
17 Anatu dopa letamo. Yuu gii lumwa piramo dokopa
nambana Imambu wambu dupwa peparaena maralyinya lao mokwa soo mairu.
Dokopa nakamana wanenge ikinyingipi dupwame nambana pii nolako larami.
Nakamana wanyane akali dupwa pii repa repa pyuo kandarami.
Nakamana alemo dupwa kombeya pirami.
18 Kinyi, dopa piramo yuu gii dusipana
nambana kendemande enda akalipi keta
nambana Imambu maralyinya lao mokwa soo mairu.
Dokopa nakama nambana pii nolakao lao kararami.
19 Dokopa yake dulu yulu andake wambu dupwame kando yamarangwarami dopale pyuo,
isa yuu dokona wambu kandena lao yulu andake lapo lasaka pyuo piru.
Ranjamape isarepe sukwa puupae lara dokope dusipa kandena lao lasaka piru.
20 Neta doko iminjo rali pira.
Kana doko ranjama ingyara.
Wambo dopa piramopa enakana Kamongona yuu gii doko pyaka sera.
21 Dokopa mendeme Kamongona kingi lapala baa lete wai pyao nyakapili lao lara ramo doko,
baa nyiso pyuo nyera.
Pii dopa leya Joeleme.
22 Nakama Isaraele akali dupwa pii dake selapape. Anatumi Yesu Nasarete range doko angi rombo palyiyalyamo lao selapape lao yulu andake lapo wambu dupwame kando yamarangwarami dopale kandalapape lao renge kuiyuo lasaka piyamopa Yesu keta nakama peteyami dokona sukusa piyamopa range silyaminyi. 23 Anatumi wambo suu piyamuli pyuo nakama Yesu pyao kumakalapape lao jiya. Nakamame baa nyepala lowa see nange wambu dupwa maiyaminyipa nakamame isa mamandona pyao palyiyami. 24 Dopa piyaminyipape Yesu baa mee kumuo pali nara ingiyamopa Anatumi kumunginya randa dupwa ramanyi yaki nyepala baa minyalyuo nyiya. 25 Dokona lao Dapitimi baa suu pyao dopa leya.
Kamongo doko nambana lenge kambu dokona karalu kareyamopa kandeyo.
Namba monarena yamarangwa napipi lao
Anatu baa nambana kingi rolaerename karakalyamo.
26 Dokona namba mona anda pyakalyuo pyao kambu dokome
rae maingi pii dupwa lao kareyo.
Namba isa akali kumuo penge doŋo
embame nambana imambu doko
kyawa minyuo kararenepa
27 wambu kumasi palenge dokona nambana imambu doko paka nara dokona mona kare kare karo,
embena akali poo pyasi doko rumbya napipi lare ingilyamo.
28 Embame lete penge kata doko lasaka pii kande
embame namba repeta karakarenepa raeme kumaro
leya.
29 Yangonemoo namwana rakange kyawa Dapiti baa kumuyamopa malu piyami doko namwa soo gisilyamano. Banya malu anda doko dae silyamo dokona pii mende pali nalyamo. 30 Baa poropeta akali pii nolako lenge dokome Anatumi baa kando, Embena ree palu dokona mende embena kiŋi yulu pyuo karena lao rombo palyaro lao langyuo kaelyo, lamaiyamo pii doko soo gisapala 31 Anatumi Koraisa nyisapala dopa pira lao wambo sepala baa pii doloma rangesa lao laa naya. Koraisa baa lopo neta para doko sepala baasa kando pii mende leya.
Wambu kumasi palenge dokona
kumasi palena lapala kaeya naya.
Banya yanenge kakapange mee rumbya naya leya.
32 Yesu doko Anatumi lopo nyiya doko namwa peparaeme kandapala lao karamano. 33 Baa lopo epapala Anatunya kingi rolaerename nyiyamo dokopa Rakangeme Imambu Poo Pyasi nyera lao kaeyamo doko nyiya. Nyepala namwa keta mokwa soo jipyamopa poo lao ipyamosa pilyamo doko kandelyaminyi. 34 Dapiti yake dokona range pulyuo paa naya. Baa rangesa lao dopa leya.
Kamongo dokome nambana Kamongo lamaiyuo,
Nambana kingi rolaerename pisipi.
35 Pisirinyipa emba kando nekyambuli ingyuo karaminyi dupwa
embena kimbu dokome kalyare lao nyuo isa palyakaro,
leya.
36 Nakamame Yesu isa mamandona pyao palyiyami dokoko Anatumi baa Kamongo Koraisa ingyuo karena lao rombo palyiya doko nakama Isaraele wambu dupwa peparae soo gisalapape.
37 Pitame dopa pyuo leyamo dokopa banya pii doko nakamana mona anda piya. Nakama elyapala kondome kumuo kareyami. Dokopa nakamame Pitamoo aposele menge dupwa opetae piso soo, Yangonemoo namwa apa pirama? leyami.
38 Dokopa Pitame nakama lamaiyuo dopa leya. Nakamame mona enenge palyapala Yesu Koraisana kingi dokona lao nakamana koo dupwa Anatumi nyuo kame sakapyali lao suu pyapala bapitisimo nyelapape. Dokopa nakama Imambu Poo Pyasi jeramo nyerami leya. 39 Dokona lao Anatumi Imambu Poo Pyasi doko jero lao kaeyapya pii doko nakamasa kando laowako nakamana wane wanakepe wambu menge nanesa karaminyi dupwa opetaesa lao wambu baame sukusa ipupwape laramo dupwa peparaena palyuo leyaŋa, leya Pitame.
40 Pitame pii londe lao pii renge wakale wakale dupwana kata wapuo lamaiyuo, Nakama dae wambu yulu koo pyuo karaminyi dupwa yaki nyepala lete wai pyao ipupwape leya. 41 Leyamopa yuu gii dokopa wambu akalisa rema daako ama malu wakasa (3,000) banya pii soo nyepala bapitisimo nyuo sukusa epeyami. 42 Dokopa nakamame aposele dupwana mana pii sokondali pyuo nenge yalya kando nao ateŋa lao pyuo peteyami.
Kurisene Wambu Yalya Kando Kareyami
43 Dokopa Anatumi siki nyiyamopa aposele dupwame yulu malu wambu dupwame kando yamarangwarami dopale pyuo lasaka pyuo kareyami dokopa wambu peparae monarena pakayami.
44 Dokopa Yesu kapa ingingi lao suu pyao mona maiyuo kareyami wambu dupwame elyambu pyuo pisipala nakama rangena bange dupwa peparae wambu peparaena lao reteyami.
45 Dopa pyuo yuu andape bange reteyami dupwa ropo pyao kana nyepala wambu aeya nayamo kareyaminyili pyuo mokwa soo maiyami.
46 Nakama yuu peparae kaeya nao tembole anda dokona role pyapeta pao nakamana anda dupwana borete nyuo kau lao nao mona karo anjiki pyuo kareyami.
47 Nakamame Anatu lakando mee wambu dupwame nakama kando rae maiyaminyipa kareyami. Dokopa yuu yangeyamo yaka lao Kamongome suu piyamuli pyuo wambu lapo lete wai pyao nyepapu piyamopa nakama kareyami dokona konda pipa piya.
<- APOSELENA YULU 1APOSELENA YULU 3 ->
