Matthew 28

Sa Jesus nia mauri laꞋu

(Mark 16:1-10; Luke 24:1-12; John 20:1-10)

1 ꞋI buri Ꞌana na Sabat, faꞋi asoa ana mamaloꞋanga, kaidaꞋi nia laꞋa bilabila Ꞌua ana na Sande Ꞌi Ꞌofodangi, Ꞌi Mary faꞋasia Ꞌi Magdala, ma ta Mary laꞋu, kera ka leka Ꞌuana na faoda baera Ꞌiri kera ka lisia. 2 Ma ngwano ma na tikitiki doe nia Ꞌiginia, ma taꞋi Ꞌainsel God ka koso maꞋi faꞋasia Ꞌi langi, ma ka gilosia naꞋa babaꞋi fau baera faꞋasia maana na faoda, ma ka tua Ꞌi fafona. 3 Na lisilana diꞋia naꞋa meamea ma na ifi nia ki ka kwao liu. 4 Ma ana kaidaꞋi neꞋe ngwae folo ki kira lisia, kira ka maꞋu liu, ma kira ka Ꞌasida, ma kira ka lebelebe, ma kika diꞋia naꞋa Ꞌada na ngwae mae ki.

5 Ma na Ꞌainsel neꞋeri ka fata Ꞌuri fuadaroꞋo, “NoaꞋa moro kasi maꞋu. Nau ku saiana koroꞋo lulu Ꞌuana sa Jesus ba kira saungia ana Ꞌai rara folo. 6 NoaꞋa nia kasi tua naꞋa Ꞌi neꞋe. Nia mauri naꞋa diꞋia ba nia saea fuamuꞋa. Moro leka maꞋi Ꞌi neꞋe, ma moro ka lisia amuroꞋo kula ba nia teo teo ana. 7 Aia, moro ka leka ꞋaliꞋali naꞋa, ma moro ka faꞋarongo Ꞌuri ana fafarongo nia ki, ‘Sa Jesus nia mauri naꞋa, ma nia ka leka Ꞌi naꞋo mulu Ꞌuana Ꞌi Galili, ma kamu ke baꞋa lisia naꞋa Ꞌi neꞋeri.’ Ma moro ka manata toꞋona ru neꞋeri nau ku saea fuamuroꞋo ki.”

8 ꞋUnaꞋeri goꞋo, kera ka leka ꞋaliꞋali naꞋa faꞋasia faoda Ꞌani maꞋungaꞋa. Ma sui bore Ꞌana, kera ka saeleꞋa liu. Ma kera ka lalili Ꞌiri kike faꞋarongoa na fafarongo nia ki.

9 Ma ana kaidaꞋi neꞋeri, sa Jesus ka saka fuadaroꞋo, ka fata Ꞌuri, “Na aroaroꞋa ka tua faꞋi koroꞋo.” Ma kera ka leka maꞋi siana, ma kera ka bobo uruuru fuana, ma kera ka dau kwau Ꞌi Ꞌaena, ma kera ka faꞋa aofia. 10 Ma sa Jesus ka fata Ꞌuri fuadaroꞋo, “NoaꞋa moro kasi maꞋu. Moro leka, ma moro ka faꞋarongoa na ngwaefuta nau ki, fasi Ꞌiri kike leka Ꞌuana Ꞌi Galili. Ma kike baꞋa lisi nau naꞋa Ꞌi neꞋeri.”

Na sokeꞋa ngwae faꞋinaꞋonaꞋo ki

11 Ana kaidaꞋi ro kini neꞋe ki kira oli kwau sulia na tala, ti ngwae ana ngwae folo neꞋeri ki, kira leka naꞋa faꞋasia faoda gwaꞋu sa Jesus, ma kira ka oli naꞋa Ꞌuana Ꞌi Jerusalem. KaidaꞋi kira dao ana maꞋe fanoa doe neꞋeri, kira ka alaꞋa naꞋa sulia ru ki taꞋifau neꞋe kira lisia siana fata abu doe ki. 12 Ma kaidaꞋi neꞋe fata abu doe ki, ma ti ngwae faꞋinaꞋonaꞋo laꞋu ana Jiu ki, kira ka alaꞋa fiku ka sui naꞋa, kira ka kwatea mani doe fuana ngwae ni folo ki. 13 KaidaꞋi kira kwatea mani neꞋe fuada ngwae folo ki, kira ka fata Ꞌuri, “Kamu ke soke Ꞌuri fuana ngwae ki taꞋifau, ‘KaidaꞋi kami maliu saena rodo, na fafarongo sa Jesus ki kira leka maꞋi, ma kira ka bilia na nonina.’ ” 14 Ma na ngwae faꞋinaꞋonaꞋo neꞋe ki, kira fata logo Ꞌuri, “DiꞋia sa Paelat nia rongoa na ru neꞋe, noaꞋa kamu kasi manata Ꞌabera laꞋu, sulia kaimili neꞋe kami ke baꞋa faꞋasaga fuana, Ꞌiri noaꞋa nia kasi saetaꞋa fuaumulu.”

15 Ma kaidaꞋi ngwae folo neꞋe ki kira ngalia mani neꞋeri ka sui naꞋa, kira ka leka, ma kira ka sasi naꞋa Ꞌada ru neꞋe fata abu doe ki ma na ngwae faꞋinaꞋonaꞋo Jiu ki, kira saea fuada. Ma na alaꞋanga neꞋeri ana sokeꞋa ka talofia taꞋifau naꞋa Jiu ki, leleka dao Ꞌi taꞋena.

Sa Jesus dao tafangaꞋi fuana fafarongo nia ki

(Mark 16:14-18; Luke 24:36-49; John 20:19-23; Acts 1:6-8)

16 Na akwala ma taꞋi ngwae fafarongo nia ki kira leka naꞋa Ꞌuana Ꞌi Galili, Ꞌuana taꞋi faꞋi ua neꞋe sa Jesus saea fuada fasi Ꞌiri kira ka leka Ꞌuana. 17 Ma kaidaꞋi kira lisia naꞋa sa Jesus, kira ka faꞋa aofia, ꞋunaꞋeri bore Ꞌana ti ngwae ada kira ka manata ruarua Ꞌua. 18 Ma sa Jesus ka dao maꞋi siada, ka fata Ꞌuri, “God nia kwate dangalu naꞋa ana ngasingasi Ꞌanga ki taꞋifau Ꞌi langi ma saena magalia fuaku. 19 Nia neꞋe, kamu ke leka, ma kamu ke faꞋamanata na ngwae ki taꞋifau ana fanoa ki taꞋifau, Ꞌiri kira na ngwae fafarongo nau ki logo. Ma kamu ke siuabuda Ꞌani satana na MaꞋa, ma na Ngela, ma na AnoꞋi ru Abu. 20 Ma kamu ke faꞋamanatada fasi Ꞌiri kira ka roꞋosulia na ru ki taꞋifau neꞋe nau ku faꞋamanata kamu naꞋa Ꞌani. Ma nai tua faꞋi kamu leleka ka dao ana na suilana na magalia.”

<- Matthew 27