1 Dapiti dee kamba mendepa Isaraele yanda singi dupwana akali yanda soo oto pingi dupwa yeelyo nyuo pao akali taosande akalisa rema (30,000) nyiya. 2 Doko pipala Dapitimi akali dusipa lanyuo yuu taone Bala lenge yuu Juta dokona singi dokona Kamongona Kana Minyuo Lalu Lao Lenge Pii Palenge Bokote doko nyela peyami. Nakamame bokote doko Kamongo Porai Wakasa dokona lenge. Bokote ketae dokona aŋala yale wasisi lama karenge. Dokopa Kamongona petenge isa doko aŋala dolapona ketaerena singi. 3 Akali Apinatapena anda yuu kyau dokona karenge dokona siyamo nyepala epo uliuli mena oseme ipyuo minyuo penge enenge dokona reteyami. Dokopa akali Usa Aiyopa Apinatapena ikinyingi dolapo uliuli doko minyuo peyambi. 4 Aiyo dokome uliuli ipyuo peyamo dokona wambako peya. 5 Dokopa uliuli ipyuo peyamo dokona Dapitimoo dee Isaraele wambu peparaepe rae maiyuo kenane andake pyao pyakalyuo pyao Anatunya kingi ketae pyambuo peyami. Dopa pyuo nakamame rambyalu lao kurulu lao lakuli pyao isa lomasi doo doo lao gita pyao peyami.

6 Pao akali Nakonena yuu nenge witi pyao injingi mare dokona epeyami. Dokona mena bulamakao yale kingi okose lenge dolapo lukumapala pao palinya piyambisa akali Usa baame kingi pyambwapala Anatunya Kana Minyuo Lalu Lenge Pii Palenge Bokote doko minyareya. 7 Doko Usame Kana Minyuo Lalu Lao Lenge Pii Palenge Bokote doko angi mende daaŋa lao suu pyao minyandeyasa dokopako aopa Kamongo dokome imbwuapala baa pyao kumuya. Dopa piyasa Usa baa yuu dokona Kana Minyuo Lalu Lao Lenge Pii Palenge Bokote siyamo dokona repeta kumuya. 8 Dokona yuu doko kingi Perese Usa lenge. Renge doko Kamongome Usa randa maiya lao lenge. Kamongo dokome imbu singi nyepala Usa baa randa maiyasa Dapiti baa ama wakasa imbwaya.

9 Enakana Dapiti baame Kamongo doko kando pakapala lao, Epapu apa pyuo nambame Kamongona Kana Minyuo Lalu Lao Lenge Pii Palenge Bokote doko nyuo minyuo parose? leya. 10 Lapala Dapiti bokote doko nyuo minyuo banya yuu taone Jerusaleme dokona paa naro, leya. Baame Kamongona Kana Minyuo Lalu Lao Lenge Pii Palenge Bokote doko nyepala Jerusaleme kata penge doko yaki nyepala yuu taone Gati range akali Opetitome lenge dokona anda lanyuo peya. 11 Akali Opetitomena anda dokona Kamongona Kana Minyuo Lalu Lao Lenge Pii Palenge Bokote doko siyamo pao kana rema ingiya. Dopa piyamo dokopa Kamongome Opetitome baape banya ree palu dupwape elyape keta pisinyi pyambuya.

12 Kamongona Kana Minyuo Lalu Lao Lenge Pii Palenge Bokote doko akali Opetitomena anda siya dokome Opetitome baape banya ree palu dupwape dee banya bange dupwanape Kamongome elyape keta pisilyamo leyami doko Dapitimi siya. Dokona lao Dapitimi Kamongona Kana Minyuo Lalu Lao Lenge Pii Palenge Bokote doko akali Opetitomena anda siyamo doko nyuo minyuo Jerusaleme panya wambu peparae rae wakasa maiyami. 13 Dokopa akali dupwame bokote doko soo kata nyuo peyami. Pao yuu kuki lama kata nyuo papeyaminyi dokopa Dapitimi karena, leya. Lapala Dapitimi Kamongo doko mena bulamakao kali mendepa dee mena bulamakao yakane rondo lasi mendepa pyao kiso maiya. 14 Dapiti baa komau ama keyange mende bole bale lao wapupala banya porai renge peparaeme Kamongo lakando kenane pyao rae maiyuo wamya lyuo kareya. 15 Dopa pyuo Dapiti baape Isaraele wambu peparaepe pii poraiyuo lao rae maiyuo bikuli pii poo lao Kamongona Kana Minyuo Lalu Lao Lenge Pii Palenge Bokote doko nyuo minyuo Jerusaleme peyami.

16 Yuu taone dokona bokote doko minyuo sukusa dokona peyami dokopa kiŋi Dapiti baa rae maiyuo wamya lyuo malya pyao Anatunya kingi ketae pyambuo peya. Dokopa Solena wanenge Maikele lenge dokome Dapiti doo piyamo doko windowa kata kandapala epe kando awa naya. 17 Nakamame bokote doko minyuo papala Dapitimi kapa seraŋa lao komau anda piyamo dokona reteyami. Retapala enakana baame mena pyao kiso dee Kamongopa nakamape malu palyuo yalya kando piso maiyuo piyami. 18 Dopa pyuo baame mena pyao kiso maiyuo otapala dokopa baame Kamongona kingi lao wambu dupwa elyape keta pisiya. 19 Dopa pipala Dapitimi wambu peparae nenge mokwa soo maiya. Baame Isaraele enda akalipi dupwa mendaki mendaki lao nenge borete mendaki larapu maiyuo mena minju isarena kisasi mendaki lao maiyuo dee isa girapo jingi yando dupwa maiyuo piya. Dokopa wambu peparae anda peyami.

20 Dokopa enakana Dapiti baa banya ree palu dupwa yako lao anda peya. Dokopa enda Maikele doko baa Dapiti kandala epeya. Epapala lao, Isaraele wambunya kiŋi doko, epapu baa range kingi ketae nembo karo ipwamo, leya. Banya akali mupwa dupwana kendemande wanake dupwana lenge kambu dokona elya pali nao pyaloko lalya lana pyuo kopyali ingyuo karalamo, leya.

21 Dokopa Dapitimi isingi lao, Namba doo pipunu dupwa Kamongona kingi ketae nembo pipu. Embena rakanepe dee embena ree palupi dupwana panda nyuo namba banya Isaraele wambu peparaena kiŋi ingyuo rombo palyiya. Dokona namba rae maiyuo wamya lyuo pyakalyuo pyao Kamongona kingi ketae nembo ene pyuoko paro ingilyamo. 22 Dopa pyuo namba kamame elya renge nyeronopa namba kamame isa paronopape embame namba mende daaŋa lao suu pyarenepape wanake doo letene dusipame namba mee mende ulipilinyi lao suu pyarami, leya.

23 Maikele Solena wanenge doko wane wanakepe mende manja nao mee petenge.

<- 2 SAMYUELE 52 SAMYUELE 7 ->