1 Tegin Jesús purpal chogalbal: “Imi Pab-neg-takmaid tule-nagnu-ibedyob. Imi tule-nagnu-ibed polego nad tule-amigal, ega nagnugin arpamalgal. 2 Tenal tule-nagnu-ibed tule-amisgu, tulemalbak igal-nudas ibagwen-arpaged-wilub penukkal. Tegin tule-nagnu-ibed nagnuje tulemal-palmiszhun ega arpagal.

3 “Tegin tule-nagnu-ibed wachilbakebakegin tule-immal-ukmalad-negzhe kannan nadbalgu, tule-pimalad-takalbal pinche pukmal. 4 Tenal tule-nagnu-ibed we tulemalga chogal: ‘Pe nemalmoma an-nagnuje arpanegal. Tenal pe-arpagoedbal an pemal-penuko.’ 5 Tegin we tulemal nagnuje nadmalzhun arpagal.

“Tegin tule-nagnu-ibed yoroku tule-immal-ukmalad-negzhe kannan nadbalgu, tule-pid-amisbal nagnugin ega arpagal. Tegin tule-nagnu-ibed wachilapágin kannan nadbalgu, tule-pid-amisbal nagnugin ega arpagal. 6 Tegin tule-nagnu-ibed wachilatalgin kannan nadbalgu, tule-pimalad-takalbal pinche pukmal. Tenal tule-nagnu-ibed we tulemalga chogal: ‘¿Ibiga pe wakur-akar itigin pinche pukmal-wede?’

7 “Tegin tulemal-pinche-pukmalad nagnu-ibedga chogal: ‘¿Imi tule arpagal an-amijulil, an igi arpago? Al anmal pinche pukmaldo.’

“Tegin tule-nagnu-ibed tule-pinche-pukmaladga chogal: ‘Tegil pe nemalmodo, an-nagnugin arpagal.’ Tegin tule-pinche-pukmalad nadmalzhun nagnugin arpagal.

8 “Tegin neg-chedogusgu, nagnu-ibed tule-e-nagnu-takchiidga chogal: ‘Imi pe tulemal-anka-arpasmaladzhe pel-kwapa kolo, pe we tulemalga mani penukegal. Tenal pe tule-chol-napi-arpagedgin-togzhamalad inzhel pe penuko. Tegin pe ukin-ukin tulemalga manigin penukchunno, kepe-arpagedgin-togzhamaladzhe.’

9 “Tegin tule-wachilatal-arpagedgin-togzhamalad nonimalgu, ibagwen-arpaged-wilub we tulemalga penukles. Tegin tule-arpasmaladga ukin-ukin manigin penuklesmalzhun. 10 Tegin tule-kepegin-arpagedgin-togzhamalad wilub omosgu penuklegal, we tulemal ebinzhasmal, emalga pul-ichejul mani penuklego. Tenal we tulemal-pinzhebukwadyob yabli mani kwen penukleszhul. Tenal we tulemalga ibagwen-arpaged-wilub penuklesmalmo.

11 “Tegin tulemal-kepe-arpagedgin-togzhamalad, mani ega penuklesgu, tule-nagnu-ibedgin ulualmal, chogalmal: 12 ‘Imi tule-napi-arpagedgin-togzhamalad unnila pinche wachilgwen wis arpasmal. Tenal anmalga-penuklejad-yopí pe we tulemalga mani pennusmalmo. Tenal anmaldin peyedzhe wilesmal tegin tad peyedzhe anmal-kukchamalbal. Tenal pe anmalga weob penuked-wilubzhulin, tenal pe anmalga pul-melu mani penuked-wiluban.’

