1 Emeḡe niduꞌa ḡaboga gabao tirirotene, eme ederiro, aꞌe Melita ꞌumuḡa. 2 ꞌUmu eꞌe neḡa azaḡaꞌe emeḡe faifaife rufiro. Iruguꞌe ruꞌaunu zu nahuneꞌe biaudo ꞌahine, ze mae ḡihifeꞌenaꞌa, ire rabibofiro. 3 U Paulo ani ire sinuḡa ḡuraꞌe madu ire roga rana mae tiꞌenogano, zarama ire gigiꞌaniꞌa madu ire sinuḡanonoꞌo veore buaro, ebu Paulo ꞌai ꞌevoꞌano vihone giganiro. 4 Ebu ꞌumu eꞌe azaḡaniꞌa mohe eꞌe Paulo ꞌevoreo ḡiruḡiranoga horonirotene, ze raoraoꞌuhinaꞌa, “Vaze ꞌadiꞌe hezoꞌe gorugoru vazeḡa gaogi.” rae reiro. “Ani davarao mene hunuhuna rehano, eꞌe naeḡa hauꞌeteꞌe badiꞌaḡaꞌe aneꞌa ḡabode radoga mene urateha.” 5 Rehano Pauloꞌe mohe ire roga rana itine modiro, ebu sauꞌani ꞌahoga ane mazao mene fureraro. 6 Vaze ze ꞌane, Pauloꞌe ahiꞌaniꞌa miniꞌuma ga zogone higau bauradu rudaꞌuma rae ḡiane radiro. Ze faḡa hune ꞌouge ḡiane radiunu rehano, ḡauni ꞌahoga ani mazao mene furerarotene, ze hena nufe zamarenaꞌa, “Aniꞌe badiꞌa ꞌahoga gaogi.” reiro.

7 U ꞌumu eꞌe zuhiꞌaḡa, niḡa Pobelio, ani habaꞌe haniꞌano. Ani eme mae ḡihifeꞌenaꞌa, neḡano tutufe zoufadu mada uḡidu faifaifinu. 8 U Pobelio mogaꞌe ugiḡa, evaneo baze radiunu. Ani ahiriꞌe gigiꞌa bagaḡa zu ru sororido. Eꞌanoꞌo Pauloꞌa diuḡe ḡianadu rana kuraro, ebu ꞌevoꞌa rana tirotene, ꞌai manoriro. 9 ꞌUguḡaniꞌa furerarotene, ugi azaḡa ꞌumu beꞌa radiunuteꞌe azaḡa niduꞌa, Paulo vaḡe onaadu aneꞌa faizido. 10 Ebu vaze niduꞌaꞌa, nigufeꞌenaꞌa faifaife rufido. Ebu eꞌe ꞌumuḡanonoꞌo ruhau vaḡinihi reirotene, ze ferefeꞌeteꞌe toheḡa ḡehaḡa rifiro.

11 Eme bato uḡidu eꞌe ꞌumuḡano radiroteꞌe enogano, ḡasi ꞌahogano tiradu eꞌe habaꞌa mode iḡuniro. Eꞌe ḡasiḡaꞌe nahune madaḡaniꞌa hauḡoga veize, Melita ꞌumuḡano guhiu radiro. Aꞌe Alesandria ne ḡasiḡa, niḡa “Tahiꞌa Atoꞌa”. Izipi habaꞌanonoꞌo onairo. 12 Eme ruhau onamoo, Surakusa neḡano hebetadu, mada uḡidu eꞌea radiro. 13 Eꞌeanoꞌo hena onamo Regio neḡano hebetiro. Ebu mada tiba radirotene, ḡasi ḡaruga moneonoꞌo zavaraꞌa onairo ꞌahine, eme ruhau onamadu, mada aheuḡano Puteoli toḡatoḡaḡano feuriro. Aꞌe emeḡe ruhu ḡonaga. 14 Ebu eꞌea Zuhiꞌa Boro mone azaḡa nu hidirotene, ze umifenaꞌa, “Emeḡe teite fura tiba radoꞌi!” reiro. Eꞌanoꞌo eꞌea fura tiba radiro. Ebu eꞌe ḡaruganobuꞌu emeꞌe, zavara boro uꞌano sasiro rehano, ragavofeꞌe ḡonabadu, Roma habaꞌano feuriro. 15 Roma neḡano Zuhiꞌa Boro mone azaḡaꞌe emeḡeꞌa haniteꞌeteꞌe hariḡa igiro ꞌahine, haofe onaadu, vaze nuꞌe Apia-foru maketiḡano, nuꞌe Taveni Uḡidu rae huneꞌeteꞌe iꞌudi neḡano hido titiro. Paulo ani, horozirotene, Badiꞌa matuꞌo haro, ebu zamaḡaniꞌa inariro.

