JEMS

Jems pepa muno i boglkwa

Ka mongo yegl ende okuna ongwa

Pepa Jems i mina yomba embriyeno wakai eraglkwa pre ka mere pangwa. Kamo i God yombama beke tenan ana ye mambuno du-yene duglo boraglkwa.

Pepa i muno boglkwa yagle kangiye Jems ye Yesus angigle moglkwa. Te ye Jerusalem kamun kamambuno wakai pirkwa yomba meglkwa i ye ende okuna pindre sutno moglkwa. Ana yomba tau pirkwa buglayungu A.D. 48 mina Jems pepa i muno boglkwa.

Ka mem kande pepa Jems mina yegl pangwa: Yesus pirngi dingwa yomba ye yoko ta moglkraglkwa. Taman. Ye mambuno wakai ere yomba ta tembi ana i pirngi dingwa gigle dungwa i ombuno dinambuka.

1 Na Jems, God ya Yaglkande Yesus Krais nigl-konguno yomba moglka, God yombamo Israel yungu ombuno 12 ene makano kindekondo ende perepere pi makan koglkoglo mogl-eingwa ipre na pepa muno i bogl ana diwakai yeiteinga.

2 Angrima wagle, taragl kanekane ene mina yange sinaglmedi eran, ana yegl erambara i mina ene gun yenaglkwa. 3 Sraglpre, i ene pirkan erikwa, ene pirngi dingwa sigugl sinagledi pre bagl sinan, ana mambuno yegl mina ene yumbun indre ana andigl giglendi moraglkwa. 4 Ene engenge engre gidi mogl yumbun imbi, mambuno i ene mina yake gigle kaima di panambuka. Yeglpre ene wakai mogltre ana God mambunomo wakai i ene ta dokokraglkwa. Tamanga. Ene mambunono i wakai kaima panambuka.

5 Ene meglmara suna i yomba ta nomane sungunagle pangwa ana kamange ere God tenan ana God ye nomane wakai tenambuka. Ana ye taragl wakai merkinde yomba prapra tongwa yaglmo. Ana yomba ta ye krapeglkwa i dem ta kumburo tekrukwa. 6 Ba ye kamange erambuka enge pirngi kaima dinambuka ana nomane suwo suwo yeikrambuka. Sraglpre, ene nomane suwo yenan, mundi nigl ir mangungo nigl pembigldi umere yeglmere orkwa. 7 Yomba koyeglmere Yaglkande mina sragl ta tenan inagledi kowai pirambuka. 8 Ana ye nomane suwo suwo yongo, mambuno kanekane orkwa i ta wu konbauna suwara mina ta pikrukwa.

9 Kamambuno prukwa yomba kiuglgiunde moglkwa i ye gun yenambuka, sraglpre, God ongumuglo mina kangiye kande pangwa. 10 Ba yomba taragl merkinde ake nongwa yomba i God ye kangiye ake atne endinan ana ye gun yenambuka, sraglpre, endikan are kuiye uglo simere yeglmere ye gorambuka. 11 Ana nono pirkan ounga, ande si ninga giglendi dongo ana kugl goglko te kuiyeno uglo sungo ana ekino wakai ikra dundungwa. Kuno yeglmere taragl merkinde ake nongwa yomba ye kongunmo eremogltre ana gorambuka.

12 Yomba yumbun kanekane mina andigl giglendi meglkwa yomba God eran ye gun pond yeiyondo. Sraglpre, ye yumbun indre yombuglo orkwa pre ana God eremogl kor aimande moraglkwa i topo mereyegl tenambuka. Yomba ta God pre munduno pangwa i God taragl wakai tenagledi ka dipandigl tongwa ikra tenambuka.

13 Yomba ta tandaglme erambedi nomane ake nusinan ana yomba suwarata yegl dikrambuka, “Mambuno kinde i God ero dungo na erika.” Tamanga. Mambuno kinde eremogl God gundo yu tandaglme mina ukrambuka, te God eremogl yomba ta tandaglme eraglmedi ta baglnu sikrukwa. 14 Ana yomba suwarandi yene nomane kinde andigltre gundo i eglke pindre ana ake nusungo tandaglme erikwa. 15 Ana nomane kinde i ambu gak dano meglmere yegl dano mogltre, ana okuwo tandaglme kuglkwa i ambu gak kiglmere yegl. Ana tandaglme yake wu kande pindre geglkwa mambuno i-pene endungwa.

16 Angrima wakai wagle, mambuno kinde yegl ene kanwinge erimbi bakaglte dinambiwa. 17 Mambuno wakai gun yenga ya deno munduno bi yongwa i prapra heven ungwa. God ye ken ambuglange prapra ereyongwa nem yagle i taragl prapra nono norkwa. Neno i ye mambunomo wakai i ta koko pikrambuka te ye mambunomo i ande kuiya yongo taragl kuiyano wu olto ya sungunagle omere yegl ta pikrukwa. Tamanga. 18 Ye yene kamo pamere ere ana nono neno moglkwa. Ye yene kamo kaima i mina nono kugl yongwa. Taragl tau ere yomara i nono endi mongo komuno koglkwa mereyegl yomba prapra ya te taragl prapra ere yongwa i nono mounga.

19 Angrima kaima wagle, taragl i ene pirdime diyo. Ene prapra oglandi ka piramnedi eraglkwa, ba ene oglandi ka dikre te oglandi deno kumbrokraglkwa. 20 Sraglpre, yomba deno kumbrukwa mambuno i God embriyemo du-yene i ta i-nongugl endekrukwa. 21 Ipre mambuno deglmbi yongwa prapra ya te mambuno kinde merkinde plau dungwa i prapra ene kondinaglkwa. Ene mogl-atne ende ana God kamo ene nomano mina yaglkwa i pir imbi ana kamo i ene kuiyano ere-inambuka kuno orkwa.

22 Ene ka i pir yoko endekriyo. Ene ka i pirtre pinande eriyo. Ba ka i ene pir pinande erekrimbi ana enene kakimbi di-ingwa. 23 Yomba ta ka i kina keunde pirtre ana kamo dumere erekrukwa ana ye yomba ta yene gumadra niglminman mina kangwa yeglmere orkwa. 24 Ye yene gumadra kandre endongo ana yene sigigl srambre ere pangwa i tambre kana torwa sungwa. 25 Ba lo i tandaglme yombuglomo siderwagl ertre ana nono ere endungo yoko kaima mounga, i wakai-yene. Ana yomba ta ye lomo i yoko pirkrambuka ba kandime dindre duglo wakai ere boran ana ye sragl ta erambuka i God wakai ere tenan ye mogl dimedi gun yenambuka.

26 Te yomba ta kamambuno wakai ere pirtre ana God dembiye karaugl kaima ere teyedi pirambuka, ba ye yene drambiye sugl wakai moglkran, yene kakimbi di-ingwa te ye dembiye karaugl ere God tongwa mongomo paikrukwa. 27 Ba yomba Kristen kaima mogl ana God Neno ongumuglo mina aglau erekre mambuno wakai erikwa i yegl: Ambu werai ya gak-mua mirte eremeglkwa i nono ye akeple di tendre ana no nono konbo sraglmere wanamga i sugl wakai moun ana nono God ongumuglo mina makandle taragl ta sideglmbi yei norokrambuka.

Jems 2 ->