1 Mane Diosta piantuz, mɨzhain. Diosne uruza watsat mɨlnara, u Dios watsal pit sappara akwa. Une na kaizta aizpa nɨjkulara. Une sun pitmin mɨat kit tɨnta namara. 2 Diosne sun watsal pit akwa uruza kwailtas ukkat kit watsat mɨlninnara. Sun pit chɨhkat kit maintane, nu nɨjkultu aizpa kain i.

3 An ñancha nane na Diostas sapta aizpa uruza piankamninnarau. Nakas Cristo au kwail akwa irɨt kiz kit kamtanarɨt ish. Dios pɨnkɨhta sunkana parɨt. 4 Cristo irawane, awane ussa uk kulta nukkara. Kutña payu marɨtta usne irɨttas kakulta, mamasa uzna. Mamasa Dios pɨnkɨhta sunkana parɨt. 5 Kwiztane Jesúsne Pedrora izpanta. Suasne doce ɨnintuza izpanara. 6 Kwiztane usne quinientos awaruza Diosta piantuza masain wan izpannara. Mɨnpazha quinientos awaras Diosta piantuz me iarɨtkas, anparuzne makima uzamtu. 7 Kwiztane usne Santiagora izpanta. Suasne wan ɨnintaruzakas izpannara.

8 Uspa ussa izarawane, minpara usne nawa izpanta. Nane pashpa weas taiztakanain arau. 9 Nane anpa ɨnintaruzkin an we tɨnta ish. Nane Diosta piantuza, namkulnat kit usparuza kwail kinarau. Na sun kwail kirɨt akwa, mɨnminkas nawa paiña ɨninmika munman. 10 Cristo nawa paiña ɨnintamika namtɨt akwa, usne paiña kal nawa chɨhkara, wan kinpa. Suasne Diospa kal kirau wan pailnakima. Nane anpa ɨnintaruzkin an tɨnta kal kirau. Na kal kitkas, Diosmin nawa pashit kit wat kiwainta, paiña kal kinpa. 11 Na kal kimtukas, uspa kal kiamtukas, aune maza pitmin wan awaruza kainammtumakpas. Sun Dios pit akwa, une Diosta nɨjkulara.

12 Mane aune “Dios Cristora irɨttas kakulnin kit mamasa uznintɨt” watcha kainaramakpas. Mɨnpazha uruztas “awa irɨtne, irɨttas kakulamanazi,” kaizamtu. Uspa kaizamtu aizpa watcha chi. 13 Mɨnpazha “awa irɨtne, irɨttas kakulmanazi,” kiztune, suasne Diosne Cristora irɨttas kakulnintachi. 14 Cristo irɨttas kakultakine, au watsal pit kainara aizpa kain i. Cristo irɨttas kakultakine, u nɨjkulamtu aizpa kain i. 15 Suasne au Cristo irɨttas kakultachi kaiztatne, aune Diospa pɨrail kaizpuspas, Dios Cristora irɨttas kakulnintɨt kiz kit. Irɨt awa mamasa kakultukine, Diosne Cristora kakulnintachi. 16 Irɨt awa irɨttas mamasa kakultachine, suasne Cristokas mama irɨt tuashina. 17 Cristo irɨttas kakultachiatne, u nɨjkulamtu aizpa kain i. Suasne Dios u kwail kiarɨt aizpa wat kulnarachi. 18 Cristo irɨttas kakultakine, suasne Cristora nɨjkulamturuzkas ñamin irɨttuzkas mama kaarɨtmin mai. 19 Au wan sukin uzamtuasmin, aune Cristora nɨjkultamakpas, aumɨza kiwainnanapa mamaz payura irɨttas kakulninnanapa. Us aumɨza an sukimin kiwainamtune, aumɨza irɨttas kakulninnamtukine, aune wan awakin an tayalanapas.

