1 Coríntios 12

Dios Sɨnam Izpul mɨlamtu aizpa

1 Mane Diosta piantuz, mɨrain. Nane Dios Sɨnam Izpulpa kainanash, us mɨlamtu aizpa piankamanapa.

2 Piankamtain. Diosta pianchasmin, une sun tɨ awakana sarɨtkin wakpuj wainñat kit suntuza kanpaara. Awa uruza sunpa pɨrail kamtara akwa, une sun tɨ awakana sarɨtta kanpat kit pɨlsaara, Dios miwara ɨamanpa. 3 Katmizna, ka piankamtain. Sɨnam Izpulpa pit kaiztumikane “Jesús kwail i” kiz parasachi. Sɨnam Izpulpa pit kaiztumikain “Jesús au Anpat i” kiz parashinai.

4 Dios akkwan tuntu kal mɨj akwa, Diospa Sɨnam Izpulmin Diosta piantuza mɨlam mɨlanamtu, paiña kal kianapa.

5 Awa aizpa pakaish pakaish kal kiamtuasmin, au Anpatmin usparuza kiwainnamtu, paiña kal kianapa.

6 Akkwan tuntu kal wa. Diosmin wan kal kimturuza kiwainamtu, paiña kal kianapa.

7 Diosta piantuzne paiña mɨlam sappanazi. Sɨnam Izpulne usparuza tɨnta kiwainnamti, paiña kal kianapa. Suasne uspane sun mɨlamkasa anpa Diosta piantuza kiwainñashinai.

8 Sɨnam Izpulne mazantuza an wat piankammu pit mɨlanamtu.

Sun Sɨnam Izpulmin mazantuza mɨlanamtu, mamaztuza Dios kaizta aizpa piankamninnanapa.

9 Mazantuza sun Sɨnam Izpulmin Cristora nɨjkulanapa mɨlanamtu, Cristo pashimtu aizpa kianapa.

Mazantuza mɨlanamtu, ishturuza kakulninanapa.

10 Mazantuza tɨnta kiwainamtu, watsal kal kianapa.

Mazantuza kiwainamtu, Dios ɨninta aizpa kainanapa.

Mazantuza kiwainamtu, saliztuz kiamtu aizpakas Sɨnam Izpul kimtu aizpakas piankamanapa.

Mamaztuza kiwainamtu, mamaz kamtachi pit paraanapa.

Mazantuza kiwainamtu, mamaz tuntu pit paramtumika kaiztu aizpa piankamninnanapa.

11 Sunkanain Sɨnam Izpulmin awaruza kiwainamti, pakaish pakaish kal kianapa. Us pashit aizpa kin mintawane, Sɨnam Izpulne wan Diosta piantuza uspa mɨlam chɨhkanara.

Sɨnam Izpulne aumɨza maza awakanain namnintu

12 Maza awa intiruz mintain. Awa intiruz akkwan pajte wajkas, maza awa i. Aune Cristora piantuzne akkwan makpas. Cristo akwa aune maza awa intiruzkanain namarɨtmakpas. 13 Sunkanain Sɨnam Izpulne Judío awaruzakas Judío chi awaruzakas anpat mɨjchiruzakas anpat mɨjtuzakas maza awa intiruzkana namninnarɨt. Dios aumɨza sapkane, Diosne aumɨza munnat kit paiña Izpulta aumɨza ɨninnat kit aumɨza paiña kwal namninnara.

14 Maza awa intiruz akkwan pajte waj. Mazain chi. 15 Awa mittɨ “na chihtɨkana chi akwa, nane awa intiruzkasa chi ish,” kizsachi. Sun kiztakas, sun mittɨne awa intiruzkasa nukkultɨm. 16 Awa kail “na kasukana chi akwa, nane awa intiruzkasa chi ish” kizsachi. Sun kiztakas, sun kailne awa intiruzkasa nukkultɨm. 17 Kasune wan awaspain chi. Kasune awa aspainne, chinkas piasachi. Kailne wan awa intiruz chi. Kimpuh wan awa aspainne, chinkas mɨasachi. 18 Mane Diosne au awa intiruz sara. Samtuasmin, usne chiwazha awa intiruz wajnin kit us pashit aizpa kira. 19 Wan awa intiruzkin wa aizpa kawarain chi. Maza pajte maza pajtene kajaram waj. 20 Mane, awa intiruz akkwan tuntu pajte wajkas, awa intiruz i.

21 Kasune “chihtɨ nawa kiwaintuchish” kizsachi. Kɨzpukas “mittɨ nawa kiwaintuchish,” kizsachi. 22 Mazkwa mazkwa sunkana wajne, wan awa intiruz namtu. An we tɨnta pajte an kwisha wari. 23 Aune mazkwa mazkwara an we tɨnta mipuspas. Aune an we tɨnta pajtera an watsal iznamtumakpas. Ampukas pantalón kuhmu, awa ussa piltɨm izanamakwa. Ashampakas puiyirakas kuhmu, awa ussa piltɨm izanamakwa. 24 Chiwazha awa iztuasmin, awane chihtɨrakas matsɨhtakas pĩnkasa ampalkain, an watsal iztɨt akwa. Dios awa intiruz sarane, usne au akwa wat minta, chiwazha an we tɨnta pajte ampalnapa, awa izamanpa, awa mɨtsal kiamanpa. Kawarain Diosne aumɨza sanara, wanta kiwainanapa. 25 Dios awaruza sarane, usne chiwal wan wa aizpa sara, wan awa sulmin wan kianapa, waya kiamanpa. Awane pailta awa intiruzkana mamaztuza sunmin kiwainñashina. 26 Mazantuz naizakane, wanne naizanazi. Maza an tɨnta namtane, wanne watsal kulanazi.

27 Une, Diosta piantuzne, Cristowa kwalkanain mai. Aune akkwan makpas, maza awa intiruz namna. 28 Mane Diosne pakaish pakaish naninnara, Diosta piantuz wanmakmukin paiña kal kianapa.

An ñancha Diosne ɨnintaruza nanara.

An kwizta Dios pit kainammtuza nanara.

An kwizta Dios pit kamtamtuza nanara.

Suasne watsal kal tɨnta kimturuza nanara.

Suasne mamaztuza wat paninturuza nanara.

Suasne mamaztuza kiwainturuza nanara.

Suasne wanmakmuruza ɨninturuza nanara.

Suasne mamaz tuntu pit paramturuza nanara.

29 Diosne wanta nanarachi, paiña ɨnintaruza namanapa.

Wanne Dios pit kainammturuz chi mai.

Wanne Dios pit kamtamturuz chi mai.

Wanne watsal kal kimturuz chi mai.

30 Wanne mamaztuza wat paninturuz chi mai.

Wanne kawarain mamaz tuntu pit paramturuz chi mai.

Wanne mamaz tuntu pit mamaztuza piankamninturuz chi mai.

31 Une an watsal mɨlam Dios mɨlashimtu aizpa pashiat kit sairawa, paiña kal kianpa.

Mane nane u kiashit aizpa kamtananash. U sun kiamtune, an wari.

Mamaztuza pashiarawai