1 Eꞌe enogano Paulo ani, Derebe neḡa onamiro, ebu hena Lusitera neḡa onamiro. Eꞌea Zuhiꞌa Boro tahiꞌa ꞌahoga, niḡa Timoteoꞌa radiunu. Ani viꞌaꞌe Iuda roḡaeḡa. Zuhiꞌa Boro mazao fiinu, rehano mogaꞌe Giriki vazeḡa. 2 Zuhiꞌa Boro mone azaḡa, Lusitera neḡa zu Ikonio neḡano radiuꞌeteꞌeꞌa, raenaꞌa, “Timoteoꞌe vaze manoḡa.” reiro. 3 Ebu Paulo ani uraꞌe, Timoteoꞌa zeḡe teite onamoga uratiro. Rehano Iuda azaḡa eꞌe habaꞌano radiuꞌeteꞌe, ze edeḡa Timoteo mogaꞌe Giriki vazeḡa. Eꞌanoꞌo Pauloꞌa Timoteo ahiꞌa rana iḡuri haḡairo, hena iḡite Iuda azaḡaniꞌa ḡoeriꞌuma reiro. 4 Ebu ze neḡaneḡa ragave onameꞌenaꞌa, Ierusalema neḡano apostolo azaḡa zu vaze boroboroꞌa ḡoere idaniroteꞌe ḡoeꞌa ihozido, zeḡe eꞌe haḡaiḡano radoga veize. 5 Eꞌanoꞌo ekalesia azaḡaꞌe Zuhiꞌa Boro mazao fieꞌeteꞌe moneo inarido, ebu mada niduꞌa Zuhiꞌa Boro mazao fieꞌeteꞌe azaḡaniꞌa ḡeharu onaminu.

6 Paulo zu ane hegotiroteꞌe azaḡa, ze Ferigia zu Galatia habaꞌano onamiro, mazaḡa Vine Zaḡoḡaniꞌa Asia habaꞌano haramoga garariro. 7 Ze Musia habaꞌa diuḡihi raꞌeteꞌea feurirotene, ze ura Bitunia habaꞌa onamihi reiro, rehano Iesu Vine Zaḡoḡaniꞌa gararo ziniro. 8 Eꞌanoꞌo ze Musia habaꞌa zogoradu, Toroa neḡa ovoiro. 9 Eꞌe oheꞌano Paulo ani iḡunaro. Makedonia vazeḡa ꞌahoganiꞌa edanadu umineꞌenogano horoniro, raenaꞌa, “Makedonia habaꞌa fare onaadu, emeḡe danafoꞌi!” 10 Pauloꞌa iḡuna eꞌe horonirotene, eme, eꞌea hari manoḡa haramoga veize Badiꞌaꞌa tuḡufeꞌohe rae zamaradu, Makedonia habaꞌa onamoga veize ḡarihe ruhibiro.

11 Eme Toroa neḡanonoꞌo ḡasi hina, roḡoroḡe Samotarake ꞌumuḡa ruhau onamiro, ebu irarirotene, Neapoli toḡatoḡaḡa ruhau onamiro. 12 Eꞌeanoꞌo Filipi neḡa onamiro. Filipi neḡaꞌe Makedonia habaꞌa zamaḡano ne boro zu Roma azaḡa ne. Eme mada nu eꞌea radiunu.

13 Fura madaḡano, eme Filipi neḡa ḡabiꞌa enoga buanadu vu onamiro. Eme ꞌane, Iuda azaḡaniꞌa eꞌea nuꞌoranadu kurauꞌe gaogi, rae zamariro. Ebu eꞌea ehoradu, nuꞌoraꞌ onairoteꞌe roḡaeḡa roḡaeḡa ḡoreziro. 14 Paulo ḡoere abito haunuteꞌe roḡaeḡa ꞌahogaꞌe niḡa Lidia. Aniꞌe Tuatira neḡa roḡaeḡa, ebu dabua kanaḡa seroneꞌeteꞌe gauḡa boro haḡaido, zu Badiꞌa kurano haudoteꞌe roḡaeḡa. Zuhiꞌa Boroꞌa zamaḡa bohano haro. Eꞌanoꞌo ani Paulo ḡoere egadu mae ḡihiniro. 15 Ebu Lidia zu ane neo radiuꞌeteꞌe azaḡa bapatizozirotene, aneꞌa umifiro, raenaꞌa, “Za, eꞌe hube hune Zuhiꞌa Boro mazao fieꞌohe rae zamaroꞌidene, eḡe ne onaadu eꞌea radoꞌi!” Ebu ani ꞌouge teꞌoteꞌanadu, ane ne zamafe onamiro.

