1 Jeikobnoŋ kaeŋ jeŋ mesaoŋ kana toroqeŋ kema weeŋ koukoutaa kanageso yoŋoo balonoŋ keuro. 2 Kanoŋ keuma baloŋ korianoŋ apu roŋ moŋ iiro. Miri toya yoŋonoŋ lama tuuŋgia uŋuama iikanoŋ apu oŋoma laligogi. Kambaŋ kanoŋ apu roŋ kawaa kosianoŋ lama tuuŋ karooŋ egi apu roŋ qaa ootanoŋ jamo somata ii mende metaŋgi. 3 Lama galeŋ yoŋonoŋ wala lama tuuŋgia kuuya iikanoŋ meŋ kululuuŋ oŋoma jamo ii apu roŋ qaa ootanoŋga gbililiŋgogi kenogo lamaurugia apu oŋoŋgi negi jamo ii mombo duŋanoŋ komakegi.

4 Jeikobnoŋ lama galeŋ ii kokaeŋ qisiŋ oŋono: “Eja alauruna, oŋo dakaya?” Qisiŋ oŋono “Nono Harambaajoŋa,” kaeŋ meleema mugi.

5 Meleema mugi kokaeŋ qisiŋ oŋono: “Oŋo Naahorwaa esia Laban moma muju me qaago?”

Qisiŋ oŋono “Saanoŋ moma mujoŋ,” jegi.

6 Jegi kokaeŋ qisiŋ oŋoma jero: “Ii saanoŋ laligoja me qaago?”

Kaeŋ jero kokaeŋ ijogi: “Ii saanoŋ laligoja. Iiba, iwaa borata Reizelnoŋ mono endu lama uŋuama kaja.”

7 Kaeŋ ijogi Jeikobnoŋ jero: “Iibu, weeŋ somata ero lama ii gomantiiŋaajoŋ kululuuŋ oŋombombaa kambaŋanoŋ mende torija. Kawaajoŋ saanoŋ lamagia apu oŋoŋgi negi mombo uŋuama laaligogianoŋ kema oŋooŋgi nenegia newu.”

8 Kaeŋ jero kokaeŋ meleeŋgi: “Kaeŋ saanoŋ mende amboŋa. Wala lama tuuŋ kuuya kululuuŋ oŋoma jamo ii apu roŋ qaa ootanoŋga gbililiŋgoniŋ kenogo mono lamaurunana apu oŋoniŋ newuya.”

9 Jeikobnoŋ yoŋowo qaa kaeŋ amiŋ moma naŋgi iikanoŋadeeŋ Reizelnoŋ maŋaanoŋ lama tuuŋ uŋuama karo. Reizel iinoŋ lama galeŋ gawoŋ meŋ laligoro. 10 Karo Jeikobnoŋ owayaa borata Reizel ano owayaanoŋ lama tuuŋ iŋiima apu roŋ qaa ootanoŋ kema jamo ii metaama owaya Labambaanoŋ lamauruta apu uŋuagiro. 11 Uŋuagidaboroŋ Jeikobnoŋ Reizel buuta kitoŋ neŋ kanaiŋ kotakota qama saaro.

12 Saama Reizelwaajoŋ jero: “Nii goo maŋgaa tinitosaya koloojeŋ. Nii Rebekawaa meriaga.” Kaeŋ jero Reizelnoŋ moma uulaŋawo bobogariŋ maŋaanoŋ kema buzu ii jero moro. 13 Labanoŋ naaŋaa meria Jeikobwaa buzuya moma ii uulaŋawo mokoloomambaajoŋ keno. Kema mokolooŋ iima suuŋgoŋ aŋgomuŋ buuta kitoŋ neŋ wama mirianoŋ uri. Uma iwoi kuuya kolooroti, Jeikobnoŋ iikawaa sunduya jero moro. 14 Ii moma kokaeŋ jero: “Saanoŋ, giinoŋ neenaa sakitina koloojaŋ.” Kaeŋ jero koiŋ motooŋgowaa so iwo rama laligoro. Kiaŋ.

15 Kaeŋ laligoro Labanoŋ Jeikob kokaeŋ ijoro: “Gii tinitosana laligojaŋiwaajoŋ tawaga qaa eeŋ weleŋ qeŋ nombabo. Ii mende sokombaa. Kawaajoŋ tawaga dawi mewagiwaajoŋ mojaŋi, ii saanoŋ jena momaŋa.” 16 Labambaa borawoita woi laligori. Somataa qata Lea. Kogaa qata Reizel. 17 Leawaa jaayanoŋ iima-aiŋaiŋawo kolooroto, Reizel seliaa kaitania ano jaasewaŋa ii kuuya iima-aiŋaiŋawo totooŋ kolooro.

18 Jeikobwaa uunaaŋa ii Reizelwaanoŋ erotiwaajoŋ ama qaa kokaeŋ jero: “Niinoŋ boraga kanageŋa Reizel memambaajoŋ saanoŋ yambu 7 weleŋ qeŋ goma laligomaŋa.”

