1 Vaze ꞌahoga niḡa Anania. Inugaꞌe Safira. Ze habaze boꞌaḡa tahiḡa seroniro. 2 Ebu Anania ani inugeta ḡoere idanadu, eꞌe moniḡa nuꞌe obone tiro. Ebu ḡahaꞌa daꞌo apostolo azaḡa vaḡe odohe onamadu, zamazeo tiro.

3 ꞌOugadu Peteroꞌa ninaꞌa, “Anania, nougadu zamaḡoꞌe Sataniꞌa irivaꞌonadu, Vine Zaḡoḡa mazao ḡurireha? Ḡaꞌe seroniroteꞌe moniḡa ruga ḡae veize obone teha. 4 Haba aꞌaꞌe, mene seroniroteꞌe madaḡanoꞌe ḡae haba. Seroniroteꞌe enogano zuni eꞌe moniḡaꞌe ḡae moni. Eꞌe hina ḡae ura ḡauḡa haḡaoga idaḡa. Rehano ḡa nougadu ꞌuguḡa haḡaiḡa haḡaiꞌuma rae zamareha? Deꞌuge mene zamarifo. Ḡaꞌe vaze mazao mene ḡurira rehano, Badiꞌa mazao ḡurireha.”

5 Ananiaꞌe ḡoere eꞌe igirotene, higau bauradu rudaro. Ebu eꞌe hariḡa igiroteꞌe azaḡaꞌe niduꞌa rihau rudaro. 6 Ebu Tahiꞌa iziga nuꞌa onaadu, dabua hina ahiꞌa ꞌumiro, ebu herate bunadu, ḡuriro.

7 Mada uḡidu (3 hours) enogano, inuganiꞌa diuḡiꞌ onairo. Ani aḡuꞌa naginiꞌa fureranataꞌaꞌe. 8 Ebu Peteroꞌa ḡadiniro, raenaꞌa, “Ehoꞌi! Iꞌuꞌa odohe onaateꞌe moniḡaꞌe zae haba seroniroteꞌe moniḡa hehe?” Aniꞌa naenaeninaꞌa, “Oꞌe, naeḡaꞌe deiꞌeꞌe.” 9 Peteroꞌa niro, raenaꞌa, “Nougaduni ḡanine ḡoere idanadu Zuhiꞌa Boro Vineḡa soꞌoneha! Ḡianoꞌi! Iꞌu gurateꞌe azaḡaniꞌe ibihetao eꞌe diuḡiꞌ onaeꞌeteꞌe. Ḡae zuni zeḡeꞌa herate buḡadiꞌuma.”

10 ꞌOuge raꞌeteꞌe zamaḡano aniꞌe Petero oda babaḡano higau bauradu rudaro. Ebu iꞌa guriroteꞌe tahiꞌaḡa iziga iziganiꞌa diuḡiꞌ onaadu Safiraꞌa rudanoga horoniro. Eꞌanoꞌo herate bunadu iꞌa uhiḡano ḡuriro. 11 Ekalesia azaḡa niduꞌa zu eꞌe hariḡa igiroteꞌe azaḡa niduꞌaꞌe rihau rudaro.

12 Apostolo azaḡaniꞌa Badiꞌa tahi gigiꞌa haḡaiḡa zu zaguzagaꞌuma haḡaiḡa ḡehaḡa vazevaze boꞌaḡano haḡaido, ebu Iesu mazao fieꞌeteꞌe azaḡa niduꞌa Solomona touraḡio nuꞌoraudo. 13 Iesu mazao mene fieꞌeteꞌe azaḡaꞌe zeḡe teite ꞌauḡoga mene idaḡa ꞌahine, tibani zuni mene ꞌauḡiro, rehano vazevazeꞌa Iesu mazao fieꞌeteꞌe azaḡa horozadu, “Zeꞌe vaze manoḡa.” reiro. 14 Rehano ohoze zu roḡae ḡehaḡaniꞌa Iesu mazao fiadu, ragate ragate meꞌode tibuzido. 15 ꞌOugadu ibi genaḡano zuni, ugi azaḡa tutuze onaadu, geda rana bazuze tido, Peteroꞌa ibio onaadu zeḡe uhiḡano vitatiteꞌea, ane ahiri zauhaḡaniꞌa zauhaziteꞌeba, ugizeꞌa manoroga. 16 Ebu Ierusalema uhiḡa neḡa neḡanonoꞌo zuni vaze ḡuḡuvaḡaniꞌa ugi azaḡa zu vine sauꞌaniꞌa rana reiroteꞌe azaḡa tutuze onaido, ebu zeḡe niduꞌaꞌe manorido.

