2
Dapiti Baa Juta Wambunya Kiŋi Ingiya
1 Dokopa enakana Dapitimi Kamongo piso soo lao, Nambame yuu Juta taone dokona mende iso karala paowase? leya. Dokopa Kamongo dokome isingi lao, Kapa, leya.
Dapitimi kamba piso soo, Yuu taone angi anjukunya pao kararose? leya.
Dokopa Kamongo dokome isingi lao, Emba yuu Eperone dokona palyuo karala pena leya. 2 Leyamosa Dapitimi banya etenge lama dolapo nyepala lanyuo yuu Eperone dokona peya. Enda mende Ainoame lenge yuu Jeserele range dee mende Apikale lenge yuu Kamele range akali Napalena enda waiya. 3 Pao dokopa banya akalipi nakamana ree palupi dupwa minyuo pao yuu Eperone dokonape dee taone repeta singi dupwanape paleyami. 4 Dokopa Juta akali dupwa yuu Eperone epapala Dapiti Juta wambunya kiŋi karena lao rombo palyiyami. Dopa piyami dokopa Dapitimi Jepese wambu yuu Giliate range dupwame Sole baa malu pilyaminyi leyami doko siya. 5 Sepala baa akali lapo wai pii minyuo pena lao nembeya. Nembo lao, Nakamana kiŋi Sole baa ketae nembo rape rape letamano lao banya mondo lao malu piyami dokona Kamongo dokome nakama elyape keta pisinya. 6 Kamongo dokome nakama anjiki pyuo iso karo yaki nyii nana. Nakamame Sole kando keyange piyami dokona nambame opetae nakama kando anjiki pyuo nyiso kararo, leya. 7 Dokona nakamana kiŋi Sole doko kumuya. Dokopa Juta wambu dupwame namba nakamana kiŋi karare lao rombo palyiyami. Dokona nakama bange mende paka napala kandokondali pyuo porai ingyuo karalapape.
2:8—4:12 Akali Apena baame Solena ami dokona mupwa ingyuo kareya. Dopa pyuo karo baame Solena ikinyingi kingi Isiposete lenge baame rara yuu dulurena kareyaminyi dupwana kiŋi ingyuo iso karena leya. Leyamo dokopa yuu dulurena rara wambu dupwa yuu donorena rara wambu dupwa pipya yanda piyami. Yanda pyuo kareyaminyi dokopa nakamame Apenapa Isiposetepa pyao kumakayami. Dokopa Dapiti baa Isaraele wambupi Juta wambupi dupwa peparaena kiŋi ingyuo kareya.