Reveleson
Na FaꞋataꞋi Ꞌanga Fuana Sa John
Sa John, na fafarongo ba sa Jesus, nia keresia na buka neꞋe. Ana kaidaꞋi neꞋeri, na TatalafaꞋa doe Ꞌi Rom, ma ti ngwae doe laꞋu, kira faꞋakaisia Kristin ki osiꞋana kira faꞋamamana ngangata ana sa Jesus Christ, diꞋia ngwae ꞋaꞋana kira. Sa Jesus nia oga liu ke kwaiꞋafi ana Kristin neꞋe ki, fasi Ꞌiri fitoꞋonga kira kike ngasingasiꞋa laꞋu. Sa Jesus neꞋe eta faꞋataꞋiniꞋi ru neꞋe fuana sa John fuana radulana ngwae Kristin ki.
Sa Jesus faꞋataꞋinia nunuꞋi ru Ꞌoro ki fuana sa John neꞋe fata sulia ꞋatoꞋanga ana Kristin ki ana kaidaꞋi neꞋeri, ma ka fata logo sulia tae ki neꞋe ke baꞋa fuli ana kaidaꞋi sa Jesus ke oli laꞋu maꞋi. ManataꞋanga doe saena buka neꞋe Ꞌuri, God naꞋa neꞋe toꞋo ana ngasingasiꞋanga ki taꞋifau, ma ka dau fafia ru ki taꞋifau, ma nia ka totolia ka tagi sulia ngwae nia ki. Ma ana ta taꞋi kaidaꞋi Ꞌi buri, nia ke baꞋa liufia malimae nia ki taꞋifau, ma sa Saetan bore nia ke baꞋa malangisia taꞋifau. Ana kaidaꞋi neꞋeri, God ke baꞋa ri Ꞌuana ngwae nia ki, ma kike baꞋa tua faꞋinia sulia na kudi. OsiꞋana nia ꞋunaꞋeri, ngwae Kristin ki kike tua noni mabe kaidaꞋi ana ꞋafitaꞋiꞋanga ki.
Na ru talingaꞋi ki saena buka neꞋe:
KerekereꞋa leka fuana fiu siosi ki & 1:1—3:22
Na kula ni tuaꞋa ana ꞋinotoꞋanga Ꞌi langi & 4:1—5:14
Na fiu ru ana fonoꞋa ngasi na buka & 6:1—8:5
Fiu faꞋi bungu Ꞌainsel ki & 8:6—11:19
Sa Saetan fuꞋalia siosi God & 12:1—14:20
Na fiu Ꞌainsel ki faꞋinia na fiu kwaꞋikwaꞋinga Ꞌisi ki & 15:1—16:21
God malangisia Ꞌi Babilon taꞋifau & 17:1—19:21
God ka ꞋinotoꞋa Ꞌi langi ma Ꞌi ano logo & 20:1—22:21

1 Saena buka neꞋe, sa John nia keresia na faꞋarongoꞋa sulia na ru neꞋe sa Jesus Christ nia faꞋataꞋiniꞋi ki. God neꞋe faꞋataꞋinia fuana sa Christ Ꞌiri ka faꞋataꞋiniꞋi fuana ngwae rao God ki sulia ru neꞋe karangi ke baꞋa dao maꞋi ki. Sa Jesus Christ ka faꞋataꞋinia na ru neꞋe ki fuana na ngwae rao nia sa John Ꞌani asungaꞋilana maꞋi na Ꞌainsel nia siana. 2 Ma sa John ka keresia naꞋa ru ki taꞋifau neꞋe nia lisiꞋi. Aia, na faꞋarongoꞋanga neꞋeri neꞋe God saea fuana ma na ru neꞋe sa Jesus Christ ka faꞋataꞋiniꞋi ki. 3 ꞋOilakiꞋa fuana sa tai neꞋe ke toꞋomani na buka neꞋe, ma ka ꞋoilakiꞋa logo fuana sa tai faꞋida neꞋe kira rongoa alaꞋanga neꞋe ki faꞋasia God, ma kira ka sasi sulia na tae ki neꞋe sa John keresia saena buka neꞋe! OsiꞋana kaidaꞋi nia karangi naꞋa Ꞌiri na ru neꞋe ki ke dao maꞋi.

