Mateo 15

Tule aga ulubgin-istar-pinzheedbal iskunonidaed, tenal mas-kunnedbal chul

(Marcos 7:1-23)

1 Tegin te ibagwengin Pariseomal tegin Moisés-igalgin-tulemal-oturdamalad Jerusalén-akar Jesúszhe nonimal. Tegin we Judio-tummagan Jesúszhe ekichialmal chogalmal:

2 —¿Ibiga pe-chapingan tadgan-igal-mamikid-pallí keg immalmal ima-wede? Imi pe-chapingan, ampayo mas kunneddu, keg chunkal enukmal.

3 Tenal Jesús Pariseomalzhe ekichialmo:

“¿Ibiga pemal Pab-igal-mezhijadgin yolemalmodé, tadgan-igalgin nanegal? 4 Imi Pab Tummad chogzhado:

Imi pedin aga pabgin aga nangin atagenabmal.

Ex. 20:12; Dt. 5:16

Tegin Pab chogzhabaldo:

Imi meke-ibi-tule aga e-pabga

o chulil, aga e-nanga kaka-iskana kochal,

pe we tule-mejenabmal.

Ex. 21:17; Lv. 20:9

5 “Tenal pemal-Pariseomal chogmal: ‘Imi tule aga pabga, aga nanga chogzhal: We immalmal-an-pe-pentakoenad, an pel-kwapa pato Pab Tummadga ukcha. Al an keg pe-pal-penta.’ Imi pemal-Pariseomal tulemal-oturdananimaldo tule keg we immalmalgin e-pabgan-pal-pentakel. 6 Tenal pemal-Pariseomal weob chogzhadbal, pemal pato Pab-igal-mezhijad ochulos tadgan-igalgin nanegal. 7 Imi pemal pinche-askinbi-tule-nuedyob-nanemalad. Al Pab Tummad akpene e-kaka-palchoged-Isaíasbal nabir pemalgin chogzhado:

8 Imi we tulemal pinche askin chunmakedginbi

an-otummodamal.

Tenal we tulemal aga ulubgin ankin kwen pinzhejulmal.

9 Tenal we tulemal Pab Tummadyob anche kolalmalal,

wedin ibga keg pel ku.

Tenal we tulemal tadgan-pinche-aga-igal-onosmaladgin

tulemal-oturdananimal. Pitogua.”

Is. 29:13

10 Tegin Jesús tulemal-yogsalmaladzhe kochagu, chogalbal:

—Imi pemal nuekwa an-chogneed itomalo. 11 Imi tule mas kuchal, keg purpal tule-izho. Tenal tule istar chunmakel, wedin purpal tule-izhodo. Pitogua.

12 Tegin e-chapingan Jesúsga chognonimalzhun:

—¿Imi pe wiis, Pariseomal imis-pe-chunmajad istar itosmal?

13 Tegin Jesús aga e-chapinganga chogal:

—Ankadin iwen-kwen-akalzhul, Pariseomal istar an-chunmajad itomalal. Tenal meke-ibi-igal an-Pab mezhiszhulil, Pabdin we igal opelononiko, tule kagan-iskana unkedyob. 14 Tenal pemal melle Pariseomalgin chunmamalo, meke kudimal. Tenal we Pariseomal tule-iktumalad, tenal yabli aku-atamal. Tegin tule-aku-ataged tule-pid-aku-ataged-anke-natapilen, we walbogid aga mes ya-yabal arkwanmaloen.

15 Tenal Pedro Jesúsga chogal:

—Imi an peido, pedin anmalga pe palchog, imis-pe-immal-tule-izhoedgin-chunmajaddin ibi chogle-wede.

16 Tegin Jesús aga e-chapinganga chogal:

—¿Imi an-imis-chogzhaddin pemal ampa aku-itomalmodé? 17 Nabir. ¿Imi pe wismalzhulzhí meke-ibi-pe-kunned unnila pe-sabalzhebi tog, tegin te-cholbal pél pe kannan mibalo? 18 Tenal tule aga ulubgin-akar istar chunmakel, wedin purpal tule-izho. 19 Imi tule-aga-ulubgin-akar-istar-pinzheedbal iskued tani: tule-mejedi, ome-pidbak yosgu taed, machered-pidbak yosgu taed, puna-yaebak yosgu taed, machibak yosgu taed, immal-aturzhedi, kakanzhedi, istar tulegin chunmaked. 20 We igal purpal tule-izho. Tenal tule ampayo mas kunneddu, chunkal-keg-enukeddin, keg purpal tule-izho.

Jesús Cananea-ome-e-chiskwa-nudajad

(Marcos 7:24-30)

21 Tegin Jesús tulemal-oturdajad-cholbal nadzhun, neg-kwebur-Tirozhik tegin Sidónzhik. 22 Tenal Jesús-natapidgin, Cananea-ome-walgwen aka-tégin-maid kolmakal-kolmakal Jesúszhe noni, chogal:

—Tummadye, pe David-wagwaye, imi pe wilejakwa an-takelen, nabirinye. Imi an-chiskwadin nia-nikadbal peyedzhe wilemaiye.

