1 Nego nabudi, emeḡe Zuhiꞌa Boro Iesuꞌa bare onaiteꞌe zu emeḡe nuꞌofadu Iesu teite hidiꞌuma moneo ꞌahige ziꞌohe: 2 Zuhiꞌa Boroꞌa onaiꞌuma madaḡa ꞌai feureha reiteꞌe ḡoeꞌa egoꞌidene, zamaze ago koukouroꞌi zu ago adunoꞌi! Vaze ꞌahoganiꞌa Vine Zaḡoḡaniꞌa eꞌe ḡoeꞌaꞌe rae inare reiteꞌe ga, vazeꞌa haramiroteꞌe ga, emeḡeꞌa tuḡuriroteꞌe fefaḡa zamaḡano touga rae reiteꞌe zuni ago egoꞌi! 3 Zaꞌe eꞌeguḡa ḡuriroḡa ḡoeꞌaꞌe ago hune zu egoꞌi! Mazaḡa Zuhiꞌa Boro Iesuꞌa ize ꞌizema onaogano, ibite ize vaze ḡehaḡaniꞌa Badiꞌa aḡireniꞌuma, ebu Badiꞌa goro ḡoeꞌa rae modeꞌeteꞌe vazeḡa sauꞌa huneḡaniꞌa fureraꞌuma. Aniꞌe ḡonagano Badiꞌaꞌa ire rogao mae feuniꞌuma. 4 Aniꞌe Badiꞌa huga, ebu vazeꞌa Badiꞌa teiḡe kurauꞌeteꞌe ḡauḡa niduꞌa agireniꞌuma, ebu Badiꞌa zu ḡau niduꞌa vitinadu, aneꞌa ane mae hitananiꞌuma. Ebu aniꞌe Badiꞌa Neo diuḡe ehoriꞌuma, ebu aneꞌa ane bare ‘Eꞌe Badiꞌa huga’ rae reꞌuma.

5 Zae edeḡa, ḡoere ꞌadiꞌe eḡeꞌa zae teite radiudoteꞌe madaḡano zido. 6 Zuni zae edeḡa, izidi aḡire vazeḡaniꞌa fureraꞌuma ibiḡa naginiꞌa ꞌueꞌetaꞌaꞌe. Badiꞌaꞌa ḡoitoriroteꞌe madaḡanobuꞌu, aniꞌa fureraꞌuma. 7 Badiꞌa goro ḡoeꞌa aḡirohauꞌeteꞌe zamaroneḡa sauꞌaniꞌa vaze vaze zamao sifu gaueꞌohe, rehano hunioꞌe mene fufurimaꞌuma. Mazaḡa aḡire vazeḡaniꞌa gauiꞌuma ibiḡaꞌe vaze ꞌahoganiꞌa ꞌue radiꞌuma, aḡire vazeḡa ꞌue radiuetaꞌaꞌe vazeḡaꞌe Badiꞌaꞌa mae vaḡiniꞌuduꞌu, 8 aniꞌa fureraꞌuma. Aniꞌe madaḡa meine, Zuhiꞌa Boro Iesuꞌa ḡoeꞌa inaraḡa hina sausaune runiꞌuma, ebu Iesuꞌa onaiteꞌe agaḡaḡa boro hina sausaune runiꞌuma.

9 Aḡire vazeḡaꞌe Sataniꞌa gauiꞌuma ibiḡano gaue onaiꞌuma. Sataniꞌa gigiꞌaḡa hanadu aniꞌe haḡai nu badeḡa, tahi zu zaguzagaꞌuma haḡaiḡa ebu haḡai nunu niduꞌa ḡuriro moneo haḡaiꞌuma. 10 Ebu aḡire vazeḡa sauꞌa haḡaiḡa nunu niduꞌa hina rune ibiḡano radiuꞌeteꞌe azaḡa soꞌoziꞌuma. Zeꞌe Badiꞌa hari manoḡa, ḡoere huga mae ḡihinifone, Badiꞌaꞌa ḡabozifo rehano, zeꞌe mae ḡihinoga mene uratiro. Eꞌanoꞌo ze mazaoꞌe rune ibiḡano onamoga daꞌo. 11 Zeꞌe Badiꞌa hari manoḡa mene mae ḡihiniro ahine, Badiꞌaꞌa zeḡe zama mae ḡunuḡununiꞌuma, ebu ze ꞌane ḡuriro ḡoeꞌaꞌe huga radu mae ḡihiniꞌuma. 12 Zeꞌe ḡoere huga, hari manoḡa mene mae ḡihiniro, ebu haḡai sauꞌa sauꞌa matuꞌuḡa haḡairo. Eꞌanoꞌo Badiꞌaꞌa ꞌaheḡe ḡoreziꞌuma, ''Zaꞌe sauꞌa haḡa ahine, aduga hidiꞌuma.''

13 Nego nabudi, Zuhiꞌa Boro zamarone azaḡa, eme iḡaiḡa zae uꞌano Badiꞌa mazao manoḡa tauḡi raꞌohe. Mazaḡa za ꞌai ḡabozoga veize irina ꞌoma Badiꞌaꞌa inahe meiro. Aꞌe Vine Zaḡoḡaniꞌa Badiꞌa veize avo ohoziroꞌeteꞌe gauḡa uꞌano, zu zaeꞌa Badiꞌa hari manoḡa mae ḡihineꞌeteꞌe uꞌano. 14 Badiꞌa ani, zae ḡabodoga rae zamaziro, ebu emeḡeꞌa hari manoḡa haramoziniro. Aꞌe zae zuni Zuhiꞌa Boro Iesu Keriso agaḡa manoḡa zamaḡano radifine. 15 Eꞌanoꞌo nego nabudi, zaꞌe edau gigaranadu, emeḡeꞌa hebe hina ziroteꞌe ga fefao mirihiroteꞌe ihoreḡa ḡoeꞌa zamare radiuꞌenoꞌi!

16-17 Eme ꞌahige kuratihi: Emeḡe Zuhiꞌa Boro Iesu Keriso zuni Badiꞌa emeḡe Mamaꞌa zamaze rinedoꞌi, ebu haḡai manoḡa haḡaiteꞌea, zu ḡoere manoḡa reiteꞌe moneo inarazoꞌi! Badiꞌa ani emeḡe zamariro, ebu ane manoḡa uꞌano inara rifi onamo tuḡutuḡu. Kerisoꞌa emeḡe uꞌano rudaroteꞌe anoꞌo, Badiꞌaꞌa radiu tuḡutuḡu ḡauḡa rifoga veize ḡoitoriro. Ebu emeꞌa hubehune radiu tuḡutuḡu ḡauḡa zamareꞌeteꞌe hidoga veize, aniꞌa danafeꞌohe.

<- Tesalonika Vesu 1Tesalonika Vesu 3 ->