1 Eme Itali habaꞌa onaꞌuma madaḡa meirotene, Paulo zu ḡuꞌa azaḡa nuꞌe uti vazeḡa ꞌahoga, niḡa Iulio ꞌevorao riꞌiziro. Aniꞌe Roma zuhiꞌaḡa uti azaḡa ibito ziniꞌeteꞌe vazeḡa ꞌahoga. 2 Ebu emeꞌe Adaramateno ne ḡasiḡano tiriro. Ḡasi aꞌaꞌe Asia habaꞌa toḡatoḡaḡano tue tue onaꞌuma ḡasiḡa. Eme eꞌe hina ruhau onamiro. Ebu Makedonia habaꞌano Tesalonika neḡa vazeḡa ꞌahoga, niḡa Aristako zuni emeḡe teite onamiro.

3 Irarirotene, Sidono neḡano feuriro. Iulio ani Paulo faifaineꞌenaꞌa, tuḡuniro, Paulo ane edeḡa azaḡa vaḡadu, naginiꞌa fereneꞌeteꞌe hanoga veize. 4 Ebu eꞌeanoꞌo hena bare ruhanadu, Kupro ꞌumuḡa genaḡano ꞌafe ruhau onamiro, mazaḡa zavaraꞌe emeḡe haohaofe onainu. 5 Ebu Kilikia zu Pamufulia habaꞌa davaraḡa bohaꞌano ruhau onamo, Lukia habaꞌano Mura neḡano hebetiro. 6 Ebu eꞌe habaꞌano uti azaḡa ibito ziniꞌeteꞌe vazeḡaniꞌa Itali onamihi raꞌeteꞌe ḡasiḡa horoniro. Aꞌe Alesandria neḡa ḡasiḡa. Eme eꞌe ḡasiḡano tutufe tiriro. 7 Ebu mada ḡehaḡa teꞌoteꞌauꞌenaꞌa negane ruhau onamo, Kenido davaraḡa bohaꞌano feuriro. Zavaraꞌe ꞌize haohaofe onainu ꞌahine, eꞌe moneo ruhau onamoga mene idararo. Eꞌanoꞌo eme Salomone musuga naenaeḡa onamadu, Kerete ꞌumuḡano ꞌafe ruhau onamiro. 8 Ebu teꞌoteꞌauꞌenaꞌa zavara haone, eꞌe ꞌumuḡa genaḡa uni ruhau onamo, “Toḡatoḡa Manoḡa” rae huneꞌeteꞌe toḡatoḡaḡano hebetiro. Aꞌe Lasea neḡa uhiḡano.

9 ꞌOugeꞌenaꞌa, mada ḡehaḡa foure hauḡiro ꞌahine, ḡasio ruhau onamogaꞌe riḡa zu ḡiḡaroḡa. Mazaḡa Iuda azaḡaniꞌa iḡaiḡa ogomu moneo zaḡozaḡiꞌuma madaḡa vitaro. Eꞌe hugaꞌe zavara madaḡaniꞌa feuriro, ebu ruhaꞌuma batoḡa ꞌai hauḡiro. Eꞌanoꞌo Pauloꞌa iraduguziro, 10 raenaꞌa, “Zae niduꞌa! Eḡeꞌa ḡianeꞌetene, eme ruhau onamine sauꞌa hidiꞌuma, ḡasi zu tohefe niduꞌaꞌe davarao hunuhuniꞌuma, ebu ḡabonefe zuni sautaꞌuma.” 11 Rehano uti azaḡa ibito ziniꞌeteꞌe vazeḡaꞌe Paulo ḡoere mene mae ḡihinadu, ḡasi miruneꞌeteꞌe vazeḡa zu ḡasi vazeḡa ḡoere daꞌo mae ḡihiniro. 12 Zeḡeꞌa raꞌetaꞌaꞌe, hebetateꞌe habaꞌaꞌe zavara zu nahune madaḡanoꞌe mene manoḡa. Eꞌanoꞌo vaze niduꞌaꞌe eꞌe habaꞌanonoꞌo ruhau buanadu Foinike toḡatoḡaḡa onamihi reiro. Ebu eꞌe toḡatoḡaḡanobuꞌu zavara zu nahune madaḡa meꞌuma reiro. Foinike toḡatoḡaḡaꞌe Kerete ꞌumuḡano ḡasiꞌa hebeteꞌeteꞌe toḡatoḡaḡa ꞌahoga, madaꞌa zubureꞌeteꞌe mone zamainiꞌohe.