17 Ebu dibuꞌo hauꞌeteꞌe ḡihiꞌaḡa zu ane teite rauꞌeteꞌe azaḡa niduꞌa ahiahize ruziro. Ane teite rauꞌeteꞌe azaḡaꞌe Sadukea azaḡa. 18 Eꞌanoꞌo zeꞌe apostolo azaḡa oboze teadu, ḡuꞌano ohoziro. 19 Rehano Zuhiꞌa Boro tuḡure vigaꞌa eꞌe oheꞌano ḡuꞌa neḡa ibihetaḡa vavaꞌadu mae buziro. 20 Ebu tuḡure vigaꞌa zinaꞌa, “Onamoꞌi, ebu Dibuꞌo Neḡa zamaḡano edanadu, ḡabone iziga ꞌadi hariḡa niduꞌa vazevaze meꞌodo zenoꞌi!” 21 Eꞌe egadu irarirotene, Dibuꞌo Neḡa diuḡadu, vazevaze ihoziro.

U dibuꞌo hauꞌeteꞌe ḡihiꞌaḡa zu ane teite rauꞌeteꞌe azaḡaniꞌa nuꞌoranadu, kanisoro azaḡa zu Isaraela vaze boroboro niduꞌa huze nuꞌoziro, ebu apostolo azaḡa ḡuꞌa neḡanonoꞌo tutuze onaoga veize vaze tuḡuziro. 22 Rehano zeḡeꞌa ḡuꞌa neḡano feurirotene, apostolo azaḡa mene horoziro. Eꞌanoꞌo bare onamadu, zinaꞌa, 23 “Ḡuꞌa neḡa ibihetaḡaꞌe fairu biroga, zu ḡuꞌa neḡa gadineꞌeteꞌe azaḡaꞌe ibihetao edauꞌenoga horoneha. Rehano ibiheta vavaꞌatene, zamaḡanoꞌe vaze ꞌahoga mene horoneha.” 24 Eꞌe hariḡa igirotene, Dibuꞌo Neḡa ḡianeꞌeteꞌe boro zu dibuꞌo hauꞌeteꞌe boroboroꞌe eꞌe haḡaiḡanonoꞌo naginiꞌa fureraꞌ onamiꞌuma, rae zamare ꞌadaꞌadaziro.

25 Ebu vaze ꞌahoganiꞌa onaadu, ziro, raenaꞌa, “Ḡianoꞌi! Zaeꞌa ḡuꞌa neḡano ohozateꞌe azaḡaniꞌe Dibuꞌo Neḡa zamaḡano edanadu, vaze ihozeꞌohe.” 26 Eꞌanoꞌo Dibuꞌo Neḡa ḡianeꞌeteꞌe boroꞌa ane tahiꞌa teite onamadu, apostolo azaḡa tutuze bare onairo. Ze mene agato ziniro, mazaḡa vaze rihoziro, iḡite vazevazeꞌa maḡunadu hadi hina zimi ruziꞌuma rihoḡa.

27 Ebu apostolo azaḡa tutuze onairotene, kanisoro azaḡa zamao ohoziro, ebu dibuꞌo hauꞌeteꞌe ḡihiꞌaḡaniꞌa ḡadiziro, raenaꞌa, 28 “Eme goro ḡoeꞌa riḡa zae ziniro, vaze ꞌadi niḡano vazevaze mene ihozoga. Rehano Ierusalema azaḡa niduꞌa zaeꞌa ihoze hauḡadu, vaze eꞌeꞌa rudaroteꞌe adugaꞌe emeḡe rana tiꞌohe”

