22
Dapitimi Wini Pyuo Kenane Piya
1 Kamongo baame Dapiti banya nyisu petenge akali Solemoo dee akali lapo dupwa keta baa kyawa lete nyiyamo dokona kenane dake Dapitimi Kamongo doko kando piya.
2 Kamongo doko nambana kyawa lete nyuo alya isa ingingi akali.
Baa kame porai dopale ingyuo namba kako pyaro karenge.
3 Nambana Anatu doko nambana alya minyingi akali dokona
namba baa keta kyawa lete epelyo.
Baame konambe dopale ingyuo namba alya minyingi.
Dee baa nambana lete wai pyao nyingi akali
wambu dupwame namba pyalana randa jilyaminyi dokopa baame namba keta alya minyuo nyisingi.
4 Nambame Kamongo doko kee letono dokopa
baame nambana nyisu petenge dupwa keta kyawa lete nyuo nyisingi.
Dokona Kamongo lakandamanale.
5 Ipwa kota kasakole minyuo ipwa marengena epenge dopale ingyuo kumungi renge dokome namba nyuo sukusa pyambuya.
Dee ipwa kasakole minyingi dopaleko ingyuo randa renge dupwame namba nyuo bwuakiki piya.
6 Kumungi rengena randa dokome namba keta kako piya.
Dokopa malu andana kone dokome nambana lao makaro siya.
7 Dokopa namba randa nao karo Kamongo doko kee leyo.
Nambame nambana Anatu doko nyisinya lao kee leyo.
Dokopa banya tembole anda dokona karo baame nambana pii soo
namba nyisinya lao ee leyono doko siya.
8 Dokopa yuu dupwa pyuku pyuku lao romo romo piya.
Anatu baa imbwayamosa
yake doko ama romo romo piya.
9 Dokopa banya gyaa kata dokona isare sukwa potemo epeya.
Dee isare rao uliyapu nyingi lelenge dupwape dee sungwa lengya dupwape banya nenge kata dokona epeya.
10 Dokopa baame yake doko nyuo karalyapala
banya kimbu isarename kopa pupuri rau dokopa role pyapeta baa isa epeya.
11 Baa aŋala dokona mata dokona piso isa epeya.
Epapala baa poo raiyana papake dopale ingyuo dokona piso kata papiya.
12 Baa range iminjingi dokome yambe piya.
Dopa pipala baa kopa romende ipwa malu petenge dupwame baa keta piso kako piya.
13 Baa peteyamo dokona yuu pele pipala isareme rasi sungwa lengya dupwa lele pyao soo ketae peya.
14 Dokopa Kamongo dokome yake dokona piso yuu gala leya.
Leyamo dokopa Anatu Porai Wakasa dokona pii doko wambu peparaeme siyami.
15 Akali mendeme banya nyisu petenge dupwa wanga dupwame pingi dokopa nakama ralo penge doko suu pyao
yuu pele piyamo dokopa banya nyisu petenge dupwa wakale wakale pyuo makando peyami.
16 Dokopa Kamongo dokome banya nyisu petenge dupwa kando mena nalena pingi ingyuo imbu singi manjo pii poraiyuo lao piyamopa
banya pii doko poo raiya andakeme bange minyalya minyana pingi doko suu pyao
ipwa kota pete isa donorename dupwa epo maro leya.
Dee yuu dokona isa susa pingi bange dupwa mee epo panembena siya.
17 Kamongo dokome yake panda piso isa epapala namba nyiya.
Baame namba ipwa koko dupwana paleyono dokopa nyisa ipyuo nyiya.
18 Baame nambana nyisu petenge ama porai palenge dupwa keta baame kiiramo nyiya.
Dee lapome namba awa nayami dupwa keta opetaeko kiiramo nyiya.
Nakama ama porai wakasa dokome namba anamasi minyaro ingya nalyamo.
19 Namba randa nyuo kareyono dokopa nakamame namba minyarapala nyiyami.
Dopa piyaminyipape Kamongo dokome namba alya isa ingyuo kyawa lete nyiya.
20 Nambana randa epeya dupwana baame namba neta nyuo nyisiya.
Baame nambapa rae maiyuo epe kandeya dokome namba kyawa lete nyuo nyisiya.
21 Namba rolae pingi dokona Kamongome namba yano pyakange.
Namba koo mende pii nange dokona baame namba elyape keta pisingi.
22 Nambame Kamongona lowa dupwa warombo singi.
Nambame nambana Anatu kando mata maiyuo kapu kyuo paa nange.
23 Nambame banya lowa dupwana peparae letamuli pyuo kando minyuo pyuo karenge.
Banya mawa pii dupwana namba kamba lao warombo see nangende daa.
24 Nambame koo mende pisarono kando lao nyokonyuo karenge
dee namba koo mende pii nange doko baa silyamo.
25 Dokona lao namba rolae pingi dokome baame namba yano jingi.
Renge doko baame namba keta koo mende pali nange doko baame soo gisingi.
26 Kamongo wamba lapome emba poraiyuo suu pyao yaki nyii nao karenge dupwa kando
embame nakama keta lalu lao leeneli pyuo poraiyuo suu pyaoko karenge.
Dee wambu lapo kopetame pii nao kata rolae dokona iki pyuo karenge dupwa kando embame keyangeko pingi.
