San Lucas 23

Jesúsne Roma mikwa uztukin ɨmtu

(Mt 27.1-2, 11-14; Mr 15.1-5; Jn 18.28-38)

1 Wan Judío ɨninturuzne kuhsat kit Jesústa Pilato iztukin, Roma ainki mikwa turakin, mɨlara. 2 Uspane ussa kwail kizamɨz kit Pilatora kaizara:

—An ampuwa wan piankamtawane, aune an ampura piztamakpas. Usne au awaruza pilchapuzninnamtu. Usne auruza Roma mikwara, Cesarpa gobiernora, “pial taman” kiztu. Uskas “nane Dios nɨrɨtmika ish” kiztu. “Nane katsa mikwa ish” kiztu, kizara.

3 Suasmesa Pilatone ussa mɨmara:

—¿Nune Judío awawa katsa mikwa kish?

Usne ussa sɨnkara:

—Nuin sun kizta. Watcha i.

4 Pilatone katsa pariyaruzakas, wan awaruzakas kaiznara:

—Nane an ampura chinkas kwail kitchi wanmaltau.

5 Uspane an tɨnta kaizamɨzta:

—Usne au awaruza pilchapuzninnamtu. Usne wan Judea sura uztuza kamtanamtu. Galilea suras kamtanamɨzta, an pɨpulurakima, kizara.

Jesúsne Herodes tukin ɨmtu

6 Sun mɨrawane, Pilatone ¿Usne Galilea suras ki? kiz mɨmara. 7 Suasne usne Jesús Galilea suras, Herodes ɨnintu suras, tas azi kamta. An payura Herodes Jerusalén pɨpulura tuasmin, Pilatone Jesústa Herodes tukin ɨninta. 8 Jesústa izkane, Herodesne wat kulta. Ñamin us akwa mɨra akwa, Herodesne ussa akkwan payukima izshira, chiwazha iztasparɨt kal kinpa. 9 Suasmesa kwisha akkwan piji mɨmarakas, Jesúsne ussa sɨnkarachi. 10 Katsa pariyaruzkas Moisés pɨnkɨhta parɨt aizpa kamtamtuzkas kashara kunat kit ussa tɨnta kwail kirɨt kizamtuazi. 11 Suasne Herodesne paiña suldarukasa ussa kwail kiat kit ussa ishanara. Ussa kwisha watsal kwakshamkasa kwanintawane, Herodesne ussa ishan kit Jesústa Pilatorakima mamasa ɨninta. 12 Sun payura Herodeskas Pilatokas izmuruz nampailta. An ñamin uspane aliz.

Jesústa piantana kizamtu

(Mt 27.15-26; Mr 15.6-15; Jn 18.39–19.16)

13 Suasne Pilatone katsa pariyaruzakas Judío awaruza ɨnintuzakas Judío awaruzakas akwanat kit 14 kaiznara:

—Une an ampura nawa karaara. Une an ampu awaruza pilchapuzninnamtu kizamtu. Ussa u iztukin kwisha mɨmarawane, nane an ampu chinkas kwail kitchi wanmaltau. U kaizara aizpa nilchi. 15 Herodeskas an ampu chinkas kwail kitchi wanmalta. Usne ussa aumɨza kailninta. Iztain. Kwail kitchi akwa, nane ussa piantasachish. 16 Katmizna ussa chɨhtachasmin, nane ussa aya tɨtkasa ilninnash.

17 Pascua pishta iztuasmin, Herodesne maza kajchi sɨptɨtmikasha puznintawa.

18 Wan awane tɨnta ka kwianñara:

—An ampura pizninti, ussa piantanapa. Barrabásta kajchiras puzninti, kizara.

19 An ñamin Barrabásne awara piantat kit pɨpulu awaruza aizapninnara. Katmizna uspane ussa pizat kit kajchira sɨppara. 20 Jesústa chɨhtninshimtu akwa, Pilatone mamasa usparuza kwinta kinara. 21 Uspane mamasa tɨnta kwian kit kaizara:

—Ussa piantari. Kurishta irukasa pat pian piantari, kizara.

22 Kutña pijikima usparuza kaiznara:

—¿Chikishma? ¿Chi kwail kirɨt usne? Nane an ampu chinkas kwail kitchi wanmaltau. Katmizna ussa aya tɨtkasain ilnintawane, ussa chɨhnash.

23 Uspane an akkwan tɨnta kwianat kit paikuara, ussa kurishta irukasa pat pian piantana. Uspa kaizara akwa, pariya ɨnintuz kaizara akwa, Pilatone uspa pashiat aizpa mɨnara. 24 Katmizna Pilatone uspa paikwat aizpa kira. 25 Suasne Pilatone kajchira sɨptɨtmikasha puzninta. Usne awaruza aizapninnat kit awara piantarɨt. Judío awa paikuara akwa, Herodesne usparuza mɨnara, uspa pashit aizpa kiana. Judío awa Jesústa piantashiamtu akwa, usne Jesústa usparuza chɨhkanara.

Jesústa tɨra patpianamtu

(Mt 27.32-44; Mr 15.21-32; Jn 19.17-27)

26 Roma suldaruruz ussa kurishta patpiantana tain mɨlamtuasmin, Simónne Cirene nan suras piannamtuazi. Uspane Simónta kurish munninat kit Jesústa kwizpa kanpaninñara.

27 Kwisha akkwan awane ussa kanpaara. Akkwan ashampane kwizpa kanpaat kit kwisha tayalat kit us akwa tɨnta azaara. 28 Jesúsne usparuza kɨzpu puij iz kit usparuza kaiznara:

—U ashampa Jerusalén pɨpulura uztuzne, mɨzhain. Nawa azman. U akwakas u pashpa akwakas aztain. 29 Mɨrain. Mamaz payura awane ka kizanazi: “Pashpa mɨltuchimikakas pɨja wachimikakas chitchu kwimchimikakas an wat kulanazi.” 30 Suasmesa uspane ɨnkaltakas puttarakas kaizamɨznazi:

“Au ɨsalta taiztain.