13 Ebu zavara ꞌai kauri moneonoꞌo tahitahe onainuteꞌea, ze ꞌane mada manoḡaniꞌa onaeha reiro. Eꞌanoꞌo ḡasi hanigaḡa hutube zounadu, Kerete ꞌumuḡa genaḡa daꞌo uni ruhau onamiro. 14 Mene faḡa onamiroteꞌea, zavara boro bagaḡa ꞌai ꞌumu raganonoꞌo gudau ovairo. Aꞌe niḡa “Iurakulon[a]” rae huneꞌeteꞌe zavaraḡa boro. 15 Ebu ḡasio ragatiꞌ aradu, zavara roḡoroḡe onamoga mene idaḡa ꞌahine, zavara daꞌo magananiro. 16 Ebu Kauda ꞌumuḡa komeꞌa genaḡa ꞌafe diuḡirotuꞌu, ḡasi komeꞌa ḡaruna ahasinuteꞌe riḡa hutube zouniro. 17 Ebu ohoze ohozeꞌa ḡasi ahase zounirotene, mini hina ḡasi boroo tatuhe ogoru tiro. Ebu hena nougine gasiꞌa ruhau onamadu, Afrika habaꞌa hetaꞌaḡano, niḡaꞌe Surutis-o rameruꞌutiꞌuma rae riharo. Eꞌanoꞌo ḡasi faraiḡa zuni hutube bunadu zavara maganani ruhau oname tauḡiro. 18 Rehano zavaraꞌe ꞌize ufeta boro. Eꞌanoꞌo irarirotene, ḡasio gaueꞌeteꞌe azaḡaniꞌa ḡasi ufinoga rae, odoheꞌeteꞌe toheḡa davarao mae mae modiro. 19 Ebu bare iraradu, mada uḡiduḡa meirotene, ḡasio odohe gaueꞌeteꞌe toheḡa zuni mae mae modiro. 20 Eme mada ḡehaḡa mada zu buzuva mene horoniro, zu zavaraꞌe ufeta hune sautu radiunu. Eꞌanoꞌo emeḡe niduꞌa mene ḡabodiꞌuma rae zamariro.

21 Ze mada ḡehaḡa oganoga mene idararotene, Pauloꞌa zamazeo iḡune edanadu ziro, raenaꞌa, “Zae niduꞌa! Eḡe ḡoere mae ḡihinadu, Kerete ꞌumuḡanonoꞌo mene ruhau buafone, ꞌahige aduga mene hidifo, zu toheze mene mae mae modifo. 22 Rehano e izidi ꞌada ziꞌeteꞌe. Inaroꞌi! Mazaḡa vazeni ꞌahoga mene dauḡiꞌuma, u hube ḡasiꞌa daꞌo sautaꞌuma. 23 Zuhiꞌa Boro, eḡeꞌa kurano hauꞌeteꞌe zu tuḡureḡa haḡaeꞌeteꞌe Badiꞌaḡa, ani tuḡure vigaꞌa ohoḡore ohere eḡe uhiḡano edanadu 24 ḡoreheha, raenaꞌa, 'Paulo! Ago rihanoꞌi! Ḡaꞌe Roma zuhiꞌaḡa zamao ꞌize edaꞌuma. Zu Badiꞌa manoḡaꞌe ḡae teite uꞌano, ḡae teite idaḡa ruhauꞌeteꞌe azaḡa niduꞌaꞌe Badiꞌaꞌa ḡaboziꞌuma.' 25 Eꞌanoꞌo zae niduꞌa, inaroꞌi! E, Badiꞌa tuḡure vigaꞌa ehateꞌe ḡoeꞌa niduꞌa hudaꞌuma rae, ani mazao fieꞌohe. 26 Rehano emeꞌe zavaraꞌa hudi onamadu ꞌumu ꞌahoga hetaꞌaḡano ḡasiꞌa ehoriꞌuma.”

