Luka 3

Ioaneꞌa Iesu Ibi Ruhiniro

(Mataio 3:1-12, Mareko 1:1-8, Ioane 1:19-28)

1 Tiberio Kaisara ani Roma habaꞌa niduꞌa kiniḡa radu muri 15 zamaḡano ibitohaunu. Eꞌe madaḡano Ponitio Pilato'e Iudea habaꞌa gavanaḡa. Heroda'e Galilea habaꞌa kiniḡa, negoḡa Firifo'e Iturea zu Tarakonito habaꞌa kiniḡa ebu Rusaniaꞌe Abirene habaꞌa kiniḡa.

2 U Anasi zu Kaiafaꞌe Badi'a dibuꞌo hau'eteꞌe azaḡa ḡihi'aḡa reiro. E'e zamaḡano Zakaria ubuga Ioane'e haba boha'ano radiunu ebu Badi'a ḡoere'a ane mazao buaro. 3 Ani'e Ioridana vuḡa uhiḡano haba'a haba'a nidu'a onamadu haramiro, raenaꞌa, “Sauaꞌono'o ḡihuradu bapatizo moꞌi! ꞌOugine, Badia'a sau'aze rae modiꞌuma!”

4 Amahi Peroveta vazeḡa Isaiaꞌa bukao[a] Ioane moneo ꞌahige mirihiro.

“Vaze ꞌahoganiꞌa haba boha'ano huau'ohe, raenaꞌa,

'Zuhiꞌa Boro'a onai'uma ibiḡa ruhiboꞌi! Ane ibi mae dudunoꞌ!

5 Ebu do'oḡa nidu'a tuniꞌuma, maḡa boro zu maḡa zuhu'a nidu'a mae rahaniꞌuma, ibi beꞌoḡa beꞌoḡa duduniꞌuma, haba bekuḡa bekuḡa nidu'a sebaniꞌuma[b].

6 Ebu vaze nidu'a Badiꞌa'a vaze sauꞌazeꞌonoꞌo ḡaboze'ete'e horoni'uma.'”

7 Ebu vaze ḡuḡuvaḡa bapatizo mouga radu Ioane vaḡe arirotene, Ioaneꞌa ziro, raenaꞌa, “Zaꞌe, Zarama moheḡa ubuga ubuga! Vazeꞌa zae mazao ꞌahige reiro, raenaꞌa, 'Badiꞌaꞌonoꞌo maḡunuꞌa onaine ferau muhinoꞌi!' Rehano feranogaꞌe mene idaraꞌuma! 8 U ibite haḡai sau'aono'o ḡihuriroteꞌe haḡaiḡa furenoꞌi! Ebu ago ꞌahige zamaroꞌi, 'Emeꞌe Aberahamo mariga, eꞌanoꞌo Badiꞌaꞌa mene maḡunofiꞌuma.' Mazaḡa, e zae ziꞌohe, Badia'a hadi ꞌadi madu Aberahamo mariga nufine zuni idaḡa. 9 Ḡiro 'ai ire taigano teha. Eꞌanoꞌo huga manoḡa mene iniꞌeteꞌe ireḡa'e udi higonadu ire rogao feuniꞌuma.”

10 Ioaneꞌa ꞌouge reirotene, vaze ḡuḡuvaḡani'a ḡadiniro, raenaꞌa, “Eme nouge haḡaifone manoḡa?” 11 Ebu ani'a naenaeziro. “Iniu dabuaḡa ꞌaheu ro'idene tibaꞌe dabuaḡa o'o'a vazeḡa hano'i, ebu iniu ogomuḡeta roꞌidene vininateꞌe vazeḡa teite ḡahugotito'i!”

12 Takesi ufe'ete'e azaḡa zuni bapatizo mouga radu ariro ebu Ioane ḡadiniro, raena'a, “Ihore vazeḡa, eme nouge haḡaifone manoḡa?” 13 Aniꞌa naenaeziro. “Takesi ufoꞌidene, gavamaniꞌa raꞌeteꞌe idunaḡano daꞌo ufo'i, zu ago vitau ufoꞌi!”

14 Ebu uti azaḡani'a zu ḡadiniro, raenaꞌa, “Eme nouge haḡaifone manoḡa?” Ani'a naenaeziro. “Vaze moni ago meize tauḡo'i, ebu ḡuriro moneo vaze ago debaze tauḡo'i! Zae moni gauḡano daꞌo matu'o'i!”

15 Mazaḡa vazevazeꞌe Kerisoꞌa areꞌeteꞌe guhininu, ze ꞌane, 'Ioaneꞌe Keriso!', rae zamariro. 16 Ebu Ioane'a zeḡe nidu'a naenaeziro, raenaꞌa, “E'e vu hina bapatizozeha. Rehano onaiꞌuma vazeḡa'e gigi'aḡa ḡihiꞌa. Aniꞌe eḡe vitihoga zu eḡe'a ani tamaka miniḡa fuhiꞌeꞌeteꞌe tuḡureḡa vazeḡa rae rouga zuni mene idaḡa. Ani'e Vine Zaḡoḡa zu ire roga hina abatisozi'uma. 17 Maho hiriveꞌeteꞌe madaḡano, vazeꞌa kari hina rouḡa tenadu maho huꞌiꞌohe, ebu iguḡa manoneꞌohe zu meba hare deheneꞌohe. Ebu hugaꞌe suaba zamaḡano tiꞌohe, rehano iguḡaꞌe ire rogao hufi haoneꞌohe. Eꞌe teige, aniꞌa vazevaze rovoziꞌuma.[c]”

