5 Aia, ma fuana na ngwae neꞋe abula taꞋa ma ka etangia liadilaꞋanga neꞋe safitakulu. Nia faꞋaliadila nau, bore ma nia ka faꞋaliadila kamu ka tasa. Na liadilaꞋanga baera nia sui naꞋa, osiꞋana 6 ꞋorolamuꞋa kamu kwatea kwaꞋikwaꞋinga fuana ngwae baera, ma ka bolo naꞋa. 7 Ma ana kaidaꞋi neꞋe, leꞋa fuana muke rufuanata naꞋa ana, ma muke fata kwairaduꞋa fuana, Ꞌasu nia kata kwaimanatai liu, ma ka oli faꞋi buri. 8 Nia neꞋe, nau ku gani kamu fasi Ꞌiri muke faꞋataꞋinia fuana neꞋe kamu alafe mamana fuana. 9 DuꞋungana tae ba nau ku kerekere kwau Ꞌi naꞋo sulia nau ku oga nai ili kamu, Ꞌiri nau ku dao toꞋona diꞋia muke roꞋosulia na alaꞋanga totongaꞋi nau ki taꞋifau. 10 Ma kaidaꞋi kamu rufuanata ana ngwae baera, nauꞋa bore nau ku rufuanata logo ana. Ma nau ku rufuanata ana ka sui naꞋa ngwae ba fulia ru taꞋa fuaku. Sa Christ saiana neꞋe nau ku rufuanata ana, Ꞌiri nau ku Ꞌafi kamu Ꞌani tua fikua leꞋa. 11 Ma nau ku oga nai rufuanata ana, Ꞌasu sa Saetan kata liufi kulu. Sulia kulu saiana nia oga ka sasia ꞋafitaꞋiꞋanga ki akulu.
KaidaꞋi sa Paul tua Ꞌi Troas nia manata Ꞌabera sulia ngwae Ꞌi Korint ki
12 Aia, ana kaidaꞋi nau ku dao Ꞌi Troas✡Acts 20:1 Ꞌuana faꞋataloꞋa Ꞌani FaꞋarongoꞋa LeꞋa sulia sa Jesus Christ, nau ku dao toꞋona na Aofia nia kwate ka talangwaraꞋu fuaimili Ꞌiri kami ka rao Ꞌi neꞋeri. 13 Sui bore Ꞌana ka ꞋunaꞋeri, nau ku manata Ꞌabera doe liu ꞋuamuꞋa, sulia noaꞋa naisi dao toꞋona ngwaefuta kia sa Titus, ngwae ba ngali alaꞋanga suli kamu. Nia neꞋe kwate ma nau ku fata ni oli oliꞋa fuana ngwae ki Ꞌi Troas, ma nau ku leka naꞋa Ꞌaku Ꞌuana Ꞌi Masedonia fuana daoꞋa toꞋona sa Titus.
Na raoꞋa sa Paul
14 Aia, nau ku baꞋatafea God sulia nia kwatea kulu ka tua ratai faꞋinia sa Christ. Ana kaidaꞋi ki taꞋifau, sa Christ talaꞋi kia saena kwaikwailiufiꞋanga nia Ꞌi naꞋona ngwae ki taꞋifau. Ma God ka kwate kulu ka fata taloꞋania na faꞋarongoꞋa sulia sa Jesus Christ ana fanoa ki taꞋifau. Ma na faꞋarongoꞋa neꞋeri, nia diꞋia ta ru moko leꞋa neꞋe leka Ꞌuana kula ki taꞋifau. 15-16 KaidaꞋi kulu faꞋarongo ꞋunaꞋeri sulia sa Jesus Christ, kulu kwate ma God ka saeleꞋa. Ma kulu kwatea na Ꞌai moko leꞋa ana na FaꞋarongoꞋa LeꞋa ka liufia saena fanoa ki taꞋifau. Ma na ngwae neꞋe kira ka toꞋo ana mauriꞋa firi, na FaꞋarongoꞋa LeꞋa diꞋia na ru moko leꞋa neꞋe ngalia maꞋi na mauriꞋa firi fuada. Ma na ngwae neꞋe kira ngalia kwaꞋikwaꞋinga faꞋasia God, na FaꞋarongoꞋa LeꞋa diꞋia na ru moko taꞋa neꞋe saungida kika mae.
Aia, nia lia diꞋia noaꞋa ta ngwae kasi bolo fuana faꞋataloꞋa Ꞌani FaꞋarongoꞋa neꞋe. 17 Ma noaꞋa kaimili kasi diꞋia na ngwae Ꞌoro neꞋe kira faꞋarongo Ꞌani na fatalana God fasi Ꞌiri kira ke toda Ꞌani mani. Bore ma kaimili faꞋatalo Ꞌania na FaꞋarongoꞋa LeꞋa, sulia God nia arabaꞋe kaimili. Kami ka saea na ru mamana ki Ꞌani ngasingasiꞋa sa Jesus Christ. God saiana na ru ki taꞋifau neꞋe kami sasiꞋi.
<- 2 Korint 12 Korint 3 ->
aTae neꞋe sa Paul ka saea Ꞌi neꞋe ma ana 7:5-16 kwate ma kulu saiana ti ngwae faꞋamamana kira fulia ru taꞋa liu ki. Sali sa Paul alaꞋa sulia ta ngwae faꞋamamana nia fata faꞋalia sa Paul maana fikutaꞋi ngwae taꞋifau. Nia fata Ꞌuri, “Sa Paul nia noaꞋa laꞋu lifurongo mamana sulia alaꞋa lana noaꞋa kasi mamana.” ꞋUnaꞋeri ba lekaꞋa baera (2:1) ka faꞋanonifiiꞋa liu naꞋa. Ma kulu ka lisia ana 2:5-10 na ngwae neꞋeri fata faꞋali liua naꞋa sa Paul talana. Sa Paul nia ka kwatea sa Titus faꞋinia ta kerekereꞋa, ma ka saea ngwae faꞋamamana ki kike balufia na ngwae neꞋeri. Ana 2:5-11 kulu lisia neꞋe kira balufia ngwae neꞋeri.
