1 Ebu hena tuḡure viganiꞌa ḡaboziteꞌe vuḡa boro ihohiro. Aꞌe galasi deheḡa bagaḡa teige agararo. Vu boro eꞌeꞌa Badiꞌa zu Mamoe Ubuga kini ehoro iḡuꞌanonoꞌo sore buaro, 2 ebu ne boro ibiḡa boro nemaḡa sore onamiro. Vu boro naenaeoꞌe ḡabone ziniꞌeteꞌe ireḡa eꞌe. Ire eꞌe maḡa iraḡa nunuꞌe gaubanana aheu fare, ebu maḡa tibatibaꞌe bato tibatiba zamaḡano hudauꞌohe. Eꞌe ireḡa rouḡaꞌe habaꞌahabaꞌa azaḡa ugionoꞌo manozeꞌohe. 3 Ne boro eꞌe zamaḡanoꞌe radiu tuḡutuḡu adugaḡa mene bare hidiꞌuma. Eꞌea Badiꞌa zu Mamoe Ubuga kini ehoro iḡuꞌa eꞌe, ebu Badiꞌa tuḡure azaḡaniꞌa ani mazao kuraꞌuma. 4 Zeꞌe Badiꞌa iraḡa horoniꞌuma ebu Badiꞌa niꞌe zehereze ranao mirihiꞌuma. 5 Eꞌea ohereꞌe mene bare horoniꞌuma, ebu ihure ga mada agaḡa mene uratiꞌuma, mazaḡa Zuhiꞌa Boro Badiꞌaꞌa agaḡa ziniꞌuma. Ebu zeꞌe ḡau niduꞌa zuhiꞌaziꞌuma onamo tuḡutuḡu.

6 Tuḡure viganiꞌa ꞌahige ihiro, “Ḡoere ꞌahi niduꞌaꞌe ḡoere huga zu vazeꞌa mae ḡihineꞌeteꞌe ḡoeꞌa. Zuhiꞌa Boro Badiꞌaꞌa ane Vine peroveta azaḡa ziniꞌohe. Ani naginiꞌa ḡarihe fureratiteꞌe moneo ane tuḡure azaḡa ihozifine ane tuḡure viga tuḡuniro.” 7 Iesuꞌa ꞌahige rae reiro, “Ḡianoꞌi, e ḡarihe ariꞌuma! Buka ꞌahi zamaḡano irina rae fureniroteꞌe ḡoeꞌa hegoteꞌeteꞌe vazeḡaꞌe matuꞌeꞌohe.”

8 Eḡe, Ioaneꞌa ꞌahi niduꞌa igiro zu horoniroteꞌe vazeḡa. Eḡeꞌa ꞌahi niduꞌa igiro zu horonirotene, eꞌe ihohiroteꞌe tuḡureḡa viga mazao kuranoga veize odaḡa babaḡano ḡuḡuriro. 9 Rehano aniꞌa ꞌahige ihiro, “Ago ꞌougoꞌi! Eḡe zuni ḡa ebu peroveta azaḡa ebu ꞌahi bukaḡano mirihiroteꞌe ḡoeꞌa hegoteꞌeteꞌe azaḡa teite gau tiba haḡaeꞌeteꞌe tuḡureḡa vazeḡa. Badiꞌa mazao daꞌo kuranoꞌi!” 10 Ebu aniꞌa ꞌahige ihiro, “Buka ꞌahi zamaḡano irina rae fureniroteꞌe ḡoeꞌa ago ꞌuꞌuru toꞌi, mazaḡa ꞌuguḡa ḡoeꞌaniꞌa fureratiteꞌe madaḡaniꞌa haniteha. 11 Iniu sauꞌa vazeḡaꞌe haḡai sauꞌa haḡaeꞌenaꞌa radiu onamoꞌi, ebu toraga vazeḡaꞌe haḡai toraga haḡaeꞌenaꞌa radiu onamoꞌi. Iniu duduḡa vazeḡaꞌe haḡai duduḡa haḡaeꞌenaꞌa radiu onamoꞌi, ebu zaḡoḡa vazeḡaꞌe zaḡozaḡe radiu onamoꞌi.”

