1 Dokopa enakana akali Epesalome baa rangena mename ipyuo uliuli piso paenge mende nyuo dee mena ose lapo nyuo piya. Dee yanda singi akali akalisa kingi paki (50) baa paramo dokona role pyao baa lanyuo parami dupwa nyiyako. 2 Baa wamba kukwa dokopa sipurarapu yuu taone dokona kame kambu dokona karapapu piya. Wambu mendepe dee wambu lamape imbu laiya lapala kote lao kiŋi dokome soo rolena lao epeyami. Dokopa Epesalome baame wambu doo epeyami dupwa kee lapala baame anja range lao piso sepa piya. Dokopa wambu dupwame isingi lao, namba yuu dusa rangeŋe rara dokonaŋa lapa piyami. 3 Dokopa Epesalome baame lao, Embena pii doko rolae ingyuo silyamo. Dokona kiŋi dokome akali mende embena pii sakara doko rombo palya naya, leya. 4 Dokopa Epesalome baame konda pyuo lao, Namba kote singi akali ingyapuli lao suu pyakonda pilyu. Dokona namba dopale karapuli doko wambu mendali pii dopale palipyali soo rolakamirunupa pii dupwa rolasi sipyali, leya. 5 Dokopa akali mendeme Epesalome peteya dokona repeta papala pangu sepa piya dokopa Epesalome banya kingi pyasinju lapala akali doko kupyuo nyepala nyinyi pipa piya. 6 Dokopa Epesalome baame Isaraele peparae kiŋi peteya dokona kote sakana lao epeyaminyi dupwa kando dopa pirapu piya. Dopa pyuo wambunya mona dupwa pyao kui leyasa baa kando mona maiyuo rae wakasa maiyami.

7 Ee kana kisima epo papeyamo dokopa Epesalome baame kiŋi Dapiti kando lao, Kiŋi namba yuu Eperone dokona Kamongo doko kando lalu lao pii leyonoli pyuo piri lao namba puu lape. 8 Namba yuu Gesu yuu Siria dokona singi yuu dokona paleyo dokopa nambame Kamongo kando lalu lao lao, Baame namba yuu Jerusaleme kamba kapu kyuo lanyuo para ramo doko nambame baa yuu Eperone dokona lakandaro, leyo, leya.

9 Dokopa kiŋi dokome baa lamaiyuo lao, Manda rao mona seramo pupi leya dokome Epesalome baa yuu Eperone dokona peya. 10 Dopa pyuo peyamopape baame wai pii minyingi akali lapome Isaraele rara peparae dapa lena lao lamaiyala pena, leya. Nakama bikuli pii poraiyuo ketae laramo siyami kande doko Epesalome baa yuu Eperone dokona kiŋi karamo lalapape lena lao lamainya, leya. 11 Epesalome baame akali andete lama (200) baa role pyao Jerusaleme piso mona epena leya. Dokopa baame mende pinya suu piyamo doko akali dupwa see nayami. 12 Baa mena pyao kiso maiyuo karo dokopa kiŋi Dapitinya dopa pyuo piri dapa pyuo piri lao nyiso lenge akali Ayitopele lenge doko Epesalome baame taone yuu Gaelo dokona nyela pena leya. Dokopa akali Ayitopele lenge doko epeyamopa kiŋi Dapitinya yulu isa nembalana lao yalu pyuo leyaminyi doko ama wakasa ingyuo lao andakiyami. Dopa piyamosa wambu Epesalome kando rae maiyami dupwa malu ingiya.

13 Wai pii minyingi akali mendeme Dapiti dopa lamaiya. Isaraele wambu dupwame Epesalomena pii dokona soo rape rape lao kararama lao lalu lao letaminyi, leya.

14 Dokona lao Dapitimi banya akali mupwa lapo baa role pyao yuu Jerusaleme dokona kareyami dupwa lamaiyuo lao, Namwa akali Epesalome dokome pyaa nana lao range kyawa lete nyelana suu pyapala dokopa yuu gii dakepako yuu mendasa mwua. Mende dee baa dae repe palipala namwa pyao isa palyapala wambu peparae yuu taone dokona petaminyi dupwa pyasaramiŋi yapa mwua, leya.

15 Dokopa nakamame isingi lao, Waa emba kiŋi andake doko, embame aki mende larene dupwana namwame mee pirama, leyami. 16 Dopa leyamisa kiŋi Dapiti baape banya ree palu dupwape dee banya akali mupwa dupwape peparae yuu Jerusaleme yaki nyuo peyami. Papala banya enda lapo konda pyuo nyiyamo akalisame banya yuu andape dupwa isako karena, leya.

17 Lapala kiŋi baape dee wambu peparaepe Jerusaleme yaki nyuo peyami. Pao nakama yuu taone dokona wangu dusa anda mende kareyamo dokona imambu siyami. 18 Dokopa banya akali mupwa dupwa peparae baa peteyamo dokona repeta karapala dokopa akali Keritena rarape dee akali Pilitena rarape epo peyaminyi dupwa kandeyami. Dokopa yuu Gati yanda singi akali andete pakinyamange (600) baa epeyamo dokona moko minyuo epeyami dupwa epo peyaminyi kandeyamiko. 19 Dokopa kiŋi dokome nakamana akali mupwa Itai lenge doko kando lao, Emba akipamo namwa pipya epelese? Kapu kyuo papala kiŋi enenge dokopa pisa pupi. Emba akali yuu wakale range upinili. Wakale dupwame emba embena yuu rangena nyisa nembeyamisa epee kande leya. 20 Emba dae yuu gii kuki lama palyuo karapi dokona nambapa akipamo awali lao mee dupwana papyuo kararambase? Namba anja pelyono lao namba kamame see nalyo. Dokona emba anda kapu kyuo pao dokopa embena akali role pyao epeyami dupwa opetae nyuo lanyuo pupi. Dokopa Kamongo dokome anjiki pyuo keyange ingyuo nakama poraiyuo nyiso rapu pyuo karena leto, leya.

