Mogogou Ta̱ Hegi 18

Sa hiyedo Babilon makoma mei degei

1 Kegemo͡u, a̱ e̱sol o ta hebenito͡u ge migimo͡u dugu. E̱sol ke̱me hu̱ hiyedo o. E̱ migilemo͡u, e̱ hoho̱ hiyedo kaha̱, sa sibige̱ ko͟͡u olo͡u fe̱i̱ hoho̱guo delei. 2 E̱ migilemo͡u, hili̱gedo ko͡u gue tobo͡u mo͡u du,

Sa hiyedo Babilonbe makoma mei degei.

Moso̱ olo͡u fe̱i̱ biligisema mei degei.

O mei degeimo͡u, duo kasaga̱i̱ kedia̱no͡u dalagua.

Sio kasaga̱i̱ kedia̱ die timo͡u degele i.

3 Yobe, sasa̱i̱ kaha̱ sa sa o olo͡u fe̱i̱ hiyouye wo͡u ma sumo͡u,

tigi kolo hue̱i̱ gofo͟͡udo na̱i̱ oye fi̱ toto degedi saga̱i̱ ke̱no͡u tefele idi.

Damale̱do, sa sibige̱ kaha̱ hiye o kedia̱ge sasa̱i̱ ke̱ hiyou degele idi.

Bi tiga mo͟͡udi o kedia̱ne, sasa̱i̱ kaha̱ midiho̱ kasaga̱i̱ milo͡u gadi kaha̱ dowo,

dia̱ne sele hiyedo mala̱ i dalagua.

4 Kegemo͡u, a̱ hebenito͡u ge ta̱ uwo gehe̱ ta ko͡u gue tobo͡u mo͡u du,

Ma̱ o sasa̱i̱ ni̱ sa ke̱ to͡u fogo͡u haguama.

Kegeiye, ni̱ne sa ke̱ tie o sasa̱i̱ kedia̱bo͡u de midiho̱ kasaga̱i̱ milo͡u ga iligi,

ni̱bo͡u de hebe kasaga̱i̱ ke̱ mala̱ iye.

5 E̱ midiho̱ kasaga̱i̱ kefema ma̱mo͡u feleibe, hebeniko͡u folo kogu dala.

Godiha̱ge e̱ midiho̱ kasaga̱i̱ ke̱me olo͡u fe̱i̱do tewe dala.

6 Midiho̱ kasaga̱i̱ e̱ milo͡u di kaha̱ hebe ke̱me ni̱ne e̱moko͡u ke̱no͡u tefele ne̱ma.[a]

E̱ midiho̱ kasaga̱i̱ milo͡u gadi kaha̱ dowo ke̱me ni̱ge e̱moko͡u hebe kasaga̱i̱ ke̱me bolo̱u̱ ko̱go͡u ne̱ma.

E̱ kope kodube sibigi kasaga̱i̱yeno͡u ama̱ma̱i̱ kaha̱ degeimo͡u,

ni̱ne e̱ kope kodu hebe kasaga̱i̱ hiyedo ke̱me bolo̱u̱ ko̱go͡u ne̱i̱ba, e̱ olo͡u fe̱i̱do na̱le.

7 Sasa̱i̱ kaha̱ yo͟͡u e̱ hu̱ hebele fogudi kaha̱, ni̱ge e̱ midiho̱ kasaga̱i̱ milo͡u gadi kaha̱ hebe kasaga̱i̱ ke̱me yo͟͡u milo͡u gadi saga̱i̱ ke̱no͡u tefele ne̱ma.

E̱ge yo͟͡usie e̱me sasa̱i̱ hiyedo, sa hiye ko͟͡umaha̱ o sasa̱i̱ wolo͡u daladi sasa̱i̱yode tobo͡u di.

A̱me kuei sasa̱i̱ mei kaha̱ degemo͡u,

kuei sasa̱i̱ kedia̱ gosolo idi saga̱i̱ kege, a̱ ma̱ ma̱ha̱ sihou ta gosolo meiyode tobo͡u.

8 Kegei kaha̱ degemo͡u, sawisiei tano͡u fe̱i̱ kelege, sasa̱i̱ ke̱me hagi̱ daga daga hiyedo dugumo͡u ile,

do hiyedobo͡u, hegie hiyedobo͡u, o tofigiei kedia̱ sihoubo͡u de gosolo.

Kegeiba, douye na̱ma mei degele.