12 Iesuꞌa ꞌahige raꞌohe, “Ḡianoꞌi, e ḡarihe ariꞌuma. Vaze niduꞌa zeḡeꞌa haḡairoteꞌe haḡaiḡa idunaḡano naeze baronoziniꞌuma. 13 Eꞌe Alefa zu Omega, ibiꞌa zu ḡonaga, ḡadaheḡa zu ḡonaga raꞌohe.

14 Iniu dabuaze vuzuꞌeꞌeteꞌe azaḡaꞌe matuꞌeꞌohe. Ze ḡaboneziniꞌeteꞌe ireḡa vaḡe onamoga zu ne boro ibihetaḡanonoꞌo ne boro zamaḡa diuḡogaꞌe idaḡa reꞌuma. 15 Rehano ḡuni heuḡa toraga azaḡa, murava azaḡa, daro fuꞌa azaḡa, vaze mauꞌeteꞌe azaḡa, ḡuriro badiꞌaḡa mazao kurauꞌeteꞌe azaḡa, ḡuriro zamaradu ḡurire haḡaeꞌeteꞌe azaḡa niduꞌaꞌe ne boro enoneo radiꞌuma.

16 Eꞌe Iesu. E ekalesia azaḡa, zae mazao eḡe tuḡure viga tuḡunadu aniꞌa eḡe ḡoere ꞌahi ihoziro. Eꞌe kini Davida mariga ḡihiꞌa hune zu irara buzuvaḡa agaḡa.”

17 Vine Zaḡoḡa zu Badiꞌa mone azaḡa hahu iziga roḡaeḡa teigeꞌeteꞌeꞌa Iesu mazao ꞌahige rae raꞌohe, “Aroꞌi!” Ebu iniu ḡoere ꞌahi igiꞌeteꞌe azaḡa niduꞌa zuni ꞌahige reꞌuma, “Aroꞌi!” Ebu iniu irineꞌa moꞌoneꞌeteꞌe vazeḡa zuni aroꞌi. Iniu uratoꞌidene, ḡabone hauꞌeteꞌe vuḡa, naeḡa oꞌoꞌa ḡahunoneḡa moꞌi.

18 Iniu buka ꞌahao irina rae fureniroteꞌe ḡoeꞌa igiꞌeteꞌe azaḡa niduꞌa mazao e iradugu ḡoeꞌa riḡa ziꞌohe. Iniu buka ꞌahi ḡoeꞌa rana ḡoere ꞌahoga ragate tiꞌeteꞌe vazeḡaꞌe Badiꞌaꞌa buka ꞌahao reiroteꞌe adugaḡa boro haꞌuma. 19 Ebu iniuꞌa buka ꞌahao irina rae fureniroteꞌe ḡoeꞌa niduꞌaonoꞌo ḡoere ꞌahoga mae vaḡinine, aniꞌa hiditeꞌe manohugaḡaꞌe Badiꞌaꞌa mene haꞌuma. ꞌOugadu ani ne boro zaḡoḡa diuḡoga mene idaraꞌuma zu ḡabone hatiteꞌe ireḡa maḡa anogaꞌe mene idaraꞌuma.

20 ꞌAhi niduꞌa rae fureneꞌeteꞌe vazeḡa, Iesuꞌa ꞌahige raꞌohe, “Hube hune ḡarihe amiꞌuma.”

Amen. Zuhiꞌa Boro Iesu, aroꞌi!

21 Zuhiꞌa Boro Iesuꞌa Badiꞌa mone azaḡa niduꞌa mazao manoḡa fureneꞌenoꞌi. Amen.

<- Irina rae Fureniro 21