27 Ohere gaubanana zu ḡazaḡa fare (14) meiroteꞌea zuni, Adaria Davaraḡano zavaraꞌa ꞌize hudi vaevaefinu. Ebu eꞌe oheꞌa nemanemaḡano ḡasio gaueꞌeteꞌe azaḡaniꞌe gaba ruhau haniteꞌeteꞌe ederiro. 28 Eꞌanoꞌo ze davara hoeꞌa idanirotene, mita ḡae ḡazaḡa gaubanana (40) heuḡa. Ebu tahiḡa guhianadu bare idanirotene, mita ḡae uḡidu gaubanana (30) daꞌo. 29 ꞌOugadu ze ḡiḡaroze ruziro, mazaḡa hena ḡasiꞌa vatava rana rameruꞌutiꞌuma reiro. Eꞌanoꞌo ze ḡasi hanigaḡa ḡazaḡa (4) ḡasi ariḡa ḡuzuonoꞌo mae davarao feuniro, ebu ḡaiḡai iraroga veize guhiu radiro. 30 Eꞌe zamaḡano ḡasio gaueꞌeteꞌe azaḡaꞌe feranoga radu, soꞌe ḡasi hanigaḡa ovoe buneꞌohe rae, ḡasi kobeꞌa fuiꞌadu zazoꞌanonoꞌo ovoe buniro. 31 Rehano Pauloꞌa uti azaḡa ibito ziniꞌeteꞌe vazeḡa tahiꞌaḡeta ziro, raenaꞌa, “Ḡasio gaueꞌeteꞌe azaḡaniꞌa ḡasi ꞌadaonoꞌo vaḡinine, zaꞌe mene ḡabodiꞌuma.” 32 Eꞌanoꞌo uti azaḡaniꞌa ḡasi kobeꞌa ovoe dabanateꞌe miniḡa ꞌai tene reꞌadu, ruhune modiro.

33 Ebu irara ꞌai hanitirotene, Pauloꞌa zeḡe niduꞌa ogomu anoga rae umiziro, raenaꞌa, “Za mada gaubanana zu ḡazaḡa fare (14), zamaze aduduꞌenaꞌa guhiu onaeha. Ebu ogomuni ꞌahoga zu mene aneha. 34 Eꞌanoꞌo e umizeꞌohe. Izidi za ogomu nu anoꞌi! Aꞌe ahirizeꞌa inaradu ḡabone hidoga veize. Eḡeꞌa ziꞌohe. Zae vadinionoꞌo igu tibani zuni mene dauḡiꞌuma.” 35 Paulo ani ꞌouge rae zirotene, ꞌuvahu madu vaze niduꞌa ubumao Badiꞌa mazao ite matuꞌo haro. Ebu vahegadu aro. 36 ꞌOugadu zeḡe niduꞌa inaradu, ogomu mae aro. 37 Ḡasi eꞌe zamaḡano bone emeḡe niduꞌa 276-ꞌa radiro. 38 Zeḡe niduꞌa ogomu au idararotene, ḡasiꞌa ufiranoga veize ogomu niduꞌa davarao mae mae modiro.

39 Oheredaꞌo madaꞌa agaru feurirotene, ze noꞌe habaꞌano ruhaunutaꞌaꞌe aḡuꞌa. Rehano zeꞌe haba guniḡa hesaḡeta moneni horoniro. Eꞌanoꞌo ze idaraune, eꞌe hesaḡa ranao ḡasi odohe tiriꞌuma reiro. 40 Ebu ze ḡasi hanigaḡa davara zamaḡano tene riꞌi modiro, ebu tari ogoru tiroteꞌe miniḡa fuiꞌiro. Ebu zavara veize farai hutube ḡihinadu, hesa mone tarine onamiro. 41 Rehano ḡasiꞌe hetaꞌano tutuhanadu, zazoꞌa ḡohaꞌe eꞌea teadu mene hune zu hagariro. Ebu avaḡa ḡuzuꞌe saꞌu boroboroꞌa kafene vahegadu faharo.

42 Ebu uti azaḡaniꞌa ḡutaroteꞌe azaḡaꞌe zimi hauḡiꞌuma rae togaziro, mazaḡa hena zeꞌa ḡemabe onamadu ferau ḡouriꞌuma. 43 Rehano uti azaḡa ibito ziniꞌeteꞌe vazeḡaꞌe Paulo ḡabonihi reiro ꞌahine, uti azaḡa garariro. Ebu tuḡuzenaꞌa, “Ḡema edeḡa azaḡaꞌe ibite rafatadu ḡemabe onamoꞌi, ebu gabao tiroꞌi!” reiro. 44 “U ḡema aḡuꞌa azaḡaꞌe, ḡasi ireḡa rugaruga hina kame ḡemabe onamoꞌi!” reiro. ꞌOuge haḡaeꞌenaꞌa zeḡe niduꞌa gabao ḡemabe tiradu ḡabode ḡouriro.

<- Apostolo 26Apostolo 28 ->