23 Tenal Jesús ilgwen yakir pes, omega immal kwen chogzhajul-kus. Tegin e-chapingan Jesúszhe nonimalgu, Jesúsgin wilegalmal chogalmal:

—Imi we ome inkwagus anmal-cholbal kolmadani. Imi pe we ome-wis-pentagwelma. Tenal pe ome-pentajal, pe omega chogo: ‘Pe akalzhul negzhe nejunno.’

24 Tegin Jesús aga e-chapinganga chogal:

—Imi Pab Tummaddin Israel-tulemal-oweles-kudimaladzhe unnila an-palmial, Israel-tulemal-pentagal.

25 Tegin ome-Jesús-cholbal-kolmadanikid yabli Jesús-abir chimtinoni, Jesúsga chogal:

—Tummadye, pe an-wis-pentakoye, anka puna-nudagalye.

26 Tegin Jesús omega chogal:

—Imi an takto, ib-nued-chul nuskangin mas-kunned chugal achumalga ukegal. Imi an Israel-tulemal-pentakenab, al an keg ku pe-pentagal.

27 Tegin ome Jesúsga chogal:

—Tummad, nabir pe chogendo, tenal tule-mesagin-mas-kunpukwadgin chan egwachal, ¿achu nabir kunnojulzhí? Al pe akalzhul an-wis-pentamogoye.

28 Tegin Jesús omega chogal:

—Ome, imi pe ankin peyedzhe penzhul-choggu, al pe-anche-immal-ekichijadyob, an pega chiskwa-nudako.

Tegidgin apka-pakal ome-e-chiskwa ilgwen nuguszhun.

Jesús masgin milibake tulemal-okuchad

(Marcos 8:1-10)

29 Tegin Jesús neg-kwebur-Tiro tegin Sidón-akar nadgu, Galilea-mata-kakche noni. Tegin Jesús yal-abaladzhe nakwisgu, kep chigwiszhun Pab-igalgin tulemal-oturdagal. 30 Tegin tulemal-íchejul Jesúszhe ampagunonimal. Tenal tulemal Jesúszhe tule-poni-nikmalad-cheinonimal: tule-mego-mego-nanemalad, tule-aku-atamalad, tule-orolmalad, tule-keg-chunmamalad tegin tule-yemalad-pimalad-íchejul Jesús-abir ampagunonimalmo. Tenal Jesús pél we tulemal-nudas.

31 Tenal tulemal takchamal, tule-keg-chunmaked nabir chunma-pesmal, tegin tule-orolmalad nugus-pesmal, tegin tule-aku-atamalad nabir ata-pesmal, tegin tule-mego-mego-nanemalad nabir nane-pesmal. Tenal tulemal takchamalgu Jesús pel-kwapa tulemal-nudas, weob pakal pesmal. Tegin tule-aka-pukmalad Israel-tulemal-e-Pab-Tummad-e-nug otummoalmal.

32 Tegin Jesús aga e-chapinganzhe kochagu, chogal:

—Imi we tulemal ibapágus anmalbak pukwamal, tegin mas-kunned pel nikchul-choggu kunkal, al antin wilejakwa we tulemal-takalzhun. Tenal an peichul tulemal mas-kunchul negzhe nemal melle igalbal ukul tar-mesmalgal.

33 Tegin e-chapingan Jesúsga chogal:

—Imi anmal neg-nikchulidbal pukwamal-choggu, ¿anmal pia mas-kunned onogo, we tulemal-íchejul-pukwad-okunkal? Keg kue.

34 Tegin Jesús aga e-chapinganga chogal:

—¿Pemal melu madu wis nika-ade?

Tegin e-chapingan Jesúsga chogal:

—Anmal madu-walakugle wis nika, tegin ua-purwigana wis pukwabal.

Tegin Jesús aga e-chapinganga chogal:

—Tegil nueddo.

35 Tegin Jesús tule-pukmaladga chogal:

—Pemal napkin wis ampagumalgwelo mas kunmalgal.

36 Tegin Jesús walakugle madu chus, tegin ua-purwigana-chusbalgu, tog-nuedi Pab Tummadga chogzha. Tegin Jesús purwi-purwi madu, ua-pipichisgu, madu tegin ua Jesúsga melgud. Tegin Jesús aga e-chapinganga madu, tegin ua-ukcha, ukin tule-pukmaladga mimigal. 37 Tegin tulemal-pel-kwapa immedzhe mas kuchamal. Tenal tulemal-mas-kuchad-cholbal Jesús-e-chapingan ampa karpa-kwakugle mas-okpitchad wesmal. 38 Imi tulemal-mas-kuchamalad, macherganbi milibake, tenal omegan, nuskan pel choglejul. 39 Tenal tulemal-mas-kuchad-cholbal, Jesús tulemalga chogal:

—Imisgin pe akalzhul negzhe nemalzhunno.

Tegin tulemal-naded-cholbal, Jesús kep ulgin nakwisgu, nadzhun, neg-kwebur-Magadán-omopen.

<- Mateo 14 Mateo 16 ->