୪ ମିଙ୍ଗେ ଆମ୍ବାଆସି ନା଼ଡ଼ିକିନି ଲେହେଁତି ମିଚି କାତା ୱେସାନା ନା଼ଡ଼ି କିୟାଆପେସି, ଏ଼ଦାଆଁତାକି ନା଼ନୁ ଈଦାଆଁ ୱେସିମାଞ୍ଜାଇଁ । ୫ ଇଚିହିଁ ନା଼ନୁ ଆଙ୍ଗା ତଲେ ହିଲାଆତି ଜିକେଏ ନା଼ ଜୀୱୁତଲେ ମୀ ତା଼ଣା ମାଞ୍ଜାମାଇଁ, ଇଞ୍ଜାଁ ମୀ ନେହିଁକିଁ ଜାଟୁ ଆ଼ନାଣି ଅ଼ଡ଼େ କ୍ରୀସ୍ତ ତା଼ଣା ତୀର୍ପୁତଲେ ନାମାମାନାଣି ମେସାନା ରା଼ହାଁ ଆ଼ହିମାଇଁ ।
୮ ସିନିକିଦୁ, ଏଚେ଼ତା ଆମ୍ବାଆସି କ୍ରୀସ୍ତତି ଜା଼ପ୍ନାୟି ଲାଗେଏତି ମାଣ୍ସିତି ପା଼ଣାପା଼ଟୁ ଅ଼ଡ଼େ ଦାର୍ତିତି ମୂଲୁ ଜା଼ପ୍ନି ପା଼ଞ୍ଜି ସିନି କିନାୟି ଅ଼ଡ଼େ ଉଜେଏତି ନା଼ଡ଼ିକିନି ତା଼ଣାଟି ମିଙ୍ଗେ କାୟିଦି କିହା ଅୟାନେ; ୯ ଇଚିହିଁ କ୍ରୀସ୍ତ ତା଼ଣା ମାହାପୂରୁତି ଗୂଣୁ ମାଣ୍ସି ୱା଼ଣା ଆ଼ହାନା ବାସା ଆ଼ନେ । ୧୦ ଏ଼ୱାସି ବାରେ ସା଼ଲୱି କିନାରି ଇଞ୍ଜାଁ ଅଦିକାରା ବେଟାଆ଼ତାରି ତା଼ର୍ୟୁଁ ଲେହେଁ, ଇଞ୍ଜାଁ ଏ଼ୱାଣି ତା଼ଣା ମାଞ୍ଜାନା ମୀରୁ ବା଼ଡ଼୍ୟୁ ବେଟାଆ଼ହା ମାଞ୍ଜେରି ।
୧୧ କ୍ରୀସ୍ତ ତଲେ ଆଣ୍ଡିତି ଜୀୱୁଏ ମୀ ତ଼ଲୁ ଦା଼ପି ଆ଼ତି ଲେହେଁତାୟି । ଏ଼ ତ଼ଲୁ ଦା଼ପି ଆ଼ତାୟି ମାଣ୍ସି କିତାୟି ଆ଼ଏ, ଏ଼ଦି କ୍ରୀସ୍ତ ତା଼ଣାଟି ଆ଼ହାମାନେ । ଏ଼ଦି ମାଣ୍ସିଇଁ ପା଼ପୁ ଆଙ୍ଗାଟି ଗେଲ୍ପି କିନେ । ୧୨ [a]ମୀରୁ ଏଚିବେ଼ଲା ବାପ୍ତିସ୍ମ[b] ବେଟାଆ଼ତେରି ଏଚିବେ଼ଲା ମୀରୁ କ୍ରୀସ୍ତ ତଲେ ମୁସ୍ପିଆ଼ତେରି, ଇଞ୍ଜାଁ ଆମିନି ମାହାପୂରୁ କ୍ରୀସ୍ତଇଁ ହା଼ତାରି ତା଼ଣାଟି ନିକ୍ହେସି, ଏ଼ୱାଣି କାମା କିନି ବା଼ଡ଼୍ୟୁତି ନାମାଲିଏ ଏ଼ ବେ଼ଲାତା ଏ଼ୱାସି ମିଙ୍ଗେ କ୍ରୀସ୍ତ ତଲେ ନିକ୍ହାତେସି । ୧୩ [c]ମୀରୁ ଆଙ୍ଗାତା