1 Kiŋi Ayapeme Ilainja baame yulu peparae pyuo mee bange kingi Bealo lenge anatu lao lakandenge poropeta dupwa peparae pyao kumakao piyamo dokona lao banya etenge Jesapele lenge doko lamaiya. 2 Dokopa enda dokome Ilainja peteyamo dokona pii wai nembapala lao, Embame poropeta dupwa pyapi doko suu pyao epapu rakyape mende nambame emba pyaa naro ramo dokopa mee bange anatu dupwame namba kumungi dokona pyambuo pinya, leya. 3 Leyamo pii doko Ilainja soo pakapala baa range kyawa lete nyuo banya kendemande akali doko nyepala pakao yuu Biasipa yuu Juta singi dokona peya.

Papala banya kendemande akali doko dokona karena lapala 4 Ilainja yuu gii mendaki yuu muiyane mendena kata pao kareya. Pao karo isa renge rau leya mendena imambu soo peteya. Piso dokopa baa kumuowane lao suu piya. Pyapala baame ateŋa lao, Kamongo namba keta kenda palamo. Namba kumaro doko kapaŋa. Nambana lete karenge doko nyepe, leya.

5 Lapala baa isa renge dokona luu paleya dokopa aopa aŋala mendeme baa epo minyandapala lenge rapala nenge nena, leya. 6 Leyamosa lenge rapala kandeyamo dokopa kyawa reteya dokona borete mende soo dee pee mendena ipwa kamusi piso piyamo kandeya. Dolapo napala dee kambako luu paleya. 7 Paleyamo dokopa Kamongona aŋala doko yuu lapo ingyuo epo pyalerapala lamaiyuo, Kata parene doko londe ingyasaraŋa lenge rapala nenge ipwape dupwa nena, leya. 8 Dokopa Ilainja lenge rapala nenge ipwape duwpa neya. Nenge neyamo dokome baa kapa sikya pyuo poraiyamopa yuu gii akalisa kisima kata pao karo pao yuu kyau poo pyasi Sainai dokona para ingiyamopa peya. 9 Papala kukwa dokopa kananda mendena pao paleya.

Dokopa aopa Kamongo dokome pii lamaiyuo, Ilainja emba dakena apa pilisi? leya.

10 Ilainjame isingi lao, Kamongo Anatu Porai Wakasa, namba embena yulu keyange pyakange kandale. Dopa pipunupape Isaraele wambu dupwame embena poropeta dupwa pyao kumakao embena tembole andana kiso maingi kana pyare lasi dupwa lalyinyi nembo dee embapa lao pii kana minyuo lalu lao leyaminyi doko kokwa soo pimi dokona namba yeelyo karapunupa pyao kumakamwali lao suu pilyaminyi, leya.

11 Leyamo dokopa Kamongo dokome baa lamaiyuo, lao, Papala nambana lenge kambu dorena yuu kyau dokona karape, leya. Dokopa enakana Kamongome ama poo raiya andake mende peeyamosa yuu kyau dupwa poro lao rali pipala kana dupwa lakao mumu piya. Piyamopape Kamongo baa poo raiya dokona kara naya. Dee enakana poo raiya minyuo oteya dokopa dee yuusili minyiya. Minyiyamopape Kamongo baa yuusili dokona kara naya. 12 Yuusili minyuo otapeyamo dokopa enakana isare reya. Reyamopape Kamongo baa isare dokona kara nayako. Isare rao oteyamo dokopa isa isa pii mende elya kalo leya.

13 Pii doko Ilainja sepala banya komau dokome lenge kambu yambe pyapala kananda kambu konandowame dokona karala peya. Dokopa pii dokome baa lamaiyuo, Ilainja emba dakena apa pyuo karese? leya.

14 Ilainjame isingi lao, Kamongo Anatu Porai Wakasa, namba embena yulu iki pyakange kandale. Dopa pipunupape Isaraele wambu dupwame embena poropeta dupwa pyao kumakao embena tembole andana kiso maingi kana pyare lasi dupwa lalyinyi nembo dee embapa lao pii kana minyuo lalu lao leyami doko kokwa soo pimi dokona namba yeelyo karapunupa pyao kumakamwali lao suu pilyaminyi, leya.

15 Dokopa Kamongome lao, Kapu kyuo yuu Damasakesa repeta yuu muiyane dokona pupi. Papala yuu taone andake dokona sukusa pao akali Aseyele lenge baa Siria wambunya kiŋi ingyuo rombo palyape. 16 Palyapala Nimisinya ikinyingi akali Jiyu baa Isaraele wambunya kiŋi ingyuo rombo palyuo dee Sapatena ikinyingi akali Ilaisa yuu Epolo Meyola range doko opetae poropeta ingyuo embena panda nyeraŋa rombo palyuo pepe. 17 Pipala wambu mendali kiŋi Aseyele dokome randa maiyuo pyao kumaka nara ramo doko kiŋi Jiyumi pyao kumakara. Dee wambu mendali Jiyumi pyaa nara ramo doko Ilaisame pyao kumakara. 18 Dopa piramopape wambu malu (7,000) namba rape rape lao yaki nyii napala isa bange kingi Bealo lenge lakanda nao dee bange kingimi wasisi lakandenge doko nyinyi pii nao karaminyi dupwa yuu Isaraele dokona mee lete petena kaeyaro, leya.

19 Dokopa Ilainja yaki nyuo Ilaisa koto kandala peya. Kandeyamo dokopa mena okese lapo minyuo yuu ape ape pyao kareya. Kareyamo dokona mena okese gurupu akalisa ipisu mendaki wambo pyuo peyaminyipa baa mende enakaya dokopa dokona ape ape pyao peya. Dopa piyamo dokopa Ilainjame banya komau londe doko roko nyepala Ilaisa wapwakamiya. 20 Dokopa Ilaisa banya mena okese dupwa yaki nyepala Ilainja peyamo dokona makando papala lao, Enakana embapa role pyao bonaleŋe. Nambana anyi rakanepe yako lao nyinyi pyuo karena larowale, leya.

Dokopa Ilainjame isingi lao, Kapaŋa nambame emba kaeya laa nalyo. Kapu kyuo pupi, leya. 21 Leyamo dokopa Ilaisa kapu kyuo papala banya mena dupwa piya. Pyapala mena angi dupwa mange dokona isa mamando palenge dokome kisiya. Dopa pipala mena angi kisiyamo dupwa banya wambu dupwa nena lao maiyamopa nakama neyami. Enakana baame Ilainja nyiso yulu piru lao Ilainja peyamuli pyuo peya.