1 Niinoŋ uumeleeŋ kanagesowaa jotamemeya moŋ kolooŋ Kraistnoŋ siimbobolo moroti, iikawaa qaaya naŋgoŋ jeŋkejeŋ. Kanageŋ eleema karo asamararaŋanoŋ asugiro qabuŋa nono mokoloomambaajoŋ mojeŋ. Oŋoo batugianoŋ noo jotameme alauruna koloojuti, niinoŋ oŋoo uugia kokaeŋ kuuŋ oŋonjeŋ: 2 [a]Anutunoŋ moma laariŋ oŋoma lama tuuŋa borogianoŋ anoti, oŋonoŋ mono ii kalaŋ koma oŋoma laligowu. Gawoŋ ii mojotiitii qaganoŋ qaagoto, Anutuwaa jeta otaaŋ uusiiŋgia gawonoŋ ama afaaŋgoŋ geregere qaganoŋ zeŋ meŋ nambu. Mondomondo qaganoŋ injarere laligoŋ moneŋ iwoiwaajoŋ mende kaparaŋ koma laligowu.

3 Lama tuuŋ baagianoŋ kaŋ nanjuti, ii mono eja poŋ tani kaaŋa mende galeŋ koma oŋombu. “Zioz galeŋ koloojoŋ,” jeŋ totogianoŋ mende qeŋ meŋ biwiiŋ aowuto, nanamemembaa sili awaa ii lama tuuŋ qendeema oŋoma laligowu. 4 Nanamemeŋ awaa ama laligogi lama galeŋ waŋanoŋ mombo asugiwaati, kambaŋ iikanoŋ mono soroŋ arogianoŋ kotogoŋ ila wage akadamuyawo waŋgianoŋ mouma somoŋgogi buŋa qeŋ aowuya. Akadamu iikanoŋ mono kambaŋ moŋnoŋ mende taaliŋ titiikota koloowaa. Kiaŋ.

5 [b]Sagbili oŋonoŋ kaaŋagadeeŋ galeŋurugia yoŋoo qaa baatanoŋ kema laligowu. “Anutunoŋ sewaŋkiki ejemba tuarenjeŋ ama oŋomakejato, iyaŋgia meŋ kamaaŋ aoŋkejuti, ii mono kaleŋmoriaŋa oŋomakeja.” Kawaajoŋ oŋo mono korebore batugianoŋ oŋoaŋgia meŋ kamaaŋ aoŋ laligowu. Tani iikanoŋ mono maleku kaaŋa kotogogi kemero laligowu. 6 [c]Kawaajoŋ mono oŋoaŋgia meŋ kamaaŋ aoŋ Anutuwaa boro ku-usuŋawo iikawaa baatanoŋ keŋgi kambaŋanoŋ kaŋ kuuro saanoŋ meŋ biwiiŋ oŋombaa. 7 Buŋa qaa moŋ ii kokaeŋ eja, “Iinoŋ oŋo kalaŋ koma oŋomakejiwaajoŋ majakakagia kuuya mono iwaa boronoŋ ama mesaowu.”

8 Nanamemeŋgia galeŋ koma aoŋ zeŋ nama pondaŋ uugbiligbili laligowu. Kileŋaa Toyanoŋ laŋ liligoŋ ejemba tuarenjeŋ ama moŋgama nonomakeja. Moŋnoŋ uruambe qero iinoŋ mono laion kaaŋa gogoŋ nonomambaajoŋ jojorija. (Laionoŋ gbuu gbororo qama silano moma bomboŋgaogia waamakeja.) 9 Oŋo siimbobolo momakejuti, oŋoo uumeleeŋ alaurugianoŋ kaaŋiadeeŋ gomaŋ so kakasililiŋ iikayadeeŋ moma mokosiŋgoŋ laligoju. Ii romoŋgoŋ torokogia yakariŋ momalaarinoŋ rindaŋgoŋ nama laion ii kotakotagadeeŋ tuarenjeŋ ama muŋ laligowu.

10 Oŋo kambaŋ torodaamoŋ siimbobolo moma laligogi mososoŋgoŋ naŋgoŋ meŋ kotiiŋ oŋonogo saanoŋ nenduŋ powowoŋ kotiganoŋ koŋgbaraya qaa nama laligowuya. Kaaŋa Kraistwo naŋgigo akadamuya togoŋ oŋono asamararaŋanoŋ uma tetegoya qaa asariŋ laligoŋ ubuya. Anutu, kaleŋmoriaŋ kuuyaa Toya kolooji, iinoŋ mono oŋo kaeŋ ama laligowutiwaajoŋ oŋoono. 11 Iinoŋ ku-usuŋ Toya laligoŋ kouma laligoja ano kambaŋ tetegoya qaa laligoŋ uma laligowaa. Qaa ii oŋanoŋ.

12 [d]Anutuwaa kaleŋmoriaŋ ii kiaŋkomu hoŋa tooŋ kolooja. Niinoŋ qaa ii kotiiŋ naŋgoŋ jeŋ oŋonoŋ kaleŋmoriaŋ iikanoŋ naŋgoŋ nama kotiiŋ laligowutiwaajoŋ jeŋ kotoŋ oŋonjeŋ. Kawaajoŋ tere toroga koi jewe neŋana Sailasnoŋ ooŋ oŋonja. Iinoŋ niwo pondaŋ nama uumeleeŋ neŋana kolooja. Iwaajoŋ kaeŋ romoŋgojeŋ.

13 [e]Anutunoŋ uumeleeŋ kanageso oŋo kaaŋa iyaŋaajoŋ meweeŋgoŋ oŋono Babilon siti bologa kanoŋ[f] laligojuti, iyoŋonoŋ yeizozogia aŋgi oŋoonoŋ kaja. Momalaariwaa merana Maak iinoŋ kaaŋagadeeŋ yeizozoya anja. 14 Oŋo batugianoŋ waegia meŋ aŋgoŋ aoŋ newogia kososooŋ laligowu.[g]

Alaurunana Kraistwo qokotaaŋ nanjuti, luaenoŋ mono kuuya oŋowo ewa. Kiaŋ.

<- 1 Piito 4