FILEMON

Pol pepa muno bogl Filemon tongwa

Ka mongo yegl ende okuna ongwa

Yagl Filemon i pirngi dungwa yagle ta, ye pirngi dingwa yomba tau bogl Kolosi kamun meglkwa. Ye nigl kongun yomba suwara ta kugl nongwa yaglmo kangiye Onesimus ana ye eremogl Filemon kunoglmo ta nendre teke ende ongwa. Ba ye Pol kandre te Pol kamambuno wakai dungo ana Onesimus nomane yake tongwa. Ana okuwo ye ende ikine Filemon moglmara enagledi prukwa.

Pepa i muno boglkwa yagle kangiye Pol. Yomba tau pirkwa ye buglayungu A.D. 60 mina ye pepa muno sungunagle i boglkwa.

Ka mem kande yegl pangwa: Pol pepa muno i bogl Filemon tongwa. Ana ye eremogl Onesimus angra kaima kamambuno wakai prume dindre kanwakai yei ana nigl kongun yoko yomba moglmedi pirkrambuka pre ana Pol pepa bogl tongwa. Ye pirngi kaima dungwa yagle. Ana epigl 10 ya 11 ya te 16 mina kano.

1 Na Pol, Yesus Krais pre kanemo painga, te Timoti nono angro no pepa muno i bogl ene Filemon tombuglka. Ene yomba wakai yeinendre, ana kongun suwara ounga yomba motnga. 2 Te Apia nono ambaro, Akipas kimbirnem nono akiye mogl God kundamo i oungra. Ana God yombama ene yungun mina makai singwa akiye no pepa muno bogl tombuglka.

3 Ana God nono Neno ya Yaglkande Yesus Krais, ye wakaino ene tendre ana deno munduno pokndi yenambuka i ene nomane mina pandigl tenambuka.

4 Angra Filemon, na kamange erika enge ene wedi pirtre engenge na Godna diwakai yeiteinga. 5 Sraglpre na pirka ene God yombama du-wakai kandre te Yaglkande Yesus wedi pirngi dine dingwa. 6 Ene pirngi dinga yombuglo ere ombuno dinatnga, yegl etn kade no Krais mina taragl wakai kaima yumga i ene mundu kaima piratnga pirkan eratnga pre na kamange erika. 7 Angra, ene God yomba du-wakai meglkwa wakai kandre di-inmara mambuno i na wakai kaima pirka. Sraglpre, yomba prapra pirngi dingwa ene nomane ere ikor ende sigigle ditenga.

8 Ipre Krais mina yombuglo naran kuno eran kade ana ene taragl ta eragledi piratnga, i pra ero dinaglka. 9 Ene yomba wakai kanga mambuno i na wakane ta ditenaglka. Na yagl kindagl Pol erme ombugl Yesus Krais kongunmo pre kane painga. 10 Yeglpre, na wana Onesimus ene wakai ere tenatnga pre na ene diteinga. Na kane painga enge ye wu na akeple dingo ana spirit mina wu na wana kaima ongwa.*Yeglmere pangwa, Onesimus eremogl Filemon nigl kongunmo yoko ertre ana okuwo teke ende wu Pol moglmara ungwa, ana ye Pol bogl mogl ende wu Kristen ongwa. Enge igle ye lono pangwa i yomba ta nigl kongun yoko ere teke enan ana suglmo yomba kimbirnem ditenan ere sindre, endi-prak mina sigoraglkwa. 11 Okuna ye kongun wakai ta ere ene akepledi tekrukura ba etne kongun wakai ere nono suwo-akiye akepledi norambuka.†Grik kanno mina, kangiye Onesimus i ka kuno yegl, “Kongun wakai orkwa.”

12 Na nomana ye teinga pre etne ye di ikine ene mina endinga. 13 Ye na yawagle ake gidi moglmbo kade, ene angain indre ana na Yaglkande kamo wakai pre kane painga i na akeple dinambuka i wakai pirka. 14 Ba na taragl kanekane pirkitnere ta erekraglka, na ene yegl ero ta dikraglka, ana ene ta piratnere mere ero. 15 Na yeglmere ta pirka, kaima, Onesimus enge sungunagle ta ene mina mogl eglke endungwa, ipre ene etne ye ikine endimin ana ye ene bogl aimande morambrika. 16 Ana ye nigl-kongun yoko yomba ta moglkrukwa, ba erme ye nigl-kongun yoko yomba wakai kaima mogltre Krais mina angitn wakai moglkwa. Na ye wakai kaninga. Ba ene ombugl wakai pond kanatnga, ana Yaglkande mina kongun yomba ya te angitn mereyegl kanatnga.

17 Ene eremogl na akiye wanbuglka moglmedi pitn, ana na di yungugl endinatnere yeglmere Onesimus di yungugl endo. 18 Onesimus okuna aglau ta ere ene tendre te taragl kanekane ta ene mina kur yungwa ta yoko panan, ye kangiye mina koko ende ana i prapra yu na kangina mina endo. 19 Na Pol, pepa muno i nana onguna mina boglka. Ye taragl ingwa i nana topo te ikine endinaglka. Ene taratn na mina pangwa i ene noman mundu i na natnga paimoglkwa, ba na ka i dinakurika.‡1 Korin 16:21 kamo pangwa i kanamga. 20 Angra, Yaglkande kangiye mina na gun yenaglka mambuno wakai ere naratnedi pirka. Ana na nomana wakai yenan, nono Krais yombamo mouglka ana mambuno eratnara i mina na dena munduna argan erambuka. 21 Na pepa boglka i, pirkan erika pre ene dimere yegl etn kade ana i na pirka, ene mambuno Onesimus ere tenatnmara i na dimere ere te tau ama ere kawa tenatnga.

22 Te na ka suwarata ama dinaglka pangwa. Ene yungun mina kula ta ake wakai ere yei naro. Sraglpre, na pirka ene prapra kamangeno God pirtre, ana na te ikine ene meglmara endinaglka.

23 Epapras na bogl akiye Yesus Krais pre kane pambuglka. Ye ene diwakai yei tongwa. 24 Ana Mak ya Aristakas ya Demas ya te Luk ye no kongun suwara ounga, ye ene diwakai yei teingwa.

25 Yaglkande Yesus Krais wakaimo ene spiritno mina akiye yenano.