27 Wambu mendeme poo pyasi ingyuo karenge ramo doko keta embame baa embena poo pyasi renge doko lasaka pingi.
Dopa pinginyipape wambu mende yulu koo pingi ramo doko keta embame yano pyao randa maingi.
28 Embame wambu range kuki ingyuo inyimungu karenge dupwa kyawa lete nyingi.
Dopa pinginyipape wambu range mupwa lao suu pyao ulipili ingingi dupwa kando embame nyuo isa palyingi.
29 Emba Kamongo doko, Nambana kendapulinya mendeke ingyuo karenge.
Dee embame namba keta iminjingi dupwa nyuo nembakapala yanganyi retakange.
30 Embame nambana nyisu petenge dupwa pyaa lao namba porainya renge jingi.
Dee embame namba porainya renge jingi dokopa nyisu petenge dupwana yuu taone dupwana kana kame dupwa mee pyao lalyuo kokwa soo nembenge.
31 Anatu doko, banya yulu pipyamo dupwa ama mondo lao rolae ingyuo pelyamo.
Dee baame mende lalu lao lapyamo pii dupwa kinyi angingyuo pelyamo.
Dopa pyuo wambu lapo baame kyawa minyinya lao koto parami ramo dupwa keta
baa konambe dopale ingyara.
32 Kamongo baa iki doko Anatu.
Dee Anatu baako nambwana nee isa ingyaro karamo.
33 Anatu doko namba porainyi pyambuo
namba anja panda anja dupwana penge dokopa iso karenge.
34 Baame namba mena diya lenge lukuma nao kata papingi dopale ingyuo papi lao pingi.
Dee namba yuu kyau dupwana kata papyuo karenge dokopa baame namba nyisingiko.
35 Doko yanda enekongo porai dupwa minyuo yanda piriŋi lapala
baame namba yanda dupwana mana langingi.
36 O Kamongo, Embame namba alya isa ingyuo karo lete wai pyao nyingi.
Embena nyisapinyi renge dokome wambu peparaena lenge kambu dokona nambana kingi doko ando pelyamo.
37 Dopa pipala embame nambana yanda pimwai dupwame minyarapala nyisasarami lao iso karapinyipa
namba isa paa nange.
38 Nambame nyisu petenge dupwa peta ralyuo pyapala anamasi minyingi.
Nambame kaeya napala nakama pyao kokwa soo nembapala dokopa kaenge.
39 Dopa pipala nambame nakama pyao isa palyingi dokopa nakama sipuro epa nange.
Nakama nambana kimbu isarena kumasi singi.
40 Embame yandana namba porainya renge jingi.
Nambame nyisu petenge dupwa pipya pyao anamasi minyare lao nyisingi.
41 Embame nambana nyisu petenge dupwa namba kando makando pena lao pingi.
Dokopa wambu namba epe kanda nange dupwa nambame pyao kokwa soo nembenge.
42 Dokopa nakama wambu lapome nyisamili lao kotelyaminyipa mendemepe nakama kyawa lete nyuo nyisa nange.
Nakamame Kamongo doko nyisinya lao kee letaminyipape baame nakama isingi yano pyaa nange.
43 Nambame nakama pyao inji ranji pingi dokopa nakama sinjimu dopale ingingi.
Dopa pipala nambame nakama katana wara silyamopa kalyuo papingi dopale ingyuo isa palyingi.
44 Embame wambu namba kando kamba lao mata joo kareyaminyi dupwa keta namba kyawa lete nyuo nyisingi.
Embame wambu rara peparae keta namba kiŋi kara lao rombo palyapala iso karenge.
Wambu namba kando see nange dupwame nambana yulu pyakalyaminyi.
45 Dopa pipala wambu yuu wakale range dupwame nambana lenge kambusa pangu singi.
Nakamame nambana pii sepala dokopa warombo singi.
46 Nakamana paka nange renge doko isa penge.
Dopa pilyamopa nakamana anda porai dokona piso walu walu lao nyisa epo nambana arapunya role pyao karala epenge.
47 Kamongo doko lete karalu karenge.
Baa nambana nee isa ingyuo karenge doko lakandena.
Anatu porainya renge palenge dokome namba lete wai pyao nyingi dokona kingi ketae pena lao leto.
48 Nambame nyisu petenge dupwa isa palyuo anamasi minyare lao nyisingi.
Nyisapala baame wambu rara lapo dupwa namba isarena karena lao pingi.
49 Nambana nyisu petenge dupwa keta baame nyiso neta nyingi.
Kamongo nambana nyisu petenge dupwa isa palyuo anamasi minya lao nyisingi.
Embame namba alya isa minyuo karapinyipa akali wambu pyao randa maingi dupwame namba pyao kumaka nalyaminyi.
50 Dokona lao wambu rara peparaena lenge kambusa karo nambame emba lakandelyo.
Nambame emba kando lakando kenane pilyu.
51 Namba banya kiŋi Dapiti dokome nyisu petenge dupwa anamasi minyare lao Anatumi porainya renge jingi ingyuo karenge.
Baame namba banya rombo palyiyamo akali doko mona kulisa retenge.
Dopa pipala namba Dapiti ketape dee nambana para pyaramo dupwa ketape mona reto karalu karara.
<- 2 SAMYUELE 212 SAMYUELE 23 ->