16 Eme Roma neḡano feurirotene, Pauloꞌe tuḡunadu ane daꞌo ne ꞌahogano radiro. Ebu uti vazeḡa tibaniꞌa daꞌo taufinu. 17 Ebu mada uḡidu meirotene, Pauloꞌa Iuda azaḡa ibito ziniꞌeteꞌe azaḡa boroboro ane neo huze nuꞌoziro. Ebu zeḡeꞌa nuꞌoraꞌ onairotene, Pauloꞌa ziro, raenaꞌa, “Nego nabudi, e emeḡe nabudi mene sausauziro, zu vouḡafe haḡai mene heꞌeheꞌeniro. Rehano Iuda azaḡaniꞌa Ierusalema neḡano obohe teadu, Roma azaḡa ꞌevorao riꞌiheha. 18 Roma azaḡaniꞌa ḡadihirotene, ze ura tuḡuhe buhihi reiro, mazaḡa runeo tuḡuhiꞌuma haḡaiḡa sauꞌa mene horoniro. 19 Rehano Iuda azaḡaniꞌa mene uratirotene, eꞌe ibi ꞌahoga oꞌoꞌa radu, Roma zuhiꞌaḡaniꞌa kotahoga veize umidiro. U eꞌe aduga ꞌahoga nabudihe rana touga veize mene onaeha. 20 Eꞌanoꞌo e za ḡiazoga zu ḡorezoga veize huze onaeha, mazaḡa Isaraela azaḡaniꞌa guhine onainuteꞌe vazeḡa uꞌano, eꞌe ḡuꞌa neḡano ꞌada radiuꞌeteꞌe.”

21 Ebu ze naenaeninaꞌa, “Iudea habaꞌanonoꞌo ḡa moneo soꞌani ꞌahoga mene noneni tuḡuriro. Zu vazeni ꞌahoga Iudea habaꞌanonoꞌo feuriꞌ arirotene, ḡa moneo sauꞌani ꞌahoga mene rae fureniro. 22 Rehano eme ḡaꞌa nouge reihi raꞌeteꞌe igihi raꞌohe. Mazaḡa eme edeḡa, haba niduꞌa zamaḡano vaze niduꞌa ḡae mone raꞌeteꞌe azaḡa heꞌeheꞌezeꞌohe.”

23 Ebu ze Paulo teite bare nuꞌoranoga rae mada ꞌahoga rae tiro. Eꞌe madaḡa meirotene, Iuda azaḡaꞌe ḡehaḡa bagaḡaniꞌa onaadu, bare ane radone habaꞌano nuꞌoraro. Pauloꞌe oherebauonoꞌo onamo ḡorava Badiꞌaꞌa zuhiꞌafiꞌuma ḡoeꞌa rae fureno ziniro. Ebu zeḡeꞌa Iesu mae ḡihinoga rae, Mose goro ḡoeꞌa zu Peroveta azaḡa buka zamaḡanonoꞌo Iesu hariḡa haramiro. 24 Vaze nuꞌe Paulo ḡoere mae ḡihiniro, u nuꞌe mene. 25 Ebu ze zeḡe boꞌaḡano zamaze mene tiba. Ebu Pauloꞌa ꞌahige ziroteꞌe enogano, ze neonoꞌo buau ḡouriro. Pauloꞌe zeḡeꞌa ꞌizema buanogano ꞌahige ziro, raenaꞌa, “Vine Zaḡoḡaniꞌa peroveta vazeḡa Isaia-onoꞌo vouḡaze zirotaꞌaꞌe ḡoere huga, raenaꞌa,