13 “Tegin tule-nagnu-ibed tule-kepe-arpagedgin-togzhamalad-walgwenga chogal: ‘An-ai, antin pe-kwen-yardanaichul. ¿Imi an pebak igal-mezhiszhulzhí, ibagwen-arpaged-wilub-manigin pe-penukegal? 14 Wegin pe-arpaged-mani pe chudo. Imisgin pe nad. Imi an peido, tule-napi-arpagedgin-togzhamalad pe-yopí mani abingemo. 15 Tenal an igal-nikado, an-itolegedbal naga mani imagal. ¿Imi antin tulega-wilub-okpinal mani naboedbal, al pe ankin istar pinzhemalyé?’ ”

16 Tegin Jesús chogalbal: “Imi an purpal pemalga immal chogzhadyob ampa kujal tulemalga kunonimogo. Imi tule-tummagan tule-pinchegadga kunoniko, tenal tule-pinchegaddin tule-tummadga kunonimogo. Pitomalgu.”

—¿Ibi pe pei-ade?

Tegin we ome Jesúsga chogal:

—Imi antin, an peido pe anka nuekwa chogo, pe neg-takmaidgin pe tule-tummadga togzhal, an-machi-walbogwad pe-cholbalmaladga kugal, kwéntin pe-nuedzhik chiggal, kwéntin pe-chapilezhik chiggalmo.

22 Tenal Jesús we omega tegin e-machimalga chogal:

—Imi pe immal-kwen-wichulidgin pe chunmanaima. ¿Imi pemal unnimalmogoyé, an-wilegoedgin wilegalmo, an kobed kobneedyob?

Tegin we tule-walbogid Jesúsga chogalmal:

—Anmal unnimalmodo.

23 Tegin Jesús tule-walbogidga chogalbal:

—Imi pemal anyob unnimalmo-choggu, al pe akalzhul anyob wilemalmogodo. Tenal tule an-nuedzhik tegin an-chapilezhik-chigmaloeddin, ankin chijul choggal: ‘We tulemal an-cholbalmaladga kugal.’ Tenal an-Pabdin pato tule-chus an-cholbalmaladga kugal.

24 Tenal Jesús-e-chapingan-walambegwad wisgusgu Jacob tegin Juan tule-tummadga togbi-kualmal, we tule-walbogwadzhe ulualmalzhun.

25 Tenal Jesús aga e-chapinganzhe kochagu, ka chogal:

—Imi pemal wismaldo, iti-napkined-saglagandin tummarba-itogedgin nanemal. Tegin tummagan-e-cholbalmalad chabzhul tulemal-imakaldamalmo.

26 “Tenal pemal-abalgin iti-napkined-tummagan-tamaladyob pemal naneed-wilubzhulmal. Imi meke-ibi-tule pemalga tummadga kubiel, we tule melle tummarba itogenab, tenal we tule pul mosyob tule-pentakenab. 27 Tenal meke-ibi-tule pemal-abalgin-pul-tule-tummadga kubiel, we tule pul-pule tule-pinche-arpagedyob naneed-wilubmal.

28 “Imi an-Te-Tule-Chunna ampa an-chogzhad-yopí mosyob kudimo. Tenal an kwen nonijul tule mosyob anka immal imagal. Tenal antin nonido tulemalga immal imagal. Tegin an nonibal, an-purkoedbal íchejul tule-abonogalbal.”

—¡Tummad, pe David-wagwaye, imi pe wilejakwa anmal-takelen, nabirinye!

31 Tegin tulemal we tule-walbogid-aku-atamaladga chogalmal:

—¡Melle pe kolmama! ¡Pe yakir-kuma!

Tenal we tule-walbogid pul-kigma kolmakal chogalmal:

—¡Tummad, pe David-wagwaye. Imi pe wilejakwa anmal-takelen, nabirinye!

32 Tegin Jesús tule-aku-ataged-itosgu, kannamamaid kwisgunoni. Tegin Jesús tule-walbogid-aku-atamaladzhe kocha. Tegin tule-aku-atamalad Jesúszhe nonigu, Jesús tule-walbogidzhe ekichial:

—¿Igi pe peimal an pe-penta?

33 Tegin tule-walbogid Jesúsga chogalzhun:

—Tummadye, anmal mag atabimalye.

34 Tegin Jesús wilejakwa tule-walbogid-taknonigu, chunkalgin imia ebus. Tegidgin tule-walbogidga ilgwen imia mag atanonimalzhun. Tegin tule-walbogid Jesúsbak nadmalmojun.

<- Mateo 19Mateo 21 ->