Lin 48

Yakop Itou Puko-on Ile Pule-en Efraim pe Manaseh

1 Ndruwen sane ndre sulo-on eti honum pe isto ndre omur yi, eri Yosep ihrung ihpa ndre taman ile sik idu poi. Ile pe iy ikuni nedun horu ndre rumuu, Manaseh pe Efraim, pe ile ilndre-et Yakop. 2 Sa homou inen ndralngan Yakop ihpa ndre nedun ke Yosep eri insa isendre-et iy, ile pe iy ititsan ke iy pe imin eleng pule-en sau tadan.

3 Yakop ipe ihpa, “Lapan Petngendrei ihir hu yu odo Lus, odo Kenan pe ipatihi yu. 4 Iy ipe ile todo ihpa, ‘Yu we kuhngahang ou kom sulo-on, kile pe yayam we hehir kile lok sulo-on. Yu we kuduwe lok kuti kile lonen yayam su ndresale.’ ”

5 Yakop ipe yi ihpah, “Yosep, kom tadam ndre rumuu, iy ndre yu unsa Isip mapwi pe tine' horu iduwe horu, eri nedu. Efraim pe Manaseh eri harahpa ke ndre kom ndre rumuu todo kamal, Ruben pe Simeon. 6 Ipe ye ou olpo se nedum kamal omur yi, eri su eti we nedum, pe we hokun poi pe sane se yi eri we hala pahndran Efraim pe Manaseh ea. 7 Yu umpo kurti odosa, tinem ke Resel ti imet, idu iy ndre yu mapwi uwus Mesopotemia upwe kule yi ndre Kenan tih. Iy imet odo ndrokoron sal, kah mukehe odo Efrata. Pe yu udoni iy idu ndre ngerin sal illa Efrata.” Efrata rangan mahkele ti Betlehem.

8 Israel indroni horu kom kamal nedun Yosep, eri pe ihndremte, “Horu kom kurti nedun si?”

9 Yosep ihpa, “Iy kurti horu nedu, iy ndre yu umwin kede pe Lapan ihlingi yu tih.”

Israel ihpa, “Okuni horu harsa, kile pe yu kupatihteh horu.” 10 Madan Israel eri indrekureu odosa iy ke inna lopun ndresale, pe kah isenendre-et isenehii pwi. Yosep iduwe horu kom ti harla hun iy, pe iy idekepti horu idu kanahan pe ihngwi purmada’ horu.

11 Yakop ipe ile ta Yosep, “Yu upwe ye kundrendre-et ou pwi yi, odoke mehkele eri Lapan ihnan pe yu usendre-et ndre ou pe nedum horu yi.”

12 Inum ti pe Yosep ikuni horu hara-au odo kanahan Israel pe ipu ruru ile tan taman, purmadan iltu-uw ndre poi. 13 Inum pe Yosep iduwe Efraim ile kamweu ta Yakop ea pe Manaseh ile mudon. 14 Odoke Israel iduwe lumwen ile ndraposeleh, eri pe lumwen mudon ile ye palan Efraim pe kamweu ile palan Manaseh. Manaseh eri tolun pe Efraim eri lusiyen. 15 Inum oh ti pe iy ipatihteh Yosep ihpah:

“Lapan, Ou ndre onu-us tomo horu, Abraham pe Aisak, eri opo blesim horu kom kutih!

Lapan, Ou eduwe yu umwin uu pe isto mehkele, eri opo blesim horu!

16 Engel kehe ndre enehnuwii yu odo horut todo ndre sulo-on, eri opo blesim horu!

Rongo pe ranga' horu tomo, Abraham pe Aisak we kindrene-en, eri we kindreh hun horu kom kutih.

Horu horpo kom kile sulo-on pe yaya' horu kihur.”

17 Yosep tawene tadan ihrut hepe odo iy indroni taman iduwe lumwen mudon ile palan Efraim, ile pe iy indretowe lumwen taman pe isori iyeu odo palan Efraim, pe iduwei ile palan Manaseh. 18 Inum pe iy ipe ile tan taman ihpa, “Tomo, indrahpa kiti pwi. Nedu kamal munen ti kurti, eduwe lumwen mudon ti kile palan.”

19 Taman indrehrung iy pwi, pe ipe ihpa, “Yu tuno, nedu. Yu tuno. Su yayan Manaseh eri we hohor hala sulo-on. Odoke su yayan Efraim eri we hohor hala sulo-on lakopwi pe we hehir hala lok mandra-ane.”

20 Ile pe iy ipu blesim horu idu rang eti pe ipe ihpa, “Su Israel we heneyuwen ranga' oruu kinto iy ndre su hapa hotou blesing tih. Su we hampa kihpa, ‘Lapan kihnan ou kihpa ndre Efraim pe Manaseh.’ ” Ile sal kuti pe iy iduwe Efraim ile munen pe Manaseh ile ye omur.

21 Inum ti pe Israel ipe ile ta Yosep, “Mundrun mat todo eri kah mukehe, odoke Lapan we kimmin ndrodan ou pe we kiduwe ou ala ndre lonen papum pe tinembrum su yi. 22 Lok huyen pe ndrolon mandra-an odo Sekem iy ndre yu ukuni tasu Amor odo pahun eri yu kah kuduwe kile tadam koson, tintom su eri pwi.”

<- Lin 47 Lin 49 ->