Jenesis (Letoqeto)

Anutunoŋ jero iwoi kuuya letoŋgi.

Jeŋasa-asari

Buk koi kanoŋ sundu koi kaaŋa jeja: Anutunoŋ siwe, namo, iikawaa iwoiya kuuya ano ejemba mokolooŋ orono siŋgisoŋgonoŋ kamaaŋ ururo lombo siimboboloyawo ii baloŋ so ananaa qanananoŋ uro. Kaeŋ kamaaŋ nunuro Anutunoŋ oyaŋboyaŋ mokolooŋ laligowombaajoŋ kana nomaaŋa ii areŋgoŋ ano. Letoqeto (Jenesis) buk kokawaa uutanoŋ bakaya woi kokaeŋ ejao:

1) Boŋ 1-11 Sundu kanakanaiya: Anutunoŋ siwe ano namo mokolooŋ orono ejemba yoŋoo laaligogianoŋ wala eeŋanoŋ nomaeŋ kolooro. Aadam ano Iiw, Kein ano Aabel yoŋoo sundugia. Nooawaa kambaŋanoŋ gboulu somata waama namo tururo. Babilon kanoŋ taua koriga totooŋ megi.

2) Boŋ 12-50 Israel yoŋoo bemunjaleurugia yoŋoo sundugia: Wala Aabrahamnoŋ Anutu moma laariŋ qaaya teŋ koma laligoro qaaya jeŋ tegoro solaŋaniro. Iwaa gematanoŋ meria Aisak, esia Jeikob qata moŋ Israel ano iwaa merauruta 12 yoŋoo sundugia kania kania. Eja 12 ii Israel kanagesowaa tuuŋ 12 yoŋoo bemunjalegiaga koloogi. Bemunjale Joosefwaa sundu ii qaita moŋ. Nomaeŋ kolooro Joosefnoŋ wala Iijipt keno iwaa gematanoŋ maŋa Jeikob ano daremuŋuruta kuuya yoŋonoŋ kanageŋ kaaŋagadeeŋ sumaŋurugia iyoŋowo Iijipt kantrinoŋ kema waba laligogi.

Buk koi kanoŋ ejemba yoŋoo laaligogiaa sunduya mamaga jejato, Anutunoŋ nomaeŋ ama oŋonoti, iikanoŋ sundu iikawaa bakaya waŋa kolooja. Laaligowaa sundu kuuya iikawaa nanamemeŋ eja waŋa ii Anutu. Kanakanaiyanoŋ siwe, namo ano iyoroo iwoigara kuuya mokolooŋ oŋono siŋgisoŋgonoŋ kamaaŋ ururo pondaŋ Maŋgia oŋa laligoŋ kileŋagia gosiŋ qaagia jeŋ tegoŋ iroŋgia meleema oŋono qagianoŋ uro laligogi. Tosianoŋ Anutuwaa qaa baatanoŋ keŋgiti, ii awaagadeeŋ kalaŋ koma uŋuano laaligogianoŋ iikawaa so utegoŋ asugiro. Nooawaa kambanoŋ sumaŋuruta 8 yoŋonoŋ qaagoto, ejemba tosaaŋa kuuya yoŋonoŋ komugi. Kanageŋ soomoŋgo qaaya ii Aabraham ano gbiliuruta kanageŋ koloogiti, ii oŋono. Soomoŋgo qaa iikawaa so Anutunoŋ kanagesouruta oyaŋboyaŋ mokoloowutiwaajoŋ galeŋ koma oŋono laligoŋ kouma laligoŋ kougi. Ejembanoŋ wala eeŋanoŋ nomaeŋ Anutu moma laariŋ mugiti, sundu towoya iikanoŋ kambaŋ kokaamba kaaŋagadeeŋ momalaarinananoŋ kotiiŋ gbilia ewaatiwaajoŋ ilaaŋ nonomakeja.

Buk kokawaa bakaya waŋa 10 ii kokaeŋ:

1) Siwe, namo ano iwoi kuuya mokolooro. 1.1–2.25

2) Siŋgisoŋgowaa lombo siimboboloyawo kanairo. 3.1-24

3) Aadambaa kambaŋanoŋga kanaiŋ Nooawaanoŋ kouro. 4.1–5.32

4) Nooawaa kambaŋanoŋ apu gboulu somatanoŋ waaro. 6.1–10.32

5) Babilon miri koriga totooŋ megi. 11.1-9

6) Seembaa kambanoŋga kanaiŋ Abrambaanoŋ kouro. 11.10-32

7) Bemunjale karooŋ Aabraham, Aisak ano Jeikob 12.1–35.29

8) Iisoowaa gbiliuruta ii kokaeŋ: 36.1-43

9) Joosef ano iwaa daremuŋuruta 37.1–45.28

10) Israel kanageso yoŋonoŋ Iijipt laligogi. 46.1–50.26

1 Kanakanaiyanoŋ Anutunoŋ Siwe ano namo mokolooŋ orono. 2 Mokolooŋ orono namo ii gbameŋa ano kijikajuyawo ero. Ero apu aŋgoŋ dusiitawo ii paŋgamanoŋ esuuro ero. Kaeŋ ero Anutuwaa Uŋa Toroyanoŋ apu iikawaa qaganoŋ kema kaŋ laligoro. 3 *2 Kor 4.6 Kaeŋ laligoro Anutunoŋ kokaeŋ jeŋ kotoro: “Asasaga mono asugiwa.” Kaeŋ jeŋ kotoro gomaŋ mono asariro. 4 Asariro iiro awaa kolooro asasaga ano paŋgamaŋ mendeema orono. 5 Asasagaa qata weeŋ ano paŋgamambaa qata gomantiiŋa kaeŋ oroono. Kaeŋ oroono weemboria mutuya tegoro gomaŋ tiiŋ ano.

6 *2 Piito 3.5 Ano Anutunoŋ kokaeŋ jeŋ kotoro: “Mono apu batugianoŋ sombimbaa jawo kotiga asugiŋ apu mendeeno eugeŋ ano emugeŋ ewao.” 7 Kaeŋ jeŋ kotoŋ sombimbaa jawo kotiga mokolooŋ iikanoŋ apu mendeeno deema jawo qaganoŋ eugeŋ ano jawo baatanoŋ emugeŋ eri. Kaeŋ kolooro. 8 Anutunoŋ sombimbaa jawo kotiga eugeŋaa qata sombiŋ qaro. Kaeŋ qaro weemboria woiya tegoro gomaŋ mombo tiiŋ ano.

9 Ano Anutunoŋ kokaeŋ jeŋ kotoro: “Apu sombiŋ baatanoŋ ejuti, ii mono meŋ kululuugi tuuŋ motooŋgo kolooro namo toboga asugiwa.” Kaeŋ jeŋ kotoro mono kaeŋ asugiro. 10 Kaeŋ asugiro tobogaa qata namo qama apu tuuŋ somata kululuugiti, iikawaa qata kowe oroono. Orooma iriiro iikanoŋ mono awaa kolooro. 11 Awaa kolooro kokaeŋ jeŋ kotoro: “Namo qaganoŋ mono iwoi toŋgoŋa kuuya kokaeŋ asugiŋ waabu: Loloo gbojoja iwoi kogiawo ii mono asugiŋ waama kuuŋ sogoŋkebu. Gere kasa tanigia kania kania mono namonoŋ asugiŋ hoŋgia kogiawo kuuŋ sogoŋkebu.” Kaeŋ jeŋ kotoro mono kaeŋ asugiro: 12 Namo qaganoŋ iwoi toŋgoŋa kuuya asugiŋ waagi. Loloo gbojoja iwoi kogiawo tanigia kania kania ii asugigi. Gere kasa tanigia kania kania ii namonoŋ asugiŋ hoŋgia kuuŋ sogogi. Kaeŋ asugiro Anutunoŋ iŋiiro iikanoŋ mono awaa kolooro. 13 Weemboria karooŋa tegoro gomaŋ mombo tiiŋ ano.

14 Ano Anutunoŋ kokaeŋ jeŋ kotoro: “Sombimbaa jawo kotiganoŋ mono asasaga asugiŋ weeŋ ano gomantiiŋa ii mendeema oroma nama (yara) yambu, koŋuru kambaŋ ano weeŋ kambaŋ, gbani kambaŋ ano weemboria motomotoombaa aiweseyaga ewu. 15 Iikanoŋ mono sombimbaa jawo kotakota kanoŋ asasaga ano namo meŋ asariwu.” Kaeŋ jeŋ kotoro mono kaeŋ asugigi: 16 Anutunoŋ asasaga somata woi mokolooŋ orono: Asasagaa galeŋa weeŋ jaaya nano iikawaa kamakamaata koiŋ ii gomantiiŋaa galeŋaga nama eŋ ubao. Seŋgelao ii kaaŋiadeeŋ mokolooŋ oŋono. 17 Anutunoŋ ii sombimbaa jawo kotiga iikanoŋ namo meŋ asariwutiwaajoŋ oŋoono. 18 Ii namo meŋ asariŋ weeŋ ano gomantiiŋaa galeŋgiaga nama asasaga ano paŋgamaŋa mendeema orombutiwaajoŋ oŋoono. Kaeŋ asugiro Anutunoŋ iŋiiro iikanoŋ mono awaa kolooro. 19 Weemboria 4:ya tegoro gomaŋ mombo tiiŋ ano.

