Hibru 5

Yesus yene pris kande moglkwa pre yomba prapra ikine endinambuka

1 Ana yombamo meglmara suna i pris kande suwara suwarandi God yene pinde igo ana ye yomba pre konguno ere akeple dindre te tandaglmeno koko endinaglkwa pre ofa ya kombuglange gaglkwa. 2 Prismo kande i God kongun kiendi pamere ere yomba kamambuno ta kiure konbauna yomara pikrikwa i akeple ditongwa. Ye yene ama tandaglme orkwa yagle. 3 Yegl orko yene tandaglmeno pre kombuglange gagl tendre, te okuwo ye yombamo tandaglmeno pre garambuka.

4 Yomba yene ta na pris kande mole dikrambuka, ba God okuna Aron pinde yungo pris kande moglkwa ana kuno yegl keme God yomba ta pinde inambuka i keunde pris kande morambuka. 5 Kuno yeglmere Yesus yene ta kangiye kande indre na pris kande ta moragle dikrukwa. Ba God yegl ditongwa,

“Ene na Wana motnga te

erme na ene Nen moglkwa.”✡

6 Ana God ombugl ka ta ama yegl dungwa,

“Ene pris aimande kamun

moratnga, i Melkisedek pris

moglmere kuno yegl moratnga.”✡

7 Ana Yesus makandle kor wanmoglkwa enge i ye kamange ere kaglkane indre kai ere ana yana di God tongwa, te i ye gorambuka enge i Yaglkande God akeple dinarambedi pre yegl orkwa. Sraglpre Yesus mambuno wakai ormara ipre God pir tongwa.*Yesus Gaten Gesemani mogltre kamange ere God tongwa i ye mina yumbun pana orkwa i yeglke endinambedi orkwa. Matyu 26:36-46 te Mak 14:32-42 ya Luk 22:39-46 i kanamga. Ana epigl i mina yegl dungwa. Ye kamange orko God prukwa. Kaima. God kanwinge orko Yesus goglkwa ba God kanwinge orko Yesus geglkwa mem i ye ta ikrukwa. Tamanga. God eremogl ye maugl mina pai moglmara ikor ende ana kangiye kande kaima tendre orko ye wu pris kande moglkwa. Aposel 2:24 ya Hibru 2:9 ya Filipai 2:6-11 i kanamga. 8 Ba ye God Wam moglkwa pre Nem kamo beke pirtre ana dumere ere yumbun yungwa i ka woina erikwa mambuno i pir pogl sungwa. 9 Ana ye yegl orkwa ipre aglaumo ta paikruko wakai moglkwa. Yomba ye kamo pinande eraglkwa prapra kor aimande meglkwa ere-inaglkwa i ye mambuno kaima moglkwa pre tenambuka. 10 God ye pre dipanduglkwa, pris kande ta mogltre Melkisedek pris kongun ormere yegl erambe dungwa.

Ene gak kuglambu mereyegl moglkraglmiwo

11 No ka i merkinde pangwa dinamun, ba no yegl pamiwo dipogl sinamga mere manga, sraglpre, no ka dinamga i ene tambre ta beke ikraglkwa pangwa. 12 I kaima, enge olto no ene ka bekete umga i ene ka beke teingwa yomba moraglkwa kuno orkwa ba ene bitno pai kuno erekrukwa, ipre yomba tau undre God kamo komuno mambuno bogl beke tomnere yeglkra aglke kordagl ene beke tenaglkwa, ipre ene mano amo nuglo ninaglkwa yeglmere kuno orkwa te kaiya mokna gigle dungwa ninaglkwa kuno erekrukwa. 13 Yomba ta am ne pai moglkwa i ye gak kuglambu mogl pangwa pre du-yene pangwa mo kinde pangwa i ye ta pirkanpogl sikrukwa. 14 Ba kaiya mokna gigle dungwa i yagl ambu dinbi ninaglkwa kuno orkwa. Ye mambuno kinde pangwa ya te wakai pangwa i ye beke kan-kondingwa pre nomano pai pogl sungwa.

<- Hibru 4 Hibru 6 ->