Yobe, Hiye O Godi nele̱ hiyedo o kaha̱ge sasa̱i̱ kaha̱ midiho̱ olo͡u fe̱i̱ file dala kaha̱ degeimo͡u.

9 Kegeiba, sa sibige̱ ko͟͡umaha̱ hiye o kedia̱ge sasa̱i̱ Babilon douye no̱u̱ba, daha̱i̱ folouba duguoba, e̱ sihou gosolo ile. Yobe, dia̱ sasa̱i̱ ke̱ hiyou degemo͡u, e̱bo͡u de midiho̱ kasaga̱i̱ daga daga milo͡u ga idi kaha̱ degemo͡u. 10 Sa Babilon douye no̱u̱ba duguo gue̱ degeba, ahudo dege tafalaguali, ko͡u gue tobolo͡u ile,

Ano͡u we, ano͡u we, sa hiyedo Babilon, solo͡u do hiyedo.

Ne̱ hu̱ hiyedo deleiye, ke̱no͡u si hebe kasaga̱i̱ kaha̱ haguamo͡u,

aso̱ diho̱ tano͡u fe̱i̱ kelegeno͡u douye ne̱ bima̱i̱ olo͡u fe̱i̱ ke̱ na̱ma mei degei.

11 Kegeiba, bi tiga mo͟͡udi o kedia̱ne Babilonha̱ sihou gosolo ile. Yobe, die bima̱i̱be sa Babilon o sasa̱i̱ kedia̱ seleye haba ta mamala̱ ile mei kaha̱ degeimo͡u. 12 Mosoleya mo͟͡uma haguadi bima̱i̱ bolo̱do kegele i ke̱me sele igi golbo͡u, igi silvabo͡u, igi bolo̱do kuidiho̱ fai degei ke̱bo͡u, we̱ bolo̱do sele hiyedoye mo͟͡udi ke̱bo͡u, yukuei fo̱ degele ibo͡u, yukuei we̱i̱ degele i daga daga ke̱bo͡u, yukuei sisibe degei ke̱bo͡u, hebe ho̱ bolo̱do ke̱bo͡u, bi daga daga wai elefan miye sasadoye milo͡u gai ke̱bo͡u, sele igi kopabo͡u, hebe daga daga sele hiyedoye mo͟͡udi ke̱bo͡u, kuwo igibo͡u, igi dosogo̱ degeibo͡u fo̱ degeibo͡u deye nala̱gai igi ke̱bo͡u de olo͡u fe̱i̱ kege. 13 Bima̱i̱ ilo kelebe kasala sa̱ degei daga daga ke̱bo͡u, ho̱ bolo̱do mola daga daga ke̱bo͡u, hebe du kolo saga̱i̱ kegei daga daga ke̱bo͡u, hebe kolo hue̱i̱bo͡u, gusege hue̱i̱bo͡u, o͡u saga̱i̱ kegei ke̱bo͡u, nale̱ segeibo͡u, wai bulumakoubo͡u, wai sipsipbo͡u, wai hosbo͡u, wai hosye dufo͡u di kalo͡u bo͡u, fisimo͡u dabai degele idi o sasa̱i̱bo͡u olo͡u fe̱i̱ ke̱me mamolo͟͡u obe mei. 14 Bi tiga mo͟͡udi o kedia̱ Babilon douye no̱u̱ba duguo ko͡u gue tobolo͡u ile, bi bolo̱do na̱ molo͟͡u tagadi ke̱me ahudo dala, na̱ haba molo͟͡u mei. Bi bolo̱dobo͡u, similou kuidiho̱ fai degei ke̱bo͡u olo͡u fe̱i̱do mei degei. O tae ta kolugi dugulo meido.

15 Sa koko͡u bima̱i̱ tigamo͡u, sele hiyedo mala̱ idi o kedia̱, sa kaha̱ hagi̱ hiyedo degeli ke̱ duguoba, gue̱ dege ahudo tafalaguali, gosoloba ko͡u gue tobolo͡u ile,

16 Ano͡u we, ano͡u we sa hiyedo Babilon, solo͡u do hiyedo.

Sa ke̱ tie o sasa̱i̱ kedia̱ yukuei bolo̱do, fo̱ degeibo͡u, we̱i̱ degei daga daga ke̱bo͡u de ka̱ idi.

Similo͡u dibe sele igi golbo͡u, igi bolo̱do kuidiho̱ fai degei ke̱bo͡u, we̱ bolo̱do seleye mo̱u̱ ke̱bo͡u de ka̱ idi.

