EFESUS

Pol pepa muno bogl Efesus yomba tongwa

Ka mongo yegl ende okuna ongwa

Pol pepa i boglmara nomanemo pond yegl pangwa: Taragl prapra heven suna ya makandle paingwa i God iyu Yesus mina endinan ana Yesus suwara bitno morambuka (1:10) te God yene yombama nomano ake andran ye Krais bogl usuwara pi nomano suwara yei moraglkwa.

Ana kamo muno kermongo boglkwa ikra yegl: God wakaimo i mina ere-endungo yomba prapra ye Yesus Krais wedi pirngi dindre ana makaisi wu yungu ombuno suwara eingwa ipre ka tau olto dungwa.

Te Yesus Krais kongun ormara i mina ana tandaglme erikwa yomba, tandaglmeno koko ende ana Holi Spirit tongwa, i God taragl wakai eragledi digi dungwa i ombuno dungwa (1:14).

Te ka ta mokomugl ungwa i ama yegl pangwa: Kristen prapra Yesus bogl usuwara eingwa, ipre nomano suwara yei ana God mambunomo pamere duglo bogl moraglme dungwa. Mambuno i pirpogl sinaglmedi ka tau di dibogl yegl dungwa: Kristen prapra wu yungu ombuno suwara eingo ana Krais bitno moglkwa (4:1-16). Ye prapra yungu mereyegl meglko ana Krais yungu kauglange mereyegl moglkwa (2:19-22). Kristen prapra Krais embiye mereyegl meglko ana ye wino mereyegl moglkwa (5:22-32).

Ana God yene yombamo taragl wakai prapra eretenagle dungwa i kamambuno pepa igle mina nono kaima kamga. Taragl wakai kaima i yegl God wakaimo i Krais mina pangwa, Krais ye yomba wakai kangwa, ye gogltre tandaglmeno koko endungo wakai mounga, te munduo argan erenorkwa.

1 Na Pol, Yesus Krais aposelmo moglka, i God prumere ere na pinde yungwa.

Ana na pepa muno i bogltre ene God yombama du-wakai Efesus kamun meglkwa teinga, ene pirngi dindre ana Yesus Krais mina sidakagl meglkwa.

2 God nono Neno ya te Yaglkande Yesus Krais, ye wakaimo ya nomanemo pokndungwa i ene mina wu panambiwo.

3 Nono eremogl God dembiyesi diwakai yei tenamga, ye nono Yaglkandeno Yesus Krais Nem moglkwa. Te nono spiritno akeple dinambuka pre ana ye Yesus mina heven taragl wakai prapra nono norkwa. 4 Sraglpre, ye kamun makan beke yeikrukwa enge, nono pinde yungwa pre Yesus Krais bogl sindakagl mogltre ana nono aglau erekre ye ongumuglo mina holi moramga. 5 Okuna imbo nono kanwakai yendre ana Yesus Krais kongun eran i nono ye nangiglma kaima moramga pre pinde yungwa. Yeglpre nono ye nangiglma kaima moramga. God ye yene nomanemo prumere yegl orkwa. 6 God wakaimo pond kaima pangwa ipre nono diwakai yei dembiye sinamga, sraglpre, ye Wam wakai kangwa i nono yoko kaima norkwa. 7 Ana Yesus bormaimo mina nono toposi i-ikine ende ama nono tandaglmeno prapra koko ende norkwa. Sraglpre, God wakaimo i pond kaima pangwa, 8 te nono nomano wakai prapra ya pirdime dinamga mambuno pond i nono norkwa. 9 Ana kongun i okuna kana Krais mina God eragledi prukwa teke pangwa i erme kongunmo ere i-pene ende nono ombuno di norkwa. 10 Te God kongun i wakai wakai ere pi engemo panduglkwa i plau dinambuka enge, taragl prapra kamun mitna ya te makandle paingwa i ye i-suwara endinan ana Krais suwara Yaglkande mogltre sutno morambuka.

11 God kongun kanekane yegl eragledi pruko pangwa i di pra dindre ana orkwa, i ye yene yombama moramga pre nono pinde ingo ana Yesus Krais bogl wu suwara pindre God yombama kaima mounga. 12 Yeglpre nono komnaiye Krais wedi pirngi dumga, ipre God yombuglomo kande pangwa i nono dembiye si mitna imbo ende tenamga. 13 Ene ka kaima pirkwa engemo ikra ene ombugl Yesus Krais mina meglkwa, te kor-moraglkwa kamo wakai i mina ye ene ere-yungwa, ana ene Yesus wedi pirngi dingwa pre God ene yombama kaima moraglkwa pre ombunodi tongwa i ye ene nangino mina muno sitongwa. Ye muno sitongwa i yegl: Ye Holi Spirit inaglmedi ka dipandigl kondungwa ikra ene tongwa. 14 Yeglpre nono pirkan ounga ya Holi Spirit i-kondumga i okuwo God dipandigl taragl wakai prapra akiye inaglme dungwa i nono sugl kan moun ana God yene yombama toposi i-ikine endinan ye bogl akiye moraglkwa. Ipre God yombuglomo kande pangwa i nono dembiye si mitna imbo ende tenamga.

15 Ene Yaglkande Yesus wedi pirngi dindre te God yombama du-wakai prapra kanwakai yeingwa i na kande pir kan kondiga. 16 Mambuno ipre na ene pre oglka erekre God aimande diwakai yeite moglka te kamange enge enge erika enge ene wedi pirka, 17 te na krapogl nono Yaglkandeno Yesus Krais Godmo teingwa, ye ambuglange kande Nem moglkwa, ipre ye eremogl nomane wakai pangwa ya te taragl teke pangwa i-pene endinambuka Spirit i ene tenambuka, yegl eran ana ene ye pirkanpogl kaima sinaglkwa. 18 Na krapoglka i ene nomano audinan kade ene kanpogl sinaglkwa, God taraglmo merkinde wakai kaima pangwa i ye yene yombamo du-wakai nono inaglme dungwa, taraglmo ipre ye ene aglendi ingwa ana ene ipre sugl meglkwa. 19 Ana ye yombuglomo pond kaima pangwa i nono pirngi dumga yomba mina suna igle kongun giglendi orkwa i ene ama kanpogl sinaglkwa. Ye yombuglomo i nono yumbu sinamga kuno erekrukwa. 20 Yesus Krais goglko God yombuglomo i mina ere ikor ende ana i endungo heven imbo ye ongo wokra amedi moglkwa. 21 Ana ye mogl mitna imbo ende yomba ya spirit kinde kangino kande pangwa, ya sugl yomba kande mogl mitna endingwa ya te yagl kande wagle tau erme meglkwa i prapra engre atne ende tendre ana ye mogl mitna imbo kaima endungwa te okuwo imbo ama yegl mogl enambuka. 22 Taragl prapra God i yu Yesus kagle atnekra yendre ana God yombama pre taragl i Yesus sugl morambedi pinde yungwa. 23 God yombama i Yesus nangiyemo, i yene mundu suna mogl kuno ertre ana taragl prapra mina mogl kuno orkwa.

Efesus 2 ->