16 Mada ꞌahogano eme kuru habaꞌa onameꞌenogano, tuḡure roḡae tahiꞌaḡa hidiro. Aniꞌe vine sauꞌaniꞌa ane zamao radiunu. Eꞌanoꞌo aniꞌe zama moneo naginiꞌa fureratiteꞌe rae furenido. Aniꞌe ꞌouge haḡaeꞌenaꞌa ane boro azaḡa veize moni boro haḡaido. 17 Aniꞌe, Paulo zu emeḡe hegoteꞌenaꞌa, ḡihau ḡoere iḡuniro. “ꞌAhi duḡuruꞌe Niḡa Hitaga Hune Badiꞌaḡa tuḡure azaḡa! Zeꞌe Badiꞌaꞌa nouge nouge za ḡaboziteꞌe ibiḡa rae fureno ziniꞌohe.” 18 Ani mada ḡehaḡa ꞌouge daꞌo haḡae onaminutene, Paulo ani eꞌe egoga fuḡoniro. Eꞌanoꞌo tehadu roḡae tahiꞌaḡa zamao radiuꞌeteꞌe vineḡa sauꞌa eꞌe niro. “Iesu Keriso niḡano, eḡeꞌa ḡaꞌohe. Roḡae tahiꞌaḡa eꞌe mazaonoꞌo buanoꞌi!” Ḡoere eꞌe ariḡano vine sauꞌaniꞌa roḡae tahiꞌaḡa mazaonoꞌo buaro.

19 Tuḡure roḡae tahiꞌaḡa eꞌe boro azaḡaꞌe ederiro, ani zeḡe veize moni mene haḡaiꞌuma. Eꞌanoꞌo ze Paulo zu Silasi oboze teadu, ne hunio ahase onamiro, gavamani azaḡaniꞌa kotazoga veize. 20-21 Ze Roma gavamani azaḡa vaḡe tutuze onamadu ziro, raenaꞌa, “ꞌAdi duḡuruꞌe Iuda azaḡa. Zeꞌe haḡai nunu vaze ihozadu, emeḡe ne azaḡa zama ḡunuḡununeꞌohe. Zeḡeꞌa ihozeꞌetaꞌaꞌe, Roma azaḡaniꞌa mae ḡihinoga zu haḡaogaꞌe goro.”

22 Ebu vaze ḡuḡuvaḡa zuni Paulo zu Silasi agireziꞌeteꞌe azaḡa teite ꞌauḡiro. Ebu gavamani azaḡaniꞌa zeḡe tahiꞌa tahiꞌa tuḡuzadu, “Dabuaze zigi vaḡinadu somori hina bouzoꞌi!” reiro. 23 Ze bouze sausauziroteꞌe enogano, ḡuano ohoziro, ebu ḡuꞌa neḡa gadineꞌeteꞌe vazeḡa ninaꞌa, “Fairu gadizoꞌi!” reiro. 24 Ḡuꞌa neḡa gadineꞌeteꞌe vazeḡaꞌe eꞌe ḡoeꞌa egadu, ḡuꞌa neḡa zamaḡa huneo ohoziro, ebu ire aduga hoꞌogano odaze veonadu ꞌufune modiro.

25 Ohere nemanemao Paulo ani Silasineꞌe kuraunu, zu bada maꞌenaꞌa Badiꞌa niguninu, ebu ḡuꞌa azaḡaꞌe abito zininu. 26 Eꞌe zamaḡano habaꞌa tabara ḡihau hagariro. Eꞌanoꞌo ḡuꞌa neḡa ohoniroteꞌe habaꞌa zuni hagariro. Ebu ḡuꞌa neḡa ibihetaḡa niduꞌa tabara bohataro, ebu ḡuꞌa azaḡa ꞌufuziroteꞌe auriḡa niduꞌa butau ḡouriro. 27 Ḡuꞌa neḡa gadineꞌeteꞌe vazeḡaniꞌa evatadu, ḡuꞌa neḡa ibihetaḡa bohatanoga horonirotene, kariḡa hizi madu, aneꞌa bare ḡounihi reiro, mazaḡa ani ꞌane ḡuꞌa azaḡa niduꞌa feraneha, rae zamariro. 28 Rehano Pauloꞌa ḡihau ḡoere iḡuneꞌenaꞌa, “Ago ꞌougoꞌi! Emeḡe niduꞌa ꞌada.” reiro.

