San Mateo 4

Satanásne Jesústa kwail kininshimtu

(Mr 1.12-13; Lc 4.1-13)

1 Kwiztane Dios Izpulne Jesústa pul sura mɨlta, Satanás ussa kwail kininshit akwa, Dios ɨninta aizpa kimanpa.

2 Jesúsne cuarenta payukima payuwarakas amtawarakas kwatchi. Kwiztane yak kimɨzta. 3 Suasne Diablone ustukin pianara. Ussa kwail kininshimtu akwa, ussa kaizta:

—Nu “na Dios Painkul ish” kiztune, suasne an ukkasa pan sari, kizta.

4 Jesúsne ussa sɨnkara:

—Diosne paiña pɨnkɨhta ka parɨt: “Awane kumirain kuat kit uzanazi. Kumira kwatkas, awane Dios pit para aizpa izarawa, an wat uzanapa.”[a]

5 Suasne Diablone Jesústa Diospa pɨpulura, Jerusalén pɨpulura, mɨl kit iglesia yal mitmal kunninta. 6 Sua ussa kaizta:

—Nune “na Dios Painkul ish” kizta. Katmizna akkis pɨlainti, awa nua izat kit nɨjkulanapa. Dios pɨnkɨhta ka parɨt:

“Diosne paiña ángeltuza ɨninnanazi, nua kiwainanapa.

Uspane uspa chihtɨkasa nua sappaanazi,

mittɨ ukta kilmanpa.”[b]

7 Jesúsne sɨnkara:

—Diosne pɨnkɨhtakas ka parɨt: “Up Anpat Diosta kwail kinpa kishininmun”.[c]

8 Mamasa Diablone Jesústa katsa ɨnkal ɨzara mɨl kit chiwal watsal sura ussa anta. Ussa wan pãn sun suras iznintawane, 9 Diablone ussa kaizta:

—Nawa wakpuj waintane, nane nu iztu aizpa nua mɨlanash, kizta.

10 Suasne Jesúsne ussa kaizta:

—Satanás, nu akkis ɨt. Dios pɨnkɨhta ka parɨt: “Anpat Diostain wakpuj waintawa, us kaizta aizpa kin. Mamazta wakpuj wainkain,” ka parɨt.[d]

11 Suasne Satanásne Jesústas paimpa ɨrɨt. Sun urain ángeltuzne ussa kiwainñara.

Jesúsne Galilea sura paiña kal samɨztu

(Mr 1.14-15; Lc 4.14-15)

12 Juanta kajchira sɨptɨt mɨrawane, Jesúsne Galilea sura kailta. 13 Nazaret pɨpulukis puztawane, Jesúsne Capernaum pɨpulura uzna ɨrɨt. Sun pɨpulune pimamin uz. Sua Zabulón sukas Naftalí sukas kashain uz. 14 Diosne sun kinintɨt. Isaíasne, Dios kainammimikane, ñamin ka pat kit kaizta:

15 “Zabulón suras awakas

Naftalí suras awakas Jordán pi kwakara, pãn puzmuras, uzamtu.

Suane Judío awachiruzne Galilea pi kwakara uzamtu.

16 Diosta pianchi akwa, uspane tɨlkwilkinkana uzara.

Diosta piankamturuzne watsal kiarɨnazi, kaikinkana uzamtu akwa.

Ñamin irɨt awakanain uzarakas,

mane uspane kai kultɨt miwara chaamtu.”[e]

17 Sun payuin Jesúsne kamtanamɨz kit kaiznara: “Ayukta maiztain, an kwail kiamanpa, Dios awaruza mamin ɨninnashimtu akwa.”

Jesúsne ampara pishkaru ɨmmuruza akwanara

(Mr 1.16-20; Lc 5.1-11)

18 Galilea pimamin chamtuasmin, Jesúsne paas aimpihshta izta. Mazane Simónkas Pedrokas muntɨt. Mamazne Andrés muntɨt. Uspane pishkaru pizmuruz azi. Uspa pira ɨmmu kiainpailmɨzta. 19 Suasne Jesúsne usparuza kaiznara:

—Kanpazhain, ap kammuruz namanapa. Ñamin pishkaruin pizpailta. Kawarain makis nane uruza ɨninnanash, mamaz awaruza kamtananapa, ap kammuruz namanapa.

20 Masain uspane uspa ɨmmu chɨhkat kit ussa kanpailta, kamanapa. 21 Ma pitchin ɨmtuasmin, Jesús mamaz paas aimpihshta izta. Uspane Santiagokas Juankas muntɨt. Uspane Zebedeowa painkul azi. Uspane paiña papihshkasa kanuara pishkaru sulmu putpailta. Jesúsne usparuza akwanara, uskasa wanmak kit ɨn. 22 Masain uspane papihshta tuij ɨt kit kanuaras kihsh kit ussa kanpailta.

Jesúsne akkwan awara kamtananamtu

(Lc 6.17-19)

23 Jesúsne wan Galilea suwara ɨmɨz kit wan Judío kammu yalta nap kit awara kamtanara. Usne Dios watsal pit kamtanara. Usne Dios awaruza ɨnnashimtu kamtanara. Wan inturuzakas wan ishturuzakas kakulninnara. 24 Siria sura uztuzkas Jesúspa piankamara. Uspane wan inturuzakas wan ishturuzakas wan naizaruzakas Jesúspakin karaara, Jesús usparuza kakulninnanapa. Saliz piztɨttuzakas ultu piztɨttuzakas chasachiruzakas ussa karaara, Jesús usparuza kakulninnanapa.

25 Akkwan Galilea suras awane Jesús ɨmtumal aara. Mɨnpazha Decápolis pɨpuluras awane aara. Mɨnpazha Jerusalén pɨpuluras awane aara. Mɨnpazha Judea suras awane aara. Jordán pi kwakaras awakas, pãn puzmumals, aara.

<- San Mateo 3 San Mateo 5 ->