21 Dopa leyamopape Itai baame isingi lao, Emba kiŋi doko, nambame Kamongona kingi dokona lao lalu lao emba kando leto. Emba anja panda anja mendasa parene dupwana yuu peparae namba parambako. Dee emba pyao kumakarami ramo dokopa namba pyao kumakaramiko, leya.

22 Dokopa Dapiti baa lamaiyuo, Kapaŋa. Epapu nakamame mona wambako pena, leya. Dopa leyasa Itai baape banya yanda singi dupwape dee nakamana ree palu wambupi wambo peyami. 23 Dapitimoo banya wambu dupwa peparaepe yuu Jerusaleme yaki nyuo peyaminyi dokopa yuu dokona palenge wambu dupwa ee poraiyuo kaeyo leyami. Dokopa kiŋi doko ipwa kuki Kirone lenge doko yalo peyamo dokopa banya akali dupwa enakana yaloko peyami. Pao yuu muiyane dorena ingyuo peyami.

24 Purisi akali mende Satoko lenge doko dokona kareya. Kareyamo dokona Lipae akali lapo role pyapeta kareyaminyi dupwame Kamongona Kana Minyuo Lalu Lao Lenge Pii Palenge Bokote doko sakaro kareyami. Dokopa bokote doko isa reteyami. Dopa pipala wambu dupwa peparae yuu taone doko yaki nyuo pao oteyami dokopa enakana bokote doko nyepala soo peyami. Purisi akali Apiata lenge baa opetaeko dokona kareya. 25 Dokopa kiŋi dokome akali Satoko doko lamaiyuo lao, Lalu Lao Lenge Pii Palenge Bokote doko nyepala minyuo pao yuu taone dokona retala puu. Kamongo dokome namba kando rae maira ramo doko yuu gii mendepa bokote dokope dee seramo panda dokope kamba kapu kyuo kandala puu lara. 26 Dee baame namba kando rae mai nara ramo doko kapako. Baame namba keta pinya suu pilyamo dupwa pinya, leya. 27 Dee baame Satoko kando lao, Kanda. Embena ikinyi Aimase dokopa dee akali Apiatana ikinyingi Jonatane dokopa nyepala mona kyuu lao seramopa kamba kapu kyuo lanyuo yuu taone dokona pupi. 28 Yuu gii dokopa namba yuu muiyane dokona ipwa yalo penge pona dokona isaro kararono pao embena pii mende namba sepala dokopa kaeyaro, leya. 29 Dokona lao akali Satoko dee Apiatapame Lalu Lao Lenge Pii Palenge Bokote doko soo kamba kapu kyuo Jerusaleme papala kareyambi.

30 Dapiti baa yuu Olipi kyau dokona ee lao pulyuo peya. Baa kimbu suu pii nao kondome kumuo mona rando kyawasi yambe pyapala peya. Wambu lapo baa moko minyuo peyaminyi dupwa opetae dopako pyuo kyawa yambe pyao ee lao pulyuo peyami. 31 Dokopa akali Ayitopele doko akali Epesalome dokome Dapitinya kiŋinya yulu isa nembalana leyamo dokona rae mailyamo lao lamaiyaminyi Dapiti siya. Sepala baame ateŋa lao lao, Kamongo, akali Ayitopele pii dopa pinya dapa pinya laramo dupwa kopyali ingyuo pena lao kyawa sisingi bolombalo lanyi nembape, leya.

32 Dapiti yuu kyau ketae lakandenge panda angi doko kando nyela peyamo dokopa banya mona reto puu minyingi akali Asai lenge yuu Aki range dokome banya komau dupwa minyuo pilyuo awai kyawasinya pyao pipala peteyamo kando nyiya. 33 Kando nyepala Dapitimi baa lamaiyuo lao, Emba namba role pyao epare ramo doko embame namba nyisa nare ingilyamo, leya. 34 Dopa pirinyipape embame namba nyiso yuu taone dokona kapu kyuo papala akali Ayitopele kiŋi doko kando pii dopa pinya dapa pinya lao lenge dupwa pipya pimwaiyuo role karape. Karapala Epesalome lamaiyuo, Emba Kamongo doko. Nambame embena rakanena pii soo yulu pyuo kareyono doko suu pyao epapu nambame embena lao pyakaro, lena leya. 35 Dokopa purisi akali Satoko Apaitapa dokona kararambi lyakande. Dokopa embame kiŋinya anda piso pii serene dupwa peparae kaeya nao akali dolapo lamaipi. 36 Nakamba nakambana ikinyingi Aimase Jonatanepa reto karambinyi dokome emba pii serene dusipa peparae nyuo simu pyao maipala nakambame namba langyala pena lare, leya.

37 Akali Epesalome doko epeyamo dokopa Dapitinya puu minyingi akali Asai doko kapu kyuo yuu taone dokona epeya.

<- 2 SAMYUELE 142 SAMYUELE 16 ->