18 Ebu Ioane'a ḡoere ḡehaḡa nunu hina vazevaze iraduguzeꞌenaꞌa, hari manoḡa hina haramoziniro. 19 Ioane'a Galilea habaꞌa kiniḡa Heroda Antifasi zuni ta'iroharo. Mazaḡa aniꞌe negoḡa inuga niḡa Herodia meinadu ane teite hahuriro, zu haḡai sau'a sau'a ḡehaḡa haḡaido. 20 Ebu Heroda'e sauꞌa eꞌe nidu'a ranao ꞌahoga ragatiro. Aꞌe Ioane ḡu'ano zouniro.

Iesu Babatisoniro

(Mataio 3:13-17, Mareko 1:9-11)

21 Ioaneꞌe izema ḡutanogano, vaze nidu'a bapatizo meirotene, Iesu zuni bapatizo meiro. ꞌOugadu Iesu ani kurau'eteꞌe zamaḡano adure'a bohataro, 22 ebu Vine Zaḡoḡani'a Tubugo niniḡa teige ane rana ehori ovairo. Ebu ago ꞌahoganiꞌa adureꞌono'o ḡoeriro, raenaꞌa, “Ḡa'e eḡe ubude. Eḡeꞌa ḡae zamare borofeꞌohe ebu ḡa mazao matu'e rudau'ohe.”

Iesu Mariga Duḡuru

(Mareko 1:1-17)

23 Iesu'e muriḡa 30 reirotene, ani gauḡa ḡadaheniro. Vazeꞌa ani'e Iosefa ubuga rae zamariro.

Iosefa'e Heli ubuga,

24 Heli'e Matati ubuga, Matati'e Levi ubuga, Levi'e Melki ubuga, Melki'e Ianai ubuga, Ianai'e Iosefa ubuga,

25 Iosefa'e Matatia ubuga, Matatiaꞌe Amosi ubuga, Amosiꞌe Nahumu ubuga, Nahumꞌe Esli ubuga, Esliꞌe Nagai ubuga,

26 Nagaiꞌe Maꞌati ubuga, Maꞌatiꞌe Matatia ubuga, Matatiaꞌe Semein ubuga, Semeinꞌe Ioseka ubuga, Iosekaꞌe Ioda ubuga,

27 Iodaꞌe Ioanan ubuga, Ioananꞌe Resa ubuga, Resaꞌe Zerubabele ubuga, Serubabeleꞌe Sealtiele ubuga, Sealtieleꞌe Neri ubuga,

28 Neriꞌe Melki ubuga, Melkiꞌe Adi ubuga, Adiꞌe Kosam ubuga, Kosamꞌe Elmadam ubuga, Elmadamꞌe Ere ubuga,

29 Ereꞌe Iosua ubuga, Iosuaꞌe Eliesere ubuga, Eliesereꞌe Iorim ubuga, Iorimꞌe Matat ubuga, Matatꞌe Levi ubuga,

30 Leviꞌe Simeon ubuga, Simeonꞌe Iuda ubuga, Iudaꞌe Iosefa ubuga, Iosefaꞌe Ionam ubuga, Ionamꞌe Eliakim ubuga,

31 Eliakimꞌe Melea ubuga, Meleaꞌe Mena ubuga, Menaꞌe Matata ubuga, Matataꞌe Natana ubuga, Natanaꞌe Davida ubuga,

32 Davidaꞌe Iese ubuga, Ieseꞌe Obed ubuga, Obedeꞌe Boa ubuga, Boaꞌe Salmon ubuga, Salmonꞌe Nason ubuga,

33 Nasonꞌe Aminadaba ubuga, Aminadabaꞌe Admina ubuga, Adminaꞌe Areni ubuga, Areniꞌe Hesron ubuga, Hezronꞌe Perez ubuga, Perezꞌe Iuda ubuga,

34 Iudaꞌe Iakobo ubuga, Iakoboꞌe Isako ubuga, Isakoꞌe Aberahamo ubuga, Aberahamoꞌe Tera ubuga, Teraꞌe Nahoro ubuga,

35 Nahoroꞌe Seruga ubuga, Serugaꞌe Reu ubuga, Reuꞌe Pelegi ubuga, Pelegiꞌe Ebere ubuga, Ebereꞌe Sela ubuga,

36 Selaꞌe Kenana ubuga, Kenanaꞌe Afasada ubuga, Afasadaꞌe Sema ubuga, Semaꞌe Noa ubuga, Noaꞌe Lameki ubuga,

37 Lamekiꞌe Metusela ubuga, Metuselaꞌe Enoka ubuga, Enokaꞌe Iaredi ubuga, Iarediꞌe Mahalalela ubuga, Mahalalelaꞌe Kenana ubuga,

38 Kenanaꞌe Enosi ubuga, Enosiꞌe Seti ubuga, Setiꞌe Adamu ubuga, Adamuꞌe Badiꞌa ubuga.

<- Luka 2 Luka 4 ->