20 Mane, na kaiztu aizpa watcha i. Diosne Cristora irɨttas kakulninta. Usne an ñancha irɨttas kakultɨtmika i. Diosne sun kin namta, kwizta anpa irɨttuza kakulninnana. 21 Maza ampu akwa, Adán kwail kirɨt akwa, wan awane au sukin iamtu. Sunkas mamaz ampu akwa, Cristo irɨttas kakulta akwa, usne mamaztuza irɨttas kakulninashina. 22 Adán akwa, aune ianapas. Sunkanain Cristora nɨjkulturuzne irɨttas kakulanazi, mamasa uzna. 23 Diosne sun kin minta. An ñancha Diosne Cristora irɨttas kakulninta. Kwiztane, Cristo mamasa akane, Diosne Cristora nɨjkulturuza irɨttas kakulninnanazi. 24 Suasne minpa payura taiznazi. Wan chiwal kwail ɨninturuzakas kwail ángeltuzakas pailnintawane, Cristone Taitta Diosta wan us ɨnintu aizpa chɨhkanazi. 25 Cristone katsa mikwakana au sukin ɨninnanazi, wan aliz awaruza anuppananakima. 26 Cristo mamaz payura paiña kal kapal kitpane, ussa piantuza irɨttas kakulninnarawane, awane mamasa mizurainkas iamanazi. 27 Diosne wan chiwal Cristora chɨhkara, wan ɨninnapa. Cristo wan ɨnintukas, usne Taitta Diosta ɨnintuchi, paiña Papihshmin Cristora wan chɨhkara akwa, wan ɨninnapa.[a] 28 Diosne wan ɨninta aizpa paiña painkulta us ɨninnapa chɨhkara. Wan ɨnintawane, Cristone paiña Papihshta us ɨninta aizpa chɨhkanazi. Katmizna Diosmin wan chiwaltakas wan awaruzakas ɨninnanazi.

29 Mamaz pit mɨrain. Mɨnpazha mamazpa akwa kwazikasa mamasa munnashiamtu, irɨttuz munnarachi akwa. ¿Chikishma ka kiamtu? Irɨt awa irɨttas kakulamtukine, ¿Chikishma irɨttuz akwa munnamtu? 30 Irɨt awa irɨttas kakultukine, au kal Dios akwa kain i. Awane Dios kal akwa aumɨza kwail kiamtu. Au naiztu aizpa kain i, irɨt awa irɨttas kakultukine. 31 Diosta piantuz, mɨzhain. Pailta payu ishinas. An watcha pit piankamtain. U Anpatta Jesucristora an wat piankamamɨztu akwa, nane u akwa kwisha warish. 32 Efeso pɨpulura tuasmin, nane kwisha aliz awa akwa naiztau. Na sun aliztuzkasa waya kitkas, chinkas kana kitchish. Irɨt awa irɨttas kakultukine, nane chinkas kana kitchish. Uruztas awane ka kizamtu, “¡Pishta sawizsan, kumirakas kwan, chappikas kwan! ¡Tɨlawa iwiznapas!”[b] ka kizwizsan.

33 Uruzne ñanta kininman, kwail kin. Mɨnpazha ka kaizta: “Chakulamtumikane kwail izmuruzkasa chamtune, kwail kishinazi.” 34 Nɨjkul kit nil aizpa kirain, kwail kiamanpa. Mɨnpazha uruztas Diosta mama wat piankamarachi. Sunkana kiztus, uruza mɨtsal kininnanapa.

