Apostolo 4

Petero zu Ioane oboze tiro

1 Petero zu Ioane ꞌize vaze ḡehaḡa ḡorezeꞌeteꞌe zamaḡano, dibuꞌo hauꞌeteꞌe azaḡa, Dibuꞌo Neḡa ḡianeꞌeteꞌe boro, zu Sadukea azaḡaniꞌa zeḡe uꞌa onairo. 2 Zeꞌe apostolo azaḡa aheu mazao maḡune rudaro, mazaḡa ze vaze ihozeꞌenaꞌa, Iesuꞌa runeonoꞌo bare ḡabodiroteꞌe teige, vazeꞌe runeonoꞌo bare ḡabodiꞌuma rae, haraminu ꞌahine. 3 Eꞌanoꞌo Petero zu Ioane oboze tiro, ebu mada ꞌai zuburiro ꞌahine, ḡuꞌa habaꞌano ohozadu, eꞌea baze irariro. 4 Rehano zeḡe haramo igiroteꞌe azaḡaꞌe ḡehaḡaniꞌa zeḡe ḡoere mae ḡihiniro, ebu mae ḡihiniroteꞌe azaḡaꞌe maḡa boro fuꞌo (5000) heuḡa reꞌ itiro.

5 Irarirotene, kanisoro azaḡa, vaze boroboro zu goro ḡoeꞌa ihozeꞌeteꞌe azaḡaniꞌa Ierusalema neḡano nuꞌoraro. 6 Nuꞌonuꞌo zamaḡanoꞌe, dibuꞌo hauꞌeteꞌe ḡihiꞌaḡa, niḡa Anasi, ebu Kaiafa, Ioane zu Alesana, ebu dibuꞌo hauꞌeteꞌe ḡihiꞌaḡa nabuga duḡuru. 7 Petero zu Ioaneꞌe zeḡe zamao mae ohozadu ḡadiziro, raenaꞌa, “Noꞌe gigiꞌaḡa hina, ga iniu niḡano odaḡa sauꞌa vazeḡa ꞌadi faineha?”

8 Ebu Petero ani Vine Zaḡoḡaniꞌa irivaꞌonadu ziro, raenaꞌa, “Isaraela Kanisoro azaḡa zu Iuda azaḡa boroboro, 9 odaḡa sauꞌa vazeḡa mazao haḡai manoḡa haḡaateꞌe zu nouge nouge ani fainateꞌe ḡadimuꞌe hehe? 10 ꞌOugine, zae zu Isaraela azaḡa niduꞌa ꞌadi ederoꞌi! Iesu Keriso, Nazareta neḡa vazeḡa niḡano vaze ꞌadiꞌe manore hunadu, zae zamao edauꞌohe. Iesuꞌe zaeꞌa satauroniro rehano, Badiꞌaꞌa runeonoꞌo bare ḡaboniroteꞌe vazeḡa. 11 Aniꞌe

'Zae, ne ogoruꞌeteꞌe azaḡaniꞌa,

heꞌeheꞌeniroteꞌe hadiḡa rehano,

izidi duꞌeꞌeteꞌe hadiḡa boro

reꞌ onaeha.' (Salamo 118:22)

12 Eꞌanoꞌo Iesu aneꞌa daꞌo emeḡe ḡabofiꞌuma. Mazaḡa haba niduꞌa zamaḡano Badiꞌaꞌa emeḡe ḡabofoga veizeꞌe ane daꞌo tuḡuniro.”

13 Vaze boroboroꞌe, Petero zu Ioaneꞌa inare ḡoeroga horozirotene, zaguzagaro, mazaḡa zeḡeꞌa ḡiazirotene, Petero zu Ioaneꞌe mene mirihiroteꞌe azaḡa, edeḡa oꞌoꞌa. Zu ze edeḡa, anianineꞌe Iesu teite raudoteꞌe azaḡa. 14 Zuni odaḡa sauꞌaniꞌa manoriroteꞌe vazeḡaniꞌa Petero zu Ioane teite edanoga horoniro ꞌahine, ḡoere ꞌahoga rouga mene idararo.

15 Eꞌanoꞌo “Petero zu Ioaneꞌe kanisoro nuꞌonuꞌo habaꞌanonoꞌo mae buzoꞌi” radu, zeꞌe zeḡe daꞌo ḡoꞌaniro, 16 raenaꞌa, “Eme zeḡe mazao nagini haḡaine manoḡa?” rae ḡadititiro. “Ierusalema azaḡa niduꞌaꞌe edeḡa, zeḡeꞌa gigiꞌa haḡaiḡa boro haḡaataꞌaꞌe. Eme zeḡe haḡai oꞌonoga mene idaḡa. 17 Rehano hari ꞌadaꞌa ne azaḡa boꞌaḡano bororatiteꞌe ꞌuoga veize, riho ḡoeꞌa ziniꞌuma, raenaꞌa, 'Iesu niḡano vaze mazao ago bare ḡoeroꞌi!'

18 Ebu zeꞌe bare huze zouzadu, “Iesu niḡano ago hune zu bare ḡoeroꞌi, zu ago hune zu bare ihozoꞌi!” rae ziro. 19 Rehano Petero zu Ioaneꞌa naenaezinaꞌa, “Zaeꞌa zae bare ḡadizoꞌi! Badiꞌa ubumao, Badiꞌa ḡoere mene egadu, zae ḡoere egogaꞌe manoḡa ga? 20 Mazaḡa emeꞌe nagini horoniroteꞌe zu igiroteꞌe ḡoeꞌa mene rae furenineꞌe mene idaḡa.”