17 Haba bima̱i̱ olo͡u fe̱i̱ ke̱me aso̱ diho̱ tano͡u fe̱i̱ kaha̱no͡u makoma mei degei.

Mosole to͡u ma suluguadi obo͡u, bima̱i̱ tiga mo͟͡udi o mosoleya ke̱ suluguadi obo͡u, mosole kodu dabai degele idi obo͡u, mosole dabai degele idi o ilo kedia̱bo͡u olo͡u fe̱i̱ ahudo tafalaguali, 18 douye sa hiyedo ke̱ nolu̱ kaha̱ daha̱i̱ ke̱ folouba duguo hili̱gedo ko͡u gue tobolo͡u ile, sa tabe sa hiyedo Babilon sa̱ degei ta dala meiyode tobolo͡u ile. 19 Kege tobo͡u ma, mihi̱ko͡u duotele̱ mo͟͡uma, dio͟͡u die widio tageto͡u hebeseleba, sa kaha̱ sihou gosoloba, haba hili̱gedo ko͡u gue tobolo͡u ile,

Ano͡u we sa hiyedo.

Bi moto͡u ladi mosole obo͡u kedia̱me sa hiyedo kaha̱ o sasa̱i̱ kedia̱ sele hiyedo mala̱ idi ke̱me olo͡u fe̱i̱ mei degei.

Solo͡u do hiyedo, sa hiyedo ke̱me aso̱ diho̱ tano͡u fe̱i̱ kaha̱no͡u makoma mei degei.

20 Hebenito͡u tafalagua o sasa̱i̱ ni̱ hoho̱bo͡u ma, sa Babilonbe Godiha̱ makoma mei degei kaha̱ degeimo͡u.

Godiha̱ o sasa̱i̱bo͡u, ta̱-bolofe̱i̱-mala̱-suluguadi-obo͡u, habage-degele-duguo-tobolo͡u-idi-obo͡u, ni̱ olo͡u fe̱i̱do hoho̱bo͡u ma.

Godiha̱ sa hiye Babilon o sasa̱i̱ kedia̱moko͡u hebe kasaga̱i̱ ke̱ ne̱i̱, dia̱ ni̱ makolo idi kaha̱ degeimo͡u.

21 Kegemo͡u, e̱sol o ta kaha̱ nele̱ hiyedo degemo͡u, bogo hiyedo ta mala̱mo͡u, to̱ dawalako͡u hebele muguomo͡u tobou,

A̱ bogo hiye ke̱ dawalako͡u hebele mugu saga̱i̱ ke̱no͡u tefele, sa hiyedo Babilonne nele̱do dege hebele muguba, haba ta dugulo ile mei.

22 Sa Babilon, ne̱ o sasa̱i̱ kedia̱ die̱ feile uwo ke̱me ei haba ta dulo ile mei.

Die gita wala uwo ke̱ne ei haba ta dulo ile mei.

Die kibi haguisale uwo ke̱ne ei haba ta dulo ile mei.

Die bi milo͡u gadi o kedia̱ne ei haba ta dugulo ile mei.

Die o͡u togolo uwo ke̱ne ei haba ta dulo ile mei.

23 Na̱moko͡u be eige kama̱i̱ hoho̱ haba tage ta dugulo ile mei.

Obo͡u sasa̱i̱bo͡u hulomo͡u hoho̱bolo͡u uwo ke̱ne ei haba ta dulo ile mei.

Ne̱ bi tiga mo͟͡udi o kedia̱ne hu̱ hiyedo deleiguei.

Na̱ midiho̱ gehe̱ gehe̱ hiyedo milo͡u goumo͡u,

sa sa o sasa̱i̱ olo͡u fe̱i̱do kedia̱ duguomo͡u, ogo͡u gai midiho̱, na̱ degeli ke̱me damale̱yodema sesele idi.

24 Damale̱do, sa Babilon o kedia̱ge Godiha̱ o sasa̱i̱bo͡u, habage-degele-duguo-tobolo͡u-idi-obo͡u, woumo͡u tofigile i kaha̱ degeimo͡u Godiha̱ dia̱moko͡u hebe kasaga̱i̱ ke̱ ne̱i̱. Haba sa sa olo͡u fe̱i̱ o sasa̱i̱ woumo͡u tofigile idi kaha̱ hebe kasaga̱i̱ ke̱ne Godiha̱ge olo͡u fe̱i̱do Babilonko͡u no͡u ne̱i̱.

<- Mogogou Ta̱ Hegi 17 Mogogou Ta̱ Hegi 19 ->