1 Angrima wagle no Yaglkande Yesus Krais ende ikine unan nono ye bogl makai sinamga kamo i erme ene ditomun piryo. 2 Yomba tau dindre Yaglkande engemo plaudi kondume diteingo ene pirkwa. Yomba ta spirit ka dinarumedi pirambuka mo yomba ta ye yene nomane mina pirtre ka yegl dungwa mo te no ka yegl pepa bogl ye teime dingwa i ene ka yegl ta pirmbi ana sipuglo dikre te nomano yumbun pirkraglkwa. 3 Yomba tau ka kanekane kakimbi di ene tenaglmiwo, pirkriyo. Enge i yoko ta plau dikrambiwa. Komnaiye kana yomba merkinde kenaglme ere God mokono tenaglkwa. Te lo sendungwa yomba ye ombunodi unongugl pi moglkwa, ana yombamo i God dumere okuwo ende guglo kamun pi kinde erambuka. 4 Ye yene dembiye sindre ana dembiye karaugl ere teingwa yomba taragl kanekane ere God wedi i kunda ikine eretenambuka. Te God holi yungumo yungugl kra amedi mogl ana yene God mole dinambuka.

5 Na ene bogl moglka enge taragl ipre ene ditengra i ene pir moglkrimo? 6 Erme taragl ta ye konbo yongugl tongwa i ene pirkan erikwa. Yegl orkwa i okuwo God enge dipanduglmara yenan i ye ombunodi unongugl enambuka. 7 Ene pirkan erikwa, lo ka sendingwa mambuno i erme atnekra kongun eremoglkwa. Ba taraglmo i konbo aimande yongugltre mogl ana enge ta yenan angai tenambuka. 8 Yegl eran enge igle lo ka sendungwa yombamo ikra ombunodi unongugl enambuka. Ana Yaglkande Yesus yene unambuka enge, yene dra murumbuglomo mina yombamo i si-atne ende te ambuglangemo mina lo sendungwa yombamo i siderwagl erambuka. 9 Lo ka sendingwa yomba i Satan siriye sitenan ye unongugl pi, mambuno kimbi mina ye kongun giglendi ere ana kimagl ya diu kanekane erambuka. 10 Ba mambuno kinde orkwa i kakimbi merkinde dungwa. Yomba wau boraglkwa meglmara i ye kakimbi ditongwa. Ba wau boraglkwa yomba i God kamo piramnedi pirmbi, ana God pra ye ere-inambuka, ba ye God kamo kaima pir kiurikwa. 11 Mambuno ipre God eremogl kakimbi giglendi dungwa mambuno i-endungo ye kakimbi mambuno i pirngi dinaglkwa. 12 Yeglpre yomba ka kaima pirngi dikre ana mambuno kinde eraglkwa i keunde pir gun yeingwa, God ka tange tenambuka enge ye topono kinde inaglkwa.

13 Angrima wagle, Yaglkande ene pre munduwo pangwa ipre no engenge ene pre God diwakai yei tenamga, sraglpre, komnaiye kana God ene ere-ina pre kan panduglkwa. Ene God yombama moraglkwa pre Holi Spirit wu holi enaglmedi ana ene ka kaima i pirngi dingwa mambuno i mina God ene ere-yungwa. 14 No kamambuno wakai ditomga i mina ye ene pinde yungwa. I yegl orkwa pre nono Yaglkandeno Yesus Krais ambuglangemo ene ama inaglkwa. 15 Ipre angrima wagle ene andigl giglendi mogl ana no ka beke tomga, i drano mina mo pepa muno bogl tomga ikra ene akegidi molo.

16 Nono Yaglkande Yesus Krais ya te Neno God ye nono kanwakai yongwa. Te yene wakaimo mina ere endungo nono nomano engenge pokndungwa. Te nono akepledi norko pirngi dindre ana okuwo taragl wakai aimande inamga ipre sugl mounga. 17 Ana ene deno munduno ye sigigledi tendre te akepledi tenan ene mambuno wakai ere te ka wakai engenge dimoraglkwa.

<- 2 Tesalonaika 12 Tesalonaika 3 ->