29 Ḡuꞌa neḡa gadineꞌeteꞌe vazeḡaꞌe ḡurizabu raenaꞌa ihure huḡane madu ḡuꞌa neḡa dure diuḡiro. Ebu rereruꞌenaꞌa, Paulo zu Silasi zamao ḡuḡuriro. 30 Ebu ani ḡuꞌa neḡanonoꞌo mae buzadu ḡadiziro, raenaꞌa, “Vaze boroboro, e nagini haḡaine ḡabone hidiꞌuma?”

31 Zeḡeꞌa naenaeninaꞌa, “Zuhiꞌa Boro Iesu mazao fioꞌi! ꞌOugine, ḡae zu ḡae neo radiuꞌeteꞌe azaḡaniꞌe ḡabone hidiꞌuma.” reiro. 32 Ebu ḡuꞌa neḡa gadineꞌeteꞌe vazeḡa zu neḡano raidiuꞌeteꞌe azaḡa niduꞌa mazao Zuhiꞌa Boro ḡoere rae fureno ziniro. 33 Ebu ꞌize ohere rehano, ḡuꞌa gadineꞌeteꞌe vazeḡaniꞌa anianine tutuze onamadu bouziroteꞌe iḡuꞌa vuzuꞌo ziniro. Ebu ane zu neḡano radiuꞌeteꞌe azaḡa niduꞌa zogone bapatizo meiro. 34 Ebu ḡuꞌa neḡa gadineꞌeteꞌe vazeḡaniꞌa ane ne tutuze onamadu ogomu ziniro. Aniꞌe neḡa azaḡa niduꞌa teite matuꞌu boro haḡairo, mazaḡa zeꞌe Badiꞌa mazao fiiro ꞌahine.

35 Eꞌe irarirotene, gavamani azaḡaniꞌa zeḡe gau azaḡa tuḡuziro, ḡuꞌa neḡa gadineꞌeteꞌe vazeḡa nouga veize, raenaꞌa, “Eꞌe azaḡa tuḡuze buzoꞌi!” 36 Ebu ḡuꞌa neḡa gadineꞌeteꞌe vazeḡaniꞌa Paulo niro. “Gavamani azaḡaniꞌa ḡoere tuḡureha, zae tuḡuze buzoga veize. Eꞌanoꞌo izidi ꞌada zama roḡeḡano onamoꞌi!”

37 Rehano Pauloꞌa gavamani gau azaḡa ziro, raenaꞌa, “Emeꞌe Roma mone azaḡa. Ze kotao zu mene ohofa rehano, hunio boufadu ḡuꞌano ohofeha. Ebu izidi ze, hena, sifu tuḡufe bufihi raꞌohe. Mene ꞌougiꞌuma! Zeḡe huneꞌa onaadu, tutufe bufiꞌuma.”

38 Gavamani gau azaḡaniꞌa gavamani azaḡa vaḡe onamadu ziro. “Paulo zu Silasiꞌe Roma mone azaḡa.” reirotene, ze rihau rudaro. 39 Eꞌanoꞌo gavamani azaḡaꞌe zeḡe vaḡe onamadu umiziro, zeḡe mazao nagini sauꞌa haḡairoteꞌe rae modoga. Ebu gavamani azaḡaniꞌa zamaze buzadu umiziro. “Filipi neḡa mode iḡunoꞌi!” 40 Ebu anianine ḡuꞌanonoꞌo buarotene, Lidia ne onamiro. Eꞌea Zuhiꞌa Boro mone azaḡa hidadu, inara ḡoeꞌa ziro, ebu Filipi neḡanonoꞌo iḡuniro.

<- Apostolo 15Apostolo 17 ->