35 Mɨnpazha ka mɨmanazi: “¿Mizama irɨttuzne kakulanasa? Paiña ña intiruz ¿mizama iztɨt ansa?” 36 Nu mɨmamtu aizpa tɨmpa i, nu pianchi akwa. Pippa wakane, pippa kasune chiktu. Pippa kasu chikkane, mamaz tɨ kwal chiktu. 37 Pippa wakane, une tɨ kwal wamtuchi. Une sun chara pippakas mamaz tuntu pippakas waamtu. 38 Diosne wan pippa wa aizpa kajarammin sara. Usne mazantuza maza tuntu sara. Anparuz mamaz tuntu sara. Us kishimtu aizpa sara. 39 Wan awa intiruz kawarain chi. Awawa ñane kalpain ñakana chi. Chitchukas mamaz tuntu ña waj. Pishkarukas mamaz tuntu ña waj. 40 Sunkanain chiyura uztuzne au sura uztuzkin mamaz tuntu izanazi. Chiyura uztuzne mamaz tuntu watsal izanazi. Sunkanain au sura uztuzne mamaz tuntu watsal izanazi. 41 Pãnne palapchakin mamaz tuntu aizmu. Palapchakas mamaz tuntu maltu. Wan kɨmakas mamaz tuntu aizamtu.

42 Awa intiruz irɨttas kakultawane, awane mamaz tuntu iztɨt puzanazi. Awa irɨkane, pippakanain pɨttɨm. Awa irɨtmika kakultawane, usne mamasa mizurainkas imanazi. 43 Awa irɨt ña kwail akwa, pilta kamarɨmtu. Awa irɨttas kakultawane, usne watsal iztɨt puznazi. Awa irɨtmikane pɨttɨm. Awa kakultɨtmikane tɨnta namtɨnazi. 44 Awa au sukin irane, ñane pilta kamamin. Awa irɨttas kakultawane, Sɨnam Izpulne paiña ña uznintu. Mamasa imanazi. Paas tuntu ña mai. Au sukin uztuzne paiña ña pilta kamanazi. Piru irɨttas kakultumikane Dios Izpul akwa uznazi.

45 Dios pɨnkɨhta ka parɨt: “Adánne, an ñanchamikane, au sukin uzta. Diosne ussa sat kit uzninta.”[c] Cristone Adánkana chi. Usne paiña Izpul akwa awaruza uzninnamtu. 46 An ñancha Diosne awa sara, au sukin uznapa. Kwiztane Diosne aumɨza maizninnat kit chiyura uzninnanazi. 47 Diosne an ñancha uztamikasha au su piltas sara. An ñancha uztamikane au sukin uzta. An kwizta atmikane, Cristone, chiyuras ara. 48 Wan awa au sukin uzamturuzne an ñancha uzmikawa ñakana mɨjara, au su piltas sarɨt akwa. Chiyura ɨamturuzne mamaz tuntu iztɨt puranazi. Cristokana iztɨt purazi.

49 Au sukin uzamtuasmin, aune an ñancha uztamikakanain uzaramakpas. Kwiztane chiyura aune Cristokana iztɨt namtɨt puranapas.

50 Diosta piantuz, na kaiznamtu aizpa mɨrain. Au sukin uzturuzne chiyura uzturuzkasa uzasachi. Dios ɨnintukin uzasachi, irachi akwa. Awa an sukin uzamtuasmin, Diosne au sukin uztuza chiyura sapnamanazi. 51 Nane uruza an ñamin kamtanarachi aizpa piankamninnanash. Wanne iamanapas. Au wan awane mamaz tuntu izanazi. 52 Aune masain wan maizanapas, kasu pit kit kasu izkultukana. Sun minpa payura awane katsa iru karaskwil usnazi. Katsa iru karaskwil azkane, irɨttuzne mamasa uzna kakulanazi, anneme iamtuchi akwa. Sun payu taizka, uzturuzne mamaz tuntu izarɨnazi. 53 Awa an sukin pailta payukima tailchasachi akwa, awane iarawa. Iarawane, mamaz tuntu izarɨnazi, mamasa an iamtuchi akwa. 54 Akkin awane iarɨnazi. Dios awaruza maiznarawane, awane pailta payukima puranazi, iarachin. Sun kitpane, Diosne pɨnkɨhta panintɨt aizpa ka kirɨnazi: