49
Yakop Itou Puko-on Ile Pule-en Nedun Su
1 Inum pe Yakop iduwe nolou ile hun nedun su ndre sulo-on pe ipe ihpa, “Atsa ke hondroh, pe yu kupaninyan sa we hehir taduu kidu omur tih:
2 “Atsa ke hondroh pe atahrung, oduu nedun Yakop.
Atahrung tama’ oduu ke Israel.
3 “Ruben, kom tolun todo, puko-on todo ti ou.
Longoh odo eleheu todo ti yu uwepisi ou iyin munen.
Ile puko-oi pe rangai ihnding, eri ou emin kalai.
4 Ou ti ahpa ndre noren kup,
odoke we onso ke lo wambreh tan tintom su,
odosa ou anak ile sawen taman, pe opo mbrulun tih.
5 “Simeon pe Livai ti horu ndrin.
Painat ta horu ti ndrai idu madan.
6 Yu we kundrimin lon paruhur ta horu pwi,
pe we kunna lo sohou ta horu pwi.
Horu herempo loroh pe herenopwi ndramat hamat,
pe makau ma ndre more' su ti pe horu herentumbru-e
ndrike' su ile ke hono-on ndruwot.
7 Surur kile pule-en loroh ta horu,
odosa loroh erti homou we kindrundrotowei pwi.
Pe surur kile pule-en lon ndrinei nai ta horu,
odosa karundrum indrimin eriy pwi tih.
Yu we kutsarpadan oruu arla ke lenga' su nedun Yakop,
pe we ermin ke lenga' su Israel.
8 “Judah, tintom su we hosori rangam.
Su pidiwa tadam ti ou lumwem we kise wo' su.
Tintom su we hopo ruru kile tadam.
9 Ou ti ahpa ndre layon, Judah.
Layon ilrop anan yohou oh pe ina-au isa ndre omwen pe inemetir.
Iy kirotutlon iy ki-in ti ou si puko-om we eltukuni iy?
10 Judah, kendro tan king we kise lumwem,
pe we kindra-au odo lumwem pwi,
pe we ta yayam su ndresale.
Kantri we hohrung nolwu-um,
pe hehlingi ou kile sane,
pe we hopo ruru kile tadam.
11 Iy we kisswi donki tadan ma inek tapa eriy ti
kisso padan grapevine ndre sengin hutun lakopwi.
Kolos tadan we kisingen kile wain rama-an ihpa ndre ndrai.
12 Madam we kirma odo ke ing wain,
pe lehem we kiperer odo ke ing pon susun meme.
13 “Sebulun, ou ti we emin ngerin ndras.
Lom pasis tadam ti we kinehndrepit tan ndrolen yap.
Kapetne-et odo lonem eri we kilto ndre Saidon.
14 “Isakar eri ndrakika-an, odoke iy ti ihpa ndre donki itarah iyin lengan sedel pek.
15 Iy indroni ihpa ndre ndruhun mayau tadan ti huyen,
pe poyen ti huyen.
Ile pe iy ihran won ipe kisursor sane,
pe sa we hehkikiyan iy kile hono-on marai ta sa.
16 “Dan we kisini kakah ta su lewen.
Su eri we hahpa ndre metnemwen se yi odo Israel.
17 Dan eri we kihpa ndre mot iyin ngerin sal,
mot posin iyin ngerin sal ndre ineti kambrulken hos,
pe hos impiyen ndramat intaketi ile omur ea.
18 “Lapan, yu ungkeli-iy upwe Ou ehnuwii yu.”
19 “Gad eri raskel we hanak hun iy,
odoke iy we kipu pahun pe kidu omur ta su yi.
20 “Aser, ou lonem ti song huyene we he-en eriy.
Song odo lok tadam ti iy ndre sa king we henehwaso-o sa tih.
21 “Naptali ti ihpa ndre dia ndrukwil ndre inelila ile reh tadan,
pe intudou nedun eri pe nedun ti rahye' su.
22 “Yosep ti ihpa ndre donki puyep ise koson wo kolou,
ndre pwi homou nedun hos puyep ise padan lok.
23 Su pidiwa tadan hanak hun iy, pe ha-as iy ile panada.
24 Odoke iy lumwen tis panada tadan pe ipkwe,
odosa puko-on tadan ti iyus ngo Lapan Mandra-an ta Yakop,
Lapan tan Israel we madan kisso tadan pe kintawe puko-on kile tadan.
25 Lapan tan tamam ke Yakop we kihnuwii ou,
Lapan, taman sane ndre sulo-on we kipu blesim ou.
Lapan we kihlingi ou kile lengin indroh eleng pe wo indroh kwin poi,
Lapan we kihlingi ou kile sipsip pe sane ka-an sulo-on,
Lapan we kihnan su pedehnem hopo kom sulo-on,
26 Blesing Lapan iduwe tan tamam ti
ihluwen blesing ile pule-en puliy,
blesing Lapan iduwe tan tamam ti
ihluwen blesing ile pule-en sane ndre sulo-on odo padan puliy.
Ndre sulo-on kurti yu kah kuduwe kile mburmpalan Yosep,
kile mbrulin nedun king imin lenga' su tinton.
27 “Benjamin eri ihpa ndre mweh puyep ndre song iyin ndrinen.
Maping eri irop anan yohou pe inna-an.
Pehon eri iy intelnge sane iy inerupoi.”
28 Su kuti metnemwen ndre sungoh-pe-rupwing odo Israel. Tama' su impatenten su ti pe inesukuni sa iy ndre su we hehir kihpa eriy omur tih.
Mat ta Yakop
29 Inum ti pe Yakop isohou tan nedun su pe ipe ihpa, “Yu kumwet, eri atlatoni yu kule ndrodan tomo su kule ndre pehliy ilso lok tan Efron, lapan Hit tih. 30 Pehliy erti ilso rai ea odo Mamre, ise lok rangan Makpelah, odo Kenan. Abraham isihnen poi ndrodan ndre pehliy kurti odo hun Efron, ile ndruhun tunton ndramat. 31 Hedoni Abraham pe mbrulun ke Sarah ti ilto eriy, hedoni Aisak pe mbrulun ke Rebekah ti ilto eriy, pe yu udoni Leah ti ilto eriy yi. 32 Poi pe pehliy ise eriy kuti hesihnen odo ngon su Hit. Atlatoni yu kule eriy yi.”
33 Yakop isohou tan nedun su ile sohou ndre sulo-on kuti inum ti pe isori ndriken ndre rukei ile pule-en sau, irwi ngohon ke petsih, pe imet.
<- Lin 48Lin 50 ->