29 Petero zu apostolo azaḡaniꞌa naenaezinaꞌa, “Eme Badiꞌa ḡoere igiꞌuma, u vaze ḡoereꞌe mene igiꞌuma. 30 Iesuꞌe zaeꞌa satauroo midau teadu rudaro rehano, vouḡafeꞌa kurano haudoteꞌe Badiꞌaḡaniꞌa runeonoꞌo bare ḡaboniro. 31 Izidi eꞌe vazeḡaꞌe vaze ibito ziniꞌuma Zuhiꞌaḡa, zu vaze ḡaboziꞌuma vazeḡa radu, Badiꞌaꞌa ane edaꞌe moneo ohoniro. Aꞌe Isaraela azaḡaniꞌa zamaze ḡihunadu, sauꞌaze Badiꞌaꞌa rae modoga veize. 32 Emeꞌe eꞌe haḡaiḡa horonadu rae fureneꞌohe, zu Vine Zaḡoḡa zuni eꞌe rae fureneꞌohe. Vine Zaḡoḡaꞌe Badiꞌaꞌa ane ḡoere igiꞌeteꞌe azaḡa mazao tuḡuniro.”

33 Kanisoro azaḡaniꞌa Petero ḡoere igirotene, maḡune rudaro, ebu zimi ruzihi reiro. 34 Rehano Farisea vazeḡa ꞌahoga, niḡa Gamalielaꞌa kanisoro azaḡa boꞌaḡano iḡune edaro. Aniꞌe goro ḡoeꞌa ihozeꞌeteꞌe vazeḡa, ebu vaze niduꞌa ani gubaniro. Ani zinaꞌa, “ꞌAhi duḡuru gezo enona tuḡuze buzoꞌi!” 35 Ebu aneꞌa kanisoro azaḡa ziro, raenaꞌa, “Isaraela azaḡa, fairu zamaroꞌi, ꞌadi duḡuru mazao nagini haḡaihi raꞌetaꞌaꞌe! 36 Muri nu onamiroteꞌeꞌa, Teudaꞌa iḡunadu, 'Eꞌe nihe boro' radu, vaze maḡa ḡazaḡaniꞌa (400) ani hegotiro. Rehano aniꞌe mau runiro, ebu ani hegotiroteꞌe azaḡa niduꞌaꞌe ferefereꞌuhiro. Ebu aniꞌa haḡaidoteꞌe haḡaiḡaꞌe niduꞌa hauḡiro. 37 Ani ḡarugano, vaze niduꞌa ni meiroteꞌe (census) madaḡano, Galilea vazeḡa niḡa Iudaꞌa iḡunadu, vaze nu zamazadu Roma gavamani teite utitihi reiro. Rehano ane zuni mau runiro, ebu ani hegotiroteꞌe azaḡaꞌe ferefereꞌuhiro. 38 Eḡe iradugu ḡoeꞌa ꞌahiꞌeꞌe. ꞌAdi duḡuru mazao ḡau ꞌahoga ago haḡaoꞌi! Tuḡuze buzoꞌi! Mazaḡa haḡai ꞌadiꞌe vaze mazaonoꞌo reineꞌe, aneꞌa hauḡiꞌuma. 39 Rehano haḡai ꞌadiꞌe Badiꞌa mazaonoꞌo reineꞌe, za ꞌuoga mene idaraꞌuma, zu zaꞌe Badiꞌa utito haꞌuma.”

40 Ebu zeḡeꞌa Gamaliela ḡoere mae ḡihiniro, ebu apostolo azaḡa huze zouzadu, uti azaḡaniꞌa masiziro. Ebu “Iesu niḡano ago ḡoeroꞌi!” rae zeadu, tuḡuze buziro.

41 Apostolo azaḡaꞌe kanisoro neḡanonoꞌo matuꞌeꞌenaꞌa buaro, mazaḡa zeꞌe Badiꞌaꞌa ane ubumao raꞌeteꞌe azaḡa radu, Iesu niḡa uꞌano nize sausauneꞌeteꞌe zamaḡano tuḡuziro ꞌahine. 42 Ebu zeꞌe mada niduꞌa Dibuꞌo Neḡa zamaḡano zu ne tibatibano ihozido, ebu “Iesuꞌe Keriso” raenaꞌa, hari manoḡa ihozido zu haramido.

<- Apostolo 4Apostolo 6 ->