20 Ano Anutunoŋ kokaeŋ jeŋ kotoro: “Apu kowe iikawaa uutanoŋ mono iwoi isiŋosoŋgiawo asugiŋ sokoma apu qeŋ kondondoŋgoŋ laŋ kema kaŋ laligowu. Kaaŋiadeeŋ kooŋa kooŋa namo qaganoŋ kanakeewaŋ elelaoŋ kotoŋ kema kaŋ laligowu.” 21 Kaeŋ jeŋ kowewaa oroya somasomata ano iwoi isiŋosoŋgiawo tanigia kania kania apu qeŋ kondondoŋgoŋ qeqelala kema kaŋkejuti, ii mokolooŋ oŋono. Kaaŋagadeeŋ kooŋ tanigia kania kania eŋgaŋgiawo ii mokolooŋ oŋono. Mokolooŋ oŋoma iŋiiro iikanoŋ mono awaa kolooro. 22 Awaa kolooro kotuegoŋ oŋoma qaa kokaeŋ jeŋ kotoro: “Oŋo mono ko meragiawo juma seiŋ apu kowe sokoma laligowu ano kooŋ oŋo mono kaaŋiadeeŋ namo qaganoŋ kolooŋ seiwu.” 23 Qaa kaeŋ jeŋ kotoro weemboria 5:ya tegoro gomaŋ mombo tiiŋ ano.

24 Ano Anutunoŋ kokaeŋ jeŋ kotoro: “Namo qaganoŋ mono iwoi kuuya laaligogiawo tanigia kania kania asugiwu. Miriwaa oroya, iwoi bagianoŋ koma kondondoŋgoŋkejuti ano duuyaa oroya tanigia kania kania, ii mono asugiwu.” Kaeŋ jeŋ kotoro mono kaeŋ asugigi: 25 Anutunoŋ duuyaa oroya tanigia kania kania ii mokolooŋ oŋono. Miriwaa oroya tanigia kania kania ii mokolooŋ oŋono ano iwoi kuuya bagia namonoŋ koma kondondoŋgoŋkejuti, tanigia kania kania ii mokolooŋ oŋono. Mokolooŋ oŋoma iŋiiro iikanoŋ mono awaa kolooro. Kiaŋ.

26 *1 Kor 11.7 Kawaa gematanoŋ Anutunoŋ kokaeŋ jeŋ kotoro: “Ayo, anana mono eja ananaa tani kaaŋa meniŋ iwoi kuuya galeŋ koma oŋoma laligowa. Iwoi kuuya ii kowewaa soraya, sombimbaa kooŋa ano miriwaa oroya, namo kuuya ano iwoi kuuya bagia namonoŋ koma kondondoŋgoŋkejuti, mono iyoŋoo galeŋgiaga kolooŋ laligowa.” 27 *Mat 19.4; Maak 10.6*Jen 5.1-2 Kaeŋ jeŋ kotoŋ iyaŋaa kaitaniaa so eja mokolooro. Anutuwaa kaitania kaaŋa laligowaatiwaajoŋ ii mokolooŋ muro. Eja ano emba laligowaotiwaajoŋ ii mokolooŋ orono. 28 Mokolooŋ oroma ii kotuegoŋ kokaeŋ jeŋ kotoŋ orono: “Oro mono gbili mokoloori kolooŋ seiŋ ama baloŋ sokoma laligowu. Kaeŋ laligoŋ baloŋ toya koloowu. Kaeŋ kolooŋ kowewaa soraya, kanakeewambaa kooŋa ano oro mokoleŋ lagiso buubuu namonoŋ kema kaŋkejuti, mono ii kuuya galeŋ koma poŋgia kolooŋ laligowu.” 29 Kaeŋ jeŋ kotoŋ qaa kokaeŋ irijoro: “Mobu, niinoŋ monjaŋ logoya kania kania baloŋ kuuya sokoma asugiŋ waama kogia kuuŋ sogoŋkejuti ano gere kasa kuuya hoŋ kogiawo kuuŋ sogoŋkejuti, iikanoŋ nembanenegia koloowaatiwaajoŋ anjeŋ. 30 Duuyaa oroya kuuya, kanakeewambaa kooŋa kuuya ano iwoi kuuya namonoŋ kema kaŋkejuti ano tosia kuuya sewaŋ aasoŋ horoŋkejuti, iyoŋoojoŋ loloo gbojoja toŋgoŋa kania kania ii nenegia koloowaatiwaajoŋ anjeŋ.” Qaa kaeŋ jero mono kaeŋ asugiro. 31 Asugiro Anutunoŋ iwoi kuuya mokolooroti, ii iiro awaa totooŋ kolooro keraqeeaŋgo moro. Weemboria 6:ya tegoro gomaŋ mombo tiiŋ ano. Kiaŋ.

Jenesis 2 ->