Na faꞋarongoꞋa fuana fiu maꞋe siosi ki

4-5 NauꞋa sa John, nau ku kerekere kwau fuamuꞋa na fiu fiku taꞋi ngwae neꞋe kamu faꞋamamana ma muka tua ana fiu fanoa ki saena abaꞋi kula Ꞌi Asia. Nau ku foꞋo Ꞌiri God, faꞋinia na fiu mangoꞋi ru neꞋe kira tua Ꞌi naꞋona kula fuana tuaꞋa ana ꞋinotoꞋanga God, ma sa Jesus Christ kira ke baꞋa alafe fuamuꞋa, ma kira ka kwatea logo na aroaroꞋa fuamuꞋa. Ana kaidaꞋi noaꞋa Ꞌua ta ru, God nia tua naꞋa. Ma God ka tua logo ana kaidaꞋi neꞋe. Ma nia ka tuatua firi logo. Sa Jesus naꞋa neꞋe ngwae faꞋarongo mamana, ma nia na ngwae etaeta neꞋe God nia taꞋea faꞋasia na maeꞋa, ma nia logo neꞋe ngwae ꞋinotoꞋa fafia ngwae tatalafaꞋa ki ana magalia. Sa Jesus ka alafe fuaka, ma Ꞌani maelana nia ka loge kia faꞋasia abula taꞋangaꞋa kia ki. 6 Sa Jesus neꞋe na ngwae tatalafaꞋa kia, ma nia ka alu kulu na fikutaꞋi ngwae fata abu ki, fasi Ꞌiri kulu ka rao fuana God na MaꞋa nia. Nau ku foꞋo Ꞌiri sa Jesus Christ ke toꞋo ana na ꞋinotoꞋanga ma na ngasingasiꞋanga tuatua firi! ꞋIu ke ꞋunaꞋeri!

7 Lia basi, nia karangi ka dao maꞋi Ꞌi fafona na gwaꞋi salo ki! Ma na ngwae ki taꞋifau kira ke baꞋa lisia. Ma na ngwae ba kira labua ki, kira ke baꞋa lisia logo. Ma na ngwae ki taꞋifau saena magalia kira ke baꞋa oꞋomae ma kike angi osiꞋana niaꞋa. ꞋIu, nia ka mamana.

8 Ma God neꞋe ngasingasiꞋa ka tasa, nia tua naꞋa Ꞌi naꞋona mala na ru ki taꞋifau, ma nia ka tua ana kaidaꞋi neꞋe, ma ke baꞋa tua firi logo. Nia ka saea logo, “NauꞋa neꞋe Alfa ma na Omega, na talaꞋaelana ma na suilana na ru ki taꞋifau.”

Na faꞋataꞋinga sulia sa Jesus Christ

9 NauꞋa sa John na ngwaefuta kamu sulia nau ku faꞋamamana ana sa Jesus Christ diꞋia logo kamuꞋa. Ma kira faꞋakaisi nau diꞋia kamuꞋa sulia sa Jesus Christ neꞋe na ngwae tatalafaꞋa kia ma nia gwaungaꞋi fafi kia. Ma kulu Ꞌalatai saena faꞋakaisiꞋanga, osiꞋana kulu ngwae nia ki. Kira ka dau nau, ma kira ka alu nau saena bubunga neꞋe kira saea Ꞌani Ꞌi Patmos, sulia nau ku fatataloꞋania na fatalana God ma na ru neꞋe sa Jesus faꞋataꞋinia ki. 10 Sui ana taꞋi asoa fuana foꞋosilana na Aofia neꞋe AnoꞋi ru Abu nia faꞋataꞋinia ru ki fuaku, ma nau ku rongoa taꞋi lingalingaꞋi ru doe, diꞋia na lingalingaꞋi bungu, fata maꞋi Ꞌi buriku 11 ka Ꞌuri, “ꞋOke keresia naꞋa tae neꞋe Ꞌoke lisia, sui Ꞌoko kwatea naꞋa buka neꞋe fuana fiu fikutaꞋi ngwae faꞋamamana Ꞌi Efesus, Smirna, Pergamum, Taeataera, Sardis, Filadelfia, ma Ꞌi Laodisea.”

