1 Akkwan payuchin pailkane, Jesúsne mamasa paiña kammuruza Tiberias pimamin izpannara. Sunkana kirɨt: 2 Simón Pedrokas Tomáskas, Gemelo muntɨtmika, Natanaelkas, Caná pɨpuluras Galilea suras uzatmika, Zebedeowa painkultuzkas, an paas Jesúspa kammuruzkas wanmakkara. 3 Simón Pedrone kaiznara:

—Nane pishkaru sulna ɨrɨmtus.

Uspane ussa sɨnkaara:

—Aukas nukasa pishkaru sulna ɨrɨmtumakpas.

Uspane katsa kanuara ɨnpa waara. Sun amtane chinkas sularachi. 4 Kɨnmɨzkane, Jesúsne pimarain izpan kit kunta. Sunkana paiña kammuruzne Jesústa piankamarachi. 5 Jesúsne mɨmanara:

—Izmuruz. ¿Pishkaru sultakiwas?

Uspane sɨnkaara:

—Chinkas sultachimakpas.

6 Jesúsne kaiznara:

—An ɨmmu kanuawa numal kiaintain, pishkaru sulnapa.

Sulmu kiaintawane, uspane sulmu ukkaasachi, akkwan pishkaru wa akwa. 7 Suasne maza kammumikane, Jesús kwisha pashitmikane, Pedrora kaizta:

—An pimamin kunmikane Anpat i.

Anpat i mɨrawane, pantalón tukukasain kuh akwa, Simón Pedrone paiña kwaksham kwat kit pira tizainta. 8 Mamaz kammuruzne cincuenta sa pi ksukis purazi. Sulmu pishkaru punta akwa, uspane tainñat kit kanuawara pi ksurakima pɨlapta. 9 Pilta kihsharawane, uspane ĩn usaptɨt izara. Sun ĩnkin pishkaru iltɨt tuazi. Pankas sua tuazi. 10 Jesúsne kaiznara:

—Mamin sulta pishkaruruz kararain.

11 Simón Pedrone kanuara wat kit sulmu puntɨt katsa pishkarukasa pi ksurakima tainta. Ciento cincuenta y tres katsa pishkaru wiantɨtkas, sulmune pihsharachi. 12 Jesúsne kaiznara:

—Aat kit kwanarain.

Mɨnminkas kammuruzne “mɨnmaka” mɨmashitchi, us Anpat i pian akwa. 13 Suasne Jesúsne kasha at kit pan piz kit usparuza nailnara. Usne pishkarukasa kawarain nailnara.

14 Irɨttas kuhstawane, Jesúsne mamasa paiña kammuruza ussa izpannara. Makasa kutña pijikima izpannara.

15 Kuarawane, Jesúsne Simón Pedrora ka mɨmara:

—Simón, Juanpa painkul, mɨzha. An kammuruzne nawa pashiamtu. ¿Nune an kammuruzkin nawa anza pashimtukish?

Pedrone ussa sɨnkara:

—Watcha Anpat. Nune na nua pashimtura pian.

Jesúsne kaizta:

—Nawa nɨjkulamturuza iznari. Uspane ap pɨrikukana mai.

16 Jesúsne mamasa ussa mɨmara:

—Simón, Juanpa painkul, mɨzha. ¿Nawa pashimtukish?

Pedrone sɨnkara:

—Watcha, Anpat. Nune na nua pashimtura pian.

Jesús kaizta:

—Nawa nɨjkulamturuza iznari. Uspane ap pɨrikukana mai.

17 Jesúsne kutña pijikima ussa mɨmara:

—Simón, Juanpa painkul, mɨzha. ¿Nawa pashimtukish?

Pedrone tayalmɨzta, Jesús kutña pijikima “nawa pashimtukish” mɨmara akwa. Suasne sɨnkara:

—Anpat, nune wan chiwal pian. Nune na nua pashimtura pian.

Jesúsne kaizta:

—Nawa nɨjkulamturuza iznari. Uspane ap pɨrikukana mai. 18 Watcha nua kaiztus. Musittu asmin, nune up kwakshammin kwat kit nu ɨshimtura ɨt. Ɨlapa parɨkane, nune up sail tɨs panazi. Suasne mamazne nua pĩn kwanazi. Mamazne nua nu ɨshimtuchira mɨlnazi.

19 Sun pit paramtuasmin, Jesúsne Pedro miza imtu kainara. Pedro irɨmtukas, awane “Dios kwisha wari” kizanazi. Sun kiztawane, Pedrora kaizta:

—¡Nawa kanpazha!

20 Pedrone puij kit Jesústa kwisha pashitmikasha izta. Usne Jesúspa kwizpa kanpara. Ñamin kammuruz Pascua pishta kuamtuasmin, usne Jesúspa mamin kumira kwan uz kit “Anpat, ¿mɨnma nua chɨhkarɨnazi?” mɨmara. 21 Nawa iztawane, Pedrone Jesústa mɨmara:

—Anpat, sunmikane ¿Chima kishinasa?

22 Jesúsne ussa sɨnkara:

—Us na kailtɨmtukima uztukas, nune na nua kaiztu aizpa mɨt kit kitpa. Nu nawa kanpazha.

23 Katmizna wan kammuruzne an kammumika imanazi minñara. Jesúsne imanazi kiztachi. Ka kizta: “Us na kailtɨmtukima uztukas, nune na nua kaiztu aizpa mɨt kit kitpa.”

24 An kammumikane sun kirɨt aizpa kainat kit parɨt. Us paramtu aizpa watcha i pianmakpas.

25 Jesúsne an akwan iztasparɨt kal kirɨt. Jesús wan kirɨt aizpa pɨnkɨhta parɨtne, mɨnminkas an sura wan pɨnkɨh pana pailsachi.

Pailtɨt i.

<- San Juan 20