1 JONE Jonena pepa wambo piyamo renge angi lama paleyasa piya. Wambu pepa dake yaka larami dupwa nakama Anatu banya Ikinyingi Yesu Koraisamoo pipya pako pii lao yalya kando petena lao suu pingi doko lao porainyi pyambuo lamaiyuo piya. Lapo pyuo doko mana pii kyai pyuo leyami dupwame Anatupa pako pisirami doko kokwa sesera lapala waso karena repe repe lamaiyuo piya. Isa yuu dake koo ingyuo singi dokona Yesu Anatunya Ikinyingi dokome kapa mee wambu yanenge nyuo kapa kara nara ingingi, leyami. Kyai pyuo mana leyami dupwame lao, Nakama lete wai pyao nyisi wambu dupwa isa yuunya nao piso karo pilyaminyi kata dupwa peparae yaki nyuo kaeyarami ingilyamo, leyami. Lete parami dupwa isa yuunya pii lao nenge rambo lao mona reta naraminyipape dupwana renge mende pali nara lao mana leyami. Kyai pyuo mana leyaminyi dokona Joneme yanda pyuo lao pyao dokopa Yesu Koraisa baa akali isa komba pyao epeya. Dokona wambu mendeme Yesu kapa ingingi lao Anatu mona mairami dupwame wambu yango dupwa opetae dopako pyuo mona retarami ingilyamo lao suu pingi doko paka pyao soo leya. Buku Dakena Pii Palamo Dusipa 1. Pii kanda soo piya 1:1-4 2. Yanga paupau lengepe dee iminjingipi 1:5—2:29 3. Anatunya wane wanakepe Satanena wane wanakepe 3:1-24 4. Kyambo kinyipi 4:1-6 5. Kurisene wambunya yulu angi doko mona retenge 4:7-21 6. Yesu kapa ingingi lao suu pyapala nyuo anamasi minyarama 5:1-21
1Pii Angimi Letena Renge Jingi 1 Yuu wamba kanda soo dokopa mende paleyamo doko namwa siyama lenge dokome kandeyama kandapala kingi dokome minyandeyama doko letena renge pii angi dokona lao pepa pyao retelyamano. 2 Letena renge pii nolakaya. Nolakayamo dokopa namwa kandeyama. Kandapala namwa angi kandeyama lao nakama boo pyao langilyamano. Letena renge kulisa palu palenge Rakane karamo dokona paleya doko namwa kandalapase lao pano nolakaya. 3 Nakama opetae namwa yalya kando pisimwali lao namwa kandeyama dee siyama renge dokona nakama selapape lao boo pyao langilyamano. Namwa Rakane banya Ikinyingi Yesu Koraisapa role pyao yalya kando karamano dokona lao nakama yalya kando pisimwali lao langilyamano. 4 Yalya kando pisirama ramo dokopa namwa raeme kumuo pisirama lao pepana pyao reto jilyamano. Anatu Baa Yanga Paupau Lenge 5 Ikinyingi dokome waili pii namwa langiyamopa soo nyepala nakama langilyamano. Anatu baa yanga paupau lao karenge. Iminjingi doko baa keta pali nange. 6 Namwa iminjaramo dokona isa sulusulu karo dokopa namwa baapa yalya kando karamwano pilyamo larama ramo doko kyambo lao karo kinyi angi dokona palyuo lao kara naramasa pira. 7 Baa yanga paupau lasi dokona karenge doko suu pyao namwa yanga paupau lasi dokona kararama ramo dokopa namwa lao yalya kando pisiramano banya Ikinyingi Yesunya ranjama dokome namwana koo dupwa peparae kwuanyi nembapa pyakara.8 Namwa koo pali nange larama ramo doko monarena kinyinya renge doko pali naramopa namwa ukiaki minyuo suu pyapala laramasa pira. 9 Namwana koo dupwa Anatu keta polo lamairama ramo dokopa baame namwa yaki nyii nao kyawa minyuo yulu rolo pyuo karenge dokome namwana koo dupwa nyuo kame sakao ukiaki minyingi dupwa pyuo elya pyuo nyakara. 10 Namwa yulu koo pii nange larama ramo doko namwa Anatu kyambo leya laramasa pira. Dokome banya pii namwana monarename see narasa pira.
1 JONE 2 ->
8 Namwa koo pali nange larama ramo doko monarena kinyinya renge doko pali naramopa namwa ukiaki minyuo suu pyapala laramasa pira. 9 Namwana koo dupwa Anatu keta polo lamairama ramo dokopa baame namwa yaki nyii nao kyawa minyuo yulu rolo pyuo karenge dokome namwana koo dupwa nyuo kame sakao ukiaki minyingi dupwa pyuo elya pyuo nyakara. 10 Namwa yulu koo pii nange larama ramo doko namwa Anatu kyambo leya laramasa pira. Dokome banya pii namwana monarename see narasa pira.
1 JONE 2 ->