ପା଼ପୁ ଗାଟାତେରି ଜୀହୁଦି ଆ଼ଆମାଚାଟି ହା଼ହାମାଚେରି, ମିଙ୍ଗେ ଜିକେଏ ମାହାପୂରୁ ତାନିତଲେ ମିଙ୍ଗେ ଜୀୱୁ କିହାଁ ମାଞ୍ଜାନେସି, ମାହାପୂରୁ ମା଼ ବାରେତି ପା଼ପୁ ମ୍ଣେକ୍ହା ମାଞ୍ଜାନେସି; ୧୪ [d]ଏ଼ୱାସି ମେ଼ରାତା ମା଼ କ଼ପାଟି ଆମିନି ଦ଼ହ ଦହ୍ନି ଆ଼କୁ ମାଚେ, ଏ଼ଦାଆଁ ଏ଼ୱାସି ମ୍ଣେକ୍ହାନା ପା଼ସି ମୁଣ୍ତାତା କୁଟିୟାଁ ୱେ଼ଚାନା ମା଼ ତା଼ଣାଟି ହେକ କିହାମାନେସି; ୧୫ ଅ଼ଡ଼େ ଏ଼ ପା଼ସିମୁଣ୍ତା ଲାକ କ୍ରୀସ୍ତ ବାରେଲେହେଁତି ବା଼ଡ଼୍ୟୁ ଇଞ୍ଜାଁ ସା଼ଲୱି କିନାଆଁ ତା଼ଣାଟି ଜାହାରାଇଁ ପିସ୍ପି କିହାକଡାମାନେସି ଇଞ୍ଜାଁ ଏ଼ୱାଆଁତି ଦସ୍ପାନା ତା଼ନୁ ଜୀଣାଆ଼ହାନା ହାନିବେ଼ଲାତା ବାରେ ଲ଼କୁ ନ଼କିତା ଏ଼ୱାଆଁତି ଲାଜା ବେଟାଆ଼ୱି କିହାମାନେସି ।
୧୬ [e]ଏ଼ଦାଆଁତାକି ମୀ ତିନାୟି, ଉନାୟି, ପାର୍ବୁତାକି କ୍ଡଗି ଲେ଼ଞ୍ଜୁ ପାର୍ବୁ କି ଜ଼ମିନି ଦିନାତି ଆମ୍ବାଆସି ମିଙ୍ଗେ ବିଚାରା କିୟାଆପେସି । ୧୭ ଏ଼ ବାରେ ୱା଼ହିମାନି ଦିନାତା ଆ଼ହାଲି ହାଜିମାନି ସା଼ୟିଁ ଲେହେଁ; ସାମା ଏମ୍ବାତି ସାତା କାତା କ୍ରୀସ୍ତ । ୧୮ ଇଞ୍ଜାଁ ଆମ୍ବାଆସି ଜାହାରା ଊଣା ଆ଼ହାନା ଦୂତୁୟାଁ ସେ଼ବାତା ରା଼ହାଁ ଆ଼ହାନା ସେୟାଁଣା ହାପାନା ମେସାମାନାଆଁ ପାରାନା ଅ଼ଡ଼େ ଦାର୍ତିତି ଅଣ୍ପୁ ତଲେ ଉଜେଏ ବଡପଣ ଆ଼ହାନା ଆମ୍ବାଆସି ତା଼ର୍ୟୁଁ ଲେହେଁତି କ୍ରୀସ୍ତ, ଏ଼ୱାଣାଇଁ ଆହ୍ଆନା ମାହାପୂରୁ ବ଼ରଟି ଏଟ୍କା କିୟାଆପେସି । ୧୯ [f]ଏ଼ୱାଣି ତା଼ଣାଟି ବାରେ ଆଙ୍ଗା ହାନ୍ଦୁଲିକା ଅ଼ଡ଼େ ଈଣାୟାଁଟି ନେହିଁ ଆ଼ହାନା ରଣ୍ତି ରଣ୍ତାଣି ତଲେ କାଲ୍ୱି ଆ଼ହାନା ମାହାପୂରୁ ହୀତି ପାଡ୍ଣିତା ପାଡାଆ଼ହିମାନୁ ।