Aumɨza kularain.”[a]

31 Mɨrain. Uspane uspa pashimtu aizpa nawa kiamɨznazi. Kwiztane uspane uruza an kwail kiamɨznazi.

32 An paas kwail kimtuza tain ɨninara, uskasa piantanapa. 33 Ɨamtuasmin, ɨzara piannaara. An ɨzane awa kɨzpu sɨhkana iztɨt. Suane uspane ussa kurishta irukasa patpiana panaara. Paas kwail kimtuzakas karaara. Uspane mazarakas paiña numal kurishta patpiana panaara. Mamaztakas paiña kwiyamal kurishta irukasa patpiana panaara. 34 Suasmesa ussa kurishta pat piantawane, Jesúsne kaizta:

—Ap Taitta, mɨzha. Uspa kwail kiarɨt aizpa wat kultain, uspa chiwazha kiamtu aizpa pianchi akwa, kizta.

Suldaruruzne ainki ukkasa salara, paiña kwakshamkas mamaz pĩnkas kana kinpa. 35 Awaruzne kasha kunat kit wan izara. Katsa mikwaruzkas ussa ishanat kit kaizara:

—Usne mamaztuza watsat mɨlnara, uznanapa. Usne usmin uzna kiwainsachi. Dios ussa kiwaintuchi akwa, usne Diospa nɨrɨtmika chi, Diospa narɨtmika chi, kizara.

36 Suldaruruzkas ussa ishanat kit ussa tish vino kwinna ɨara. 37 Uspane ussa kaizara:

—Nu Judío awawa katsa mikwane, nuin watsat mɨlti.

38 Paiña kɨzpu ɨsalkin ainki tapɨlakin ka paarɨt: ANNE JUDÍO AWAWA KATSA MIKWA I.

39 Maza kwail kurishta irukasa patpiantɨtmikakas ussa kwisha kwail ka kizta:

—¿Nune Dios nɨrɨtmika kish? Nuin watsat mɨlti. Aumɨzakas watsaat mɨlchain, kizta.

40 Mamazne ussa pilchapuz kit kizta:

—Sunkana kizmun. Une Diosta ishkwatpa. Nukas, nakas, uskas kawarain naizpuspas, inakima. 41 Au paasne naizpuspas, au kwail kiarɨt akwa. An ampune chinkas kwail kit chi.

42 Usne ma pitchin Jesústa kaizta:

—Jesús. Nu amtu payura, wanta tɨnta ɨninnakane, nawa nɨjkulcha, kizta.

43 Jesúsne ussa sɨnkara:

—Watcha, nua kaiztus. Mane nune nakasa watsal sura tuanazi.

Jesúsne imtu

(Mt 27.45-56; Mr 15.33-41; Jn 19.28-30)

44 Paizka payurain wan su tɨl parɨt, kutña urakima. 45 Pãn maltachi. Dios katsa yalta pĩn kantɨt paizkakin pshatkwera. 46 Suasmesa Jesúsne tɨnta kwian kit kaizta:

—Taitta. Nane ap izpul nua chɨhkamtus,[b] kizta.

Sunkana kiztawane, irɨt.

47 Suldaru ɨninmikane sun kit aizpa iz kit kaizta:

—Diosne kwisha wari. Watcha, an ampune kwail kitchi.

48 Akkwan awane sun kirɨt aizpa izana wanmakkara. Sun kit aizpa izarawane, tayalamɨzta. Uspa yalta kaiyamtuasmin, uspane uspa pecho aim kuzara, tayaltɨt akwa. 49 Jesúspa izmuruzkas Galilea suras ashampa arɨttuzkas attishtain kunat kit sun kirɨt aizpa izara.

Jesústa uk kulta nukkamtu

(Mt 27.57-61; Mr 15.42-47; Jn 19.38-42)

50 Suane maza ampune, José muntɨtmikane, tuarai. Usne Judea sura, Arimatea pɨpulura, uzta. Uskas, mamaz Judío ɨnintuzkasa, Judío awaruza ɨninnara. Usne nil uzta, wat awa akwa. 51 Usne Judío katsa ɨnintuz kiarɨt aizpa nɨjkultachi. Usne Dios amtu payu tɨrizta, awaruza ɨninnanapa. 52 Usne Pilatora ɨt kit kaizta: “Jesúsne irɨt. Nawa chɨhkazha, na ussa uk kulta kamna.” 53 Suasmesa Joséne ussa kurishtas utpiz kit ussa putchã pĩnkasa ipta. Suasmesa usne ussa uk kulta kamta. Mɨnainkas an ñancha sun uk kulta tarachi.

54 Sun viernes payura awane chiwazha kal kiara, awa sábado payura kwaizkulmu akwa. Sun kal kiarawane, sun sábado kwaizkulmu payu mansara. Suasne Sábado tɨlawain kɨnmɨzta.

55 Ashampa uskasa Galilea suras arɨttuzne ussa attishtas kanpaara. Uspane ɨat kit ira kam kulkin izara. Miza ussa tarɨt izara. 56 Suasmesa uspane uspa yalta kaiyat kit watsal piam pippa kɨat kit watsal piam pihshkas saara, irɨtmikasha nɨna. Uspane Sábado payura kwaizkulara, Moisés ɨnintɨt aizpa kiana. Sun kal kiarawane, sun ashamparuzne sábado payura kwaizkulara, Dios sun payura kal kimanpa ininta akwa.

<- San Lucas 22 San Lucas 24 ->