1 [a]Kawaa gematanoŋ Siwe gajoba 4 iŋiibe namowaa waŋgoŋa 4 iikanoŋ naŋgi. Yoŋonoŋ namowaa haamo Toya waŋa 4 ii somoŋgoŋ aŋgoŋ koma oŋoŋgi. Haamonoŋ namo qaganoŋ me kowe qaganoŋ gere moŋnoŋ laŋ qewabotiwaajoŋ mono Toya 4 ii borogianoŋ meŋ somoŋgoŋ naŋgi. 2 Anutunoŋ Siwe gajoba 4 ii namo ano kowe kondeema oŋombutiwaa ku-usuŋa oŋono namo waŋgoŋgianoŋ naŋgi. Kaeŋ naŋgi iŋiibe Siwe gajoba moŋnoŋ weeŋ koukoutanoŋga asugiŋ waaro iibe. Iinoŋ laaligowaa Toya Anutuwaa muŋgeŋ aaso taa gbaruya galeŋ koma kaŋ Siwe gajoba 4 yoŋoojoŋ kotakotagadeeŋ qaro.

3 [b]Qama qaa kokaeŋ iŋijoro, “Oŋo mono namo me kowe ii ilinziŋ alanzaŋ mende kondeema orombu ano gere ii mende tiwilaaŋ oŋombu. Ii qaagoto, mono mamboŋgi wala iliŋ alandeeŋ Anutunanaa muŋgeŋ aasoya ii gawoŋa meŋkejuti, iyoŋoo wambusooŋgianoŋ mokotaaŋ oŋomboŋa. Ii wala meŋ mokotaaŋ oŋoniŋgo gematanoŋ ii saanoŋ kondeema tiwilaawu.” 4 Kaeŋ iŋijoro Anutuwaa muŋgeŋ aasoya ii Israel ejemba tosaaŋa yoŋoo wambusooŋgianoŋ meŋ mokotaaŋ oŋoŋgi. Moŋnoŋ yoŋoo jaŋgogia jero kokaeŋ mobe: Israel ejemba tuuŋ 12 kuuya yoŋoonoŋga mindiriŋ ejemba 144,000 ii meŋ mokotaaŋ oŋoŋgi.

5 Israel tuuŋ motomotooŋ yoŋoonoŋga 12,000 kaaŋ kaaŋ meŋ mokotaaŋ oŋoŋgi. Juuda tuumbaa 12,000, Ruuben tuumbaa 12,000, Gaad tuumbaa 12,000, 6 Aser tuumbaa 12,000, Naftali tuumbaa 12,000, Manase tuumbaa 12,000, 7 Simeon tuumbaa 12,000, Liwai tuumbaa 12,000, Aiskar tuumbaa 12,000, 8 Zebulun tuumbaa 12,000, Joosef tuumbaa 12,000 ano Benjamin tuumbaa 12,000. Kaaŋ kaaŋ aaso meŋ mokotaaŋ oŋoŋgi mindiriŋ 144,000 kolooro. Kiaŋ.

9 Kawaa gematanoŋ tuuŋ jeta booroŋgoya jaŋgogia mende weeŋweeŋgoyaa so ii iŋiibe. Ejemba ii tuuŋgiaa so, beŋsakoŋ isigiaa so, kantrigiaa so ano qaa aro jejegiaa so ajorooŋ jiŋkaroŋ duŋ ano Lama meria yoroo bagaranoŋ naŋgi. Iikanoŋ nama maleku koriga taaŋa kotogoŋ aogi kemero borogianoŋ tombi seŋa boriawo meŋ naŋgi. 10 Ii meŋ nama kotakotagadeeŋ qama kokaeŋ jegi, “Anutunananoŋ jiŋkaroŋ duŋanoŋ raji ano Lama meria yoronoŋ mono meŋ letoma nononi oyaŋboyaŋ koloojoŋ.”

11 Kaeŋ qama jegi Siwe gajoba kuuya yoŋonoŋ jiŋkaroŋ duŋ kosianoŋ areŋnoŋ nama Anutuwaa jotamemeya ano beŋ jawiŋuruta 4 ii liligoŋ oŋoŋgi. Kaeŋ nama jiŋkaroŋ duŋ batanoŋ usugoŋ kamaaŋ simiŋ kuma Anutu waeya meŋ mepeseeŋ mugi. 12 Anutu mepeseeŋ muŋ kokaeŋ jegi, “Qaa ii oŋanoŋ! Anutu gii mono kotumotue, asamararaŋ ano momakooto uutaa Toya koloojaŋ. Nononoŋ gii mepeseeŋ goma qabuŋaga jeŋ somariiŋkejoŋ. Anutunana, giinoŋ esuŋmumu ano ku-usuŋ Toya koloojaŋ. Nononoŋ kambaŋ so kaeŋ jeŋ kotiiniŋ Toya ii tetegoya qaa laligoŋ uma laligowaa. Qaa ii oŋanoŋ!”

13 Kaeŋ mepeseeŋ jegi Anutuwaa jotamemeya yoŋoonoŋga moŋnoŋ kokaeŋ jeŋ qisiŋ nono, “Ejemba maleku koriga taaŋa mouma nanjuti, ii daaŋ yoŋonoŋ? Ii mono dakanoŋga kaŋ kaeŋ ajorooŋ nanju?”

14 [c]Qisiŋ nono kokaeŋ meleema mube, “Oo somatana, niinoŋ ii mende mobe geeŋgodeeŋ mojaŋ.” Kaeŋ meleema mube jotamemeya iinoŋ kokaeŋ nijoro mobe, “Kakasililiŋ somataa biiwianoŋga kougiti, iyoŋonoŋ mono ii kolooju. Lama meriaa sayanoŋ opo malekugia soŋgbano taaliro laligogi. 15 Kaaŋa laligogitiwaajoŋ ama Anutuwaa jiŋkaroŋ duŋa jaasewaŋ qeŋ asaga gomantiiŋa mepemepesee jigoyanoŋ (tempel) laligoŋ Anutuwaanoŋ gawoŋ meŋ laligowuya. Kaeŋ laligogi jiŋkaroŋ duŋanoŋ raji, iinoŋ mono opo kuuŋa mororoŋgoŋ koma turuŋ oŋono laligowuya.

16 [d]“Kaeŋ laligogi kambaŋ moŋnoŋ nembanenewaa me apuwaa mende komuwuya. Weeŋnoŋ me iwoi geriawo moŋnoŋ mende jeŋ kotoŋ oŋombaa. 17 [e]Kokaembaajoŋ oyaŋboyaŋ laligowuya: Lama merianoŋ jiŋkaroŋ jake biiwianoŋ rama galeŋ koma oŋoma uŋuano laaligo kotigaa apu gowoyaa jaayanoŋ kemakebu. Anutu aŋo jaagianoŋga jauŋgia kuuya kotoro tegowaa.” Kiaŋ.

<- Aisisaaŋ 6Aisisaaŋ 8 ->