12 Ma kaidaꞋi nau ku kakari abula fuana lisilana sa tai neꞋe alaꞋa fuaku, nau ku lisia fiu faꞋi matangaꞋi Ꞌai fuana unu ki kira saungaꞋinia Ꞌani gol. 13 Aia, ma safitana matangaꞋi Ꞌai fuana faꞋi unu neꞋeri ki, nau ku lisia na ru neꞋe lisilana diꞋia ngwae, nia ruꞋufia ifi fafo keta leka ka dao fafona Ꞌaena. Ma na foꞋosae ana gol neꞋe teo Ꞌi fuꞋufuꞋuna. 14 Ma na ifuna kwao ka diꞋia na faufau, ma na maana ka rara diꞋia na mafula. 15 Ma na Ꞌaena lisilana ka diꞋia barasi neꞋe kira doꞋofia saena mafula doe sui ma nia ka ngwasinasina. Ma rongolana lingana ka diꞋia rurulana ta tata doe. 16 Ma nia ka dau fafia fiu faꞋi bulubulu ki Ꞌani bali lima ꞋoloꞋolo nia. Ma na sele ni ofoꞋa neꞋe toꞋo ro bali neꞋe sakatafa maꞋi faꞋasia saena kwakwana. ꞋIu, ma na maana darana ngwasinasina ka doe diꞋia na sina. 17 Ma kaidaꞋi nau ku lisia naꞋa, nau ku Ꞌasi fafia na maaku Ꞌi Ꞌaena, diꞋia ta ngwae ba nia mae. Ma nia ka alua naꞋa lima ꞋoloꞋolo nia fafi nau, ka fata Ꞌuri, “NoaꞋa Ꞌoe kosi maꞋu. NauꞋa neꞋe talaꞋaelana ma na suilana na ru ki taꞋifau. 18 NauꞋa na ngwae neꞋe nau ku mauri. OsiꞋana nau ku mae, bore ma kaidaꞋi neꞋe, nau ku mauri laꞋu tua tua firi. Ma nauꞋa neꞋe nau ku ꞋinotoꞋa fafia na maeꞋa ma na kula neꞋe ngwae ki leka Ꞌuana kaidaꞋi kira mae. 19 Ma Ꞌoke keresia na ru neꞋe Ꞌoko lisiꞋi ki, ma na ru neꞋe ka dao maꞋi ki ana kaidaꞋi neꞋe, ma na ru neꞋe ke baꞋa dao maꞋi. 20 Aia, na manata agoꞋa sulia na fiu faꞋi bulubulu neꞋe Ꞌoko lisia nau ku dau fafia Ꞌani lima ꞋoloꞋolo nau, ma na fiu faꞋi unu ba kira saungaꞋiniꞋi Ꞌani gol nia Ꞌuri: Na fiu bulubulu ki neꞋe na Ꞌainsel neꞋe kira lia sulia na fiu fikutaꞋi faꞋamamana neꞋeri ki. Aia, na fiu fai matangaꞋi Ꞌai fuana unu ki neꞋe kira saungaꞋiniꞋi Ꞌani gol neꞋe na fiu fikutaꞋi faꞋamamana ana fiu maꞋe fanoa neꞋe ki.”

Reveleson 2 ->