19 Kaeŋ jero kokaeŋ ijoro: “Ii eja morota moŋ mube mende sokombaboto, gii gombe sokombaa. Kawaajoŋ saanoŋ niwo koi laligowa.” 20 Kaeŋ jero Reizel memambaajoŋ yambu 7 weleŋ qeŋ muŋ laligoro. Uunaaŋanoŋ Reizelwaajoŋ erotiwaajoŋ ama yambu iikawaajoŋ moro weeŋ afaaŋa tani kolooro. Kiaŋ.

21 Yambu 7 tegoro Jeikobnoŋ owaya Laban kokaeŋ ijoro: “Noo gawoŋ meme kambananoŋ mono tegojiwaajoŋ saanoŋ embana Reizel nona iwo eŋ laligomaŋa.” 22 Labanoŋ qaa ii moma miri toya kuuya horoŋ kululuuŋ oŋoma lombaŋ ano neŋ korisoro aŋgi. 23 Ii aŋgi tegoro gomaŋ tiiro Labanoŋ borata Lea wama kema Jeikob muro miri uutanoŋ uma motooŋ eri. 24 Labanoŋ weleŋ embia qata Zilpa ii borata Leawaa weleŋqeqeyaga laligowaatiwaajoŋ muro. 25 Motooŋ eri gomaŋ ano Jeikobnoŋ embia iima moro Reizel qaagoto, ii Lea kolooro yooyaanoŋ kema kokaeŋ jeŋ muro: “Gii mono naa terega ama nonjaŋate? Nii Reizel memambaajoŋ weleŋ qeŋ goma laligoweto, gii mono naambaajoŋ tiligoŋ nonjaŋ?”

26 Ii moma meleema kokaeŋ ijoro: “Gomaŋ kokanoŋ data eeŋ laligoro koganoŋ eja mewaatiwaa nanamemeŋa ii nonoonoŋ mende eja. 27 Kawaajoŋ saanoŋ maraŋ korisoro ii Leawo sonda motooŋgowaa so laligoŋ aisoona tegoro koga kaaŋagadeeŋ gomaŋa. Ii mewaatiwaajoŋ mono kaaŋagadeeŋ yambu 7 toroqeŋ weleŋ qeŋ noma laligowa.”

28 Kaeŋ ijoro uumotooŋgo ama Leawo maraŋ korisoro kambaŋ ii sonda motooŋgowaa so laligoro tegoro Labanoŋ borata Reizel kaaŋagadeeŋ embia koloowaatiwaajoŋ muro. 29 Labanoŋ weleŋ embia qata Bilha ii borata Reizelwaa weleŋqeqeyaga laligowaatiwaajoŋ muro. 30 Jeikobnoŋ Reizel ii kaaŋagadeeŋ embiaga mero. Uunaaŋanoŋ Reizelwaajoŋ erotiwaajoŋ ama Reizel ii Lea uuguŋ jopagoŋ muŋ laligoro. Kawaajoŋ yambu 7 toroqeŋ Laban weleŋa qeŋ muŋ laligoro. Kiaŋ.

31 Jeikobwaa uutanoŋ Leawaajoŋ mamaga mende ero zizi togoro Poŋnoŋ iiro mende sokono Lea koro ambaatiwaajoŋ ilaaŋ muroto, koga Reizelnoŋ aruŋa laligoro. 32 Leanoŋ korowo kolooŋ laligoŋ mera ejaga meŋ qaa kokaeŋ jero, “Poŋnoŋ tapekokorona iiro lonanoŋ saanoŋ kanaiŋ jopagoŋ noma laligowaa.” Kaeŋ jeŋ qata iikawaa so Ruuben qaro. (Ruuben = Tapekokorona iiro.) 33 Kanageŋ mombo koro ama mera eja moŋ meŋ qaa kokaeŋ jero: “Lonanoŋ melaada jopagoŋ nono Poŋnoŋ ii moma mera koi kaaŋagadeeŋ nonja.” Kaeŋ jeŋ qata iikawaa so Simeon qaro. (Simeon = Gejianoŋ moro.)

34 Kawaa gematanoŋ mombo koro ama mera eja moŋ meŋ qaa kokaeŋ jero: “Nii merauruta karooŋ lonaajoŋ oŋonjeŋiwaajoŋ iinoŋ mono kanaiŋ uuta niwo somoŋgowaa.” Kaeŋ jeŋ qata iikawaa so Liwai qaro. (Liwai = Uuta somoŋgowaa.) 35 Kawaa gematanoŋ duŋanoŋ mombo koro ama mera eja moŋ meŋ qaa kokaeŋ jero: “Nii kambaŋ kokaamba Poŋ mepeseejeŋ.” Kawaajoŋ qata iikawaa so Juuda (mepemepesee) qaro. Kawaa gematanoŋ mera mombo mende mero. Kiaŋ.

<- Jenesis 28Jenesis 30 ->