21 Ebu kanisoro azaḡaniꞌa bare riho ḡoeꞌa zeadu, tuḡuze buziro. Zeꞌe adugano tuḡuziteꞌe ibiḡa mene horoniro, mazaḡa naginiꞌa fureranateꞌe uꞌano vaze niduꞌa Badiꞌa niḡa nigune radiro ꞌahine. 22 Gigiꞌa haḡaiḡano manoriroteꞌe vazeḡa muriḡaꞌe ḡae ḡazaḡa gaubanana (40) vitinoga.

Iesu mazao fieꞌeteꞌe azaḡaniꞌa Badiꞌa mazao kuraro

23 Petero zu Ioaneꞌe tuḡuze buzirotene, Iesu mone azaḡa vaḡe onamiro, ebu dibuꞌo hauꞌeteꞌe boroboro zu vaze boroboroꞌa ziroteꞌe ḡoeꞌa meꞌodo ziniro. 24 Zeḡeꞌa ḡoere eꞌe igirotene, zamaze tibano teadu agoze borofeꞌenaꞌa Badiꞌa mazao kuraro, raenaꞌa, “Zuhiꞌa Boro, ḡaꞌe adure, raha, davara zu eꞌe zamaḡano radiuꞌeteꞌe ḡauḡa niduꞌa haḡairo. 25 Ḡaeꞌa Vine Zaḡoḡa tuḡunadu, ḡae tuḡure vazeḡa vouḡafe Davida hebeonoꞌo ḡoeriro, raenaꞌa,

'Nougaduni Iuda mene azaḡaniꞌe

maḡune rudaro,

zu haba ꞌahoga ꞌahoga azaḡaniꞌe

huga mene hidiꞌuma haḡaiḡa

haḡaihi rae neneḡaniro?

26 Kini azaḡa haba ḡianeꞌeteꞌeꞌa

utitoga radu onairo,

ebu vaze ḡihiꞌa ḡihiꞌaniꞌa

zeḡe teite tibano nuꞌoraro,

Zuhiꞌa Boro Badiꞌa zu Keriso teite utitoga veize.' (Salamo 2:1-2)

27 Eꞌe haḡaiḡaꞌe hubehune fureraro. Heroda zu Pontio Piratoꞌa Iuda mene azaḡa zu Isaraela azaḡa teite Ierusalema neḡano nuꞌoranadu, Iesu matihi rae neneḡaniro. Iesuꞌe ḡae Tuḡure Vazeḡa zaḡoḡa, ḡaeꞌa Keriso rae ohoniroteꞌe vazeḡa. 28 Rehano zeꞌe, ḡaeꞌa irina ḡae gigiꞌao zu urao fureraꞌuma rae reiroteꞌe haḡaiḡa Iesu mazao haḡairo. 29 Zuhiꞌa Boro, izidi zeḡeꞌa riho ḡoeꞌa efateꞌe zamaroꞌi! Eme, ḡae tuḡure azaḡa inara rifoꞌi, emeḡeꞌa inare hunadu ḡae ḡoere rae furenoga veize! 30 Ebu evoꞌo ꞌeinoꞌi, ugi azaḡaniꞌa manoroga, zu ḡae tahi gigiꞌa furenoꞌi ebu zaguzagaꞌuma haḡaiḡa haḡaoꞌi, Iesu, ḡae Tuḡure Vazeḡa zaḡoḡa niḡano!”

31 Ze kurau hauḡirotene, zeḡeꞌa nuꞌoraroteꞌe habaꞌaniꞌa hagahagariro. Ebu zeḡe niduꞌa Vine Zaḡoḡaniꞌa irivaꞌoziro, ebu Badiꞌa ḡoere inare rae fureniro.

Iesu mazao fieꞌeteꞌe azaḡaniꞌa ḡauze ḡahugo titiro

32 Iesu mazao fieꞌeteꞌe azaḡaꞌe zama zu zamaroneze tibano tinu. Vaze ꞌahoganiꞌa “ꞌadiꞌe eḡe daꞌo tohe” rae mene reiro, rehano “vaze niduꞌa tohe” rae ḡahugo titiro. 33 Ebu apostolo azaḡaniꞌa inare huneꞌenaꞌa Zuhiꞌa Iesuꞌa bare ḡabodiroteꞌe hariḡa rae furene onaminu, ebu Badiꞌa ḡahunone manoḡa boroꞌa zeḡe niduꞌa mazao radiunu. 34 Ze tohe ꞌahoganiꞌa zu mene fereziro, mazaḡa habazeta azaḡa zu nezeta azaḡaniꞌa eꞌe seronadu, moniḡaꞌe apostolo azaḡa vaḡe odohe onaadu, 35 zamazeo tiro, ebu moniꞌa ferezeꞌeteꞌe azaḡa ḡahugo zinido.

36 Vaze ꞌahoga, niḡa Iosefa, Levi iduhu zu Kupro ꞌumuḡa vazeḡa. Aniꞌe apostolo azaḡaniꞌa Banabasi rae hunido. Ni eꞌe hugaꞌe inara ziniꞌeteꞌe vazeḡa. 37 Banabasi aniꞌe ane haba seronadu, moniḡaꞌe apostolo azaḡa zamao tiro.

